மதுரை சோழவந்தான் அருகே விரிவுபடுத்தப்பட்ட மகளிர் வெற்றி பயணத்திட்ட தொடக்க நாளில் பெண் பயணியிடம் டிக்கெட் வாங்கிய நடத்துனரால் பரபரப்பு. அதிகாரிகள் நடவடிக்கை எடுக்க பொதுமக்கள் கோரிக்கை

​தமிழகத்தில் விரிவுபடுத்தப்பட்ட மகளிர் வெற்றி பயணத் திட்டத்தை தமிழக முதல்வர் ஜோசப் விஜய் சென்னை கோயம்பேட்டில் இன்று காலை 10 மணியளவில் தொடங்கி வைத்தார் ​இதனைத் தொடர்ந்து தமிழகத்தின் பல்வேறு பகுதிகளில் அனைத்து பேருந்துகளிலும் பெண்கள் இலவசமாகப் பயணம் செய்யலாம் என்று அரசின் சார்பில் அறிவிப்பு வெளியிடப்பட்டிருந்தது.

​இந்த நிலையில், மதுரை மாவட்டம் சோழவந்தான் அருகே மதுரை பெரியார் பேருந்து நிலையத்திலிருந்து விக்கிரமங்கலம் அருகே காடுபட்டி கிராமத்திற்குச் சென்ற 65 ஏ என்ற பேருந்தில் பயணம் செய்த பெண் பயணியிடம் டிக்கெட் வாங்கிய நடத்துனரால் சிறிது நேரம் சலசலப்பு ஏற்பட்டது.

இதையும் படிங்க: "செல்லமே மாமாவ பாருடா"..! தவெக துண்டுடன் வந்த குழந்தை... அள்ளிக் கொஞ்சிய முதல்வர் விஜய்..!!

​சோழவந்தான் அருகே தச்சம்பத்து கிராமத்தைச் சேர்ந்த செல்வி என்பவர் காடுபட்டி பகுதிக்குச் செல்லும் 65(A) எண் கொண்ட பேருந்தில் இன்று பயணம் செய்துள்ளார். அவரிடம் நடத்துனர் டிக்கெட் எடுக்கக் கூறியுள்ளார்.

​ஆனால், அக்டோபர் இரண்டாம் தேதி முதல் அனைத்து பேருந்துகளிலும் மகளிர் இலவசமாகப் பயணம் செய்யலாம் என முதல்வர் அறிவித்துள்ளதாகக் கூறியும், நடத்துனர் வலுக்கட்டாயமாக டிக்கெட் எடுக்கக் கோரியதாகக் கூறப்படுகிறது.

​இதன் காரணமாக வேறு வழியின்றி தச்சம்பத்து முதல் தென்கரை வரை 9 ரூபாய் பணம் கொடுத்து செல்வி டிக்கெட் வாங்கியுள்ளார். மகளிருக்கான முக்கிய திட்டங்களில் ஒன்றான விரிவாக்கப்பட்ட மகளிர் வெற்றி பயணத் திட்டத்தின் தொடக்க நாளிலேயே பெண் பயணியிடம் நடத்துனர் டிக்கெட் வாங்கியது அந்தப் பகுதியில் சிறிது நேரம் பரபரப்பை ஏற்படுத்தியது.

​இச்சம்பவம் குறித்து செய்தியாளர் அரசு போக்குவரத்து பணிமனை மேலாளரைத் தொலைபேசி மூலம் தொடர்புகொண்டு கேட்டபோது, "முதல்வர் திட்டத்தைத் தொடங்கி வைப்பதற்கு முன்னால் டிக்கெட் வாங்கியிருப்பார்" என மேலாளர் மழுப்பலாகப் பதிலளித்தார்.

​ஆனால், முதல்வர் காலையில் திட்டத்தைத் தொடங்கி வைத்த நிலையில், அந்தத் டிக்கெட் மதியம் 11:47 மணிக்குக் கொடுக்கப்பட்டதைச் சுட்டிக்காட்டி செய்தியாளர் மீண்டும் கேள்வி எழுப்ப முயன்றார். அப்போது, மேலாளர் எந்தவிதப் பதிலும் அளிக்காமல் தொலைபேசியைத் துண்டித்துவிட்டு தனது செல்போனை 'ஸ்விட்ச் ஆஃப்' (Switch off) செய்துவிட்டார்.

​அரசின் திட்டங்களை முறையாகப் பொதுமக்களுக்குக் கொண்டு சேர்க்கும் நடவடிக்கைகளில் சம்பந்தப்பட்ட அதிகாரிகள் தீவிரமாக ஈடுபட வேண்டும் என்றும், போக்குவரத்துத் துறை அதிகாரிகள் உரிய விசாரணை மேற்கொண்டு அரசின் உத்தரவுகளைப் பின்பற்றாத பணியாளர்கள் மீது துறை ரீதியாக நடவடிக்கை எடுக்க வேண்டும் என்றும் பொதுமக்கள் வேண்டுகோள் விடுத்துள்ளனர்.

இதையும் படிங்க: விசிலுக்கு ஓட்டுப் போடுங்க..! டீக்கடையில் முதியோருடன் கலந்துரையாடிய CM விஜய்..!!