தமிழகத்தில் தி.மு.க. ஆட்சி 2021 மே முதல் தொடங்கி இப்போது 2026 பிப்ரவரி வரை சுமார் 5 ஆண்டுகள் ஆகியுள்ளது. இந்த காலகட்டத்தில் சட்டசபை கூட்டங்கள் மிகக் குறைவான நாட்களே நடைபெற்றுள்ளன.

சபாநாயகர் அப்பாவு அண்மையில் தெரிவித்தபடி, 2021 ஜூன் 21 முதல் கடந்த பிப்ரவரி 20 வரை மொத்தம் 161 நாட்கள் மட்டுமே சபை நடந்துள்ளது. இது கடந்த 30 ஆண்டுகளில் இல்லாத குறைந்த அளவாகும்.

தி.மு.க. 2021 தேர்தல் வாக்குறுதியில், ஒவ்வொரு ஆண்டும் குறைந்தபட்சம் 100 நாட்கள் சட்டசபை கூட்டம் நடத்தப்படும் என்று அறிவித்தது. ஆனால், 5 ஆண்டுகளில் சராசரியாக ஆண்டுக்கு 32 நாட்கள் மட்டுமே நடந்துள்ளது.

இதையும் படிங்க: 2026 -2027ம் ஆண்டுக்கான இடைக்கால பட்ஜெட் தாக்கல்!! 2.22 மணி நேரம் உரை! எந்த துறைக்கு எவ்வளவு நிதி ஒதுக்கீடு! அலசல்!

இது எதிர்க்கட்சிகளால் கடும் விமர்சனத்துக்கு உள்ளாகியுள்ளது. ஒப்பிடுகையில், ஜெயலலிதா ஆட்சி காலம் 2011-2016 இல் 191 நாட்கள் சபை நடந்தது. கடைசி அ.தி.மு.க. ஆட்சியில் (2016-2021) 162 நாட்கள் நடந்தது. 1989-1991 தி.மு.க. ஆட்சியில் கூட 104 நாட்கள் நடந்தது.

கொரோனா காரணமாக 2020-ல் சில கூட்டங்கள் குறைக்கப்பட்டாலும், தி.மு.க. ஆட்சியில் கொரோனா இல்லாத காலத்திலும் சபை நாட்கள் குறைவாகவே இருந்தது. மேலும், சபை நிகழ்ச்சிகள் நேரடி ஒளிபரப்பு செய்யப்படும் என்ற வாக்குறுதியும் முழுமையாக நிறைவேற்றப்படவில்லை. 

கேள்வி நேரம், முதல்வர் பதிலுரை போன்றவை மட்டுமே ஒளிபரப்பானது. எதிர்க்கட்சி தலைவர் எடப்பாடி பழனிசாமி பங்கேற்ற விவாதங்கள், அ.தி.மு.க., பா.ஜ.க., பா.ம.க. உறுப்பினர்களின் பேச்சுகள் ஒளிபரப்பப்படவில்லை. இறுதி நாளான பிப்ரவரி 20-ல் கூட்டணி கட்சி தலைவர்கள் அரசை புகழ்ந்த பேச்சு மட்டுமே நேரடி ஒளிபரப்பானது.

சபைக்கு வருகை பதிவில், 2021 மே முதல் 2026 பிப்ரவரி வரை 'ஆப்சென்ட்' (விடுப்பு) எடுத்தவர்கள் 18 பேர் என சபாநாயகர் பட்டியல் வெளியிட்டுள்ளார். இதில் மாதவரம் எம்.எல்.ஏ. சுதர்சனம் பல நாட்கள் கையெழுத்து போட்டு சென்றதாகவும், ஈரோடு கிழக்கு எம்.எல்.ஏ. சந்திரகுமார் (2025 இடைத்தேர்தலில் வென்றவர்) பெயரும் இடம்பெற்றுள்ளது. 

எதிர்க்கட்சி தலைவர் பழனிசாமி அ.தி.மு.க. ஆட்சியில் ஒரு நாள் கூட விடுப்பு எடுக்கவில்லை. ஆனால் இப்போது பல நாட்கள் வரவில்லை. முதல்வர் ஸ்டாலின், துணை முதல்வர் உதயநிதியும் சில நாட்கள் வரவில்லை.

எம்.எல்.ஏ.க்கள், பொதுமக்கள், சமூக ஆர்வலர்கள் ஆண்டுக்கு அதிக நாட்கள் சபை நடக்க வேண்டும் என எதிர்பார்க்கின்றனர். ஜனநாயகத்தில் சட்டசபை விவாதங்கள் முக்கியம். ஆனால், தி.மு.க. ஆட்சியில் இது குறைந்துள்ளது. தேர்தல் நெருங்கும் நிலையில் இது பெரும் விவாதமாகியுள்ளது.

இதையும் படிங்க: துர்கா ஸ்டாலினின் பிள்ளையார்பட்டி சென்டிமெண்ட்! குன்றக்குடியில் படிபூஜை! முக்கிய கோயில்களில் வழிபாடு!