முதல்வர் ஸ்டாலினின் மருமகன் சபரீசன், தவெக தலைவர் விஜய்யை கடுமையாக விமர்சித்துள்ளார். “தமிழக வெற்றிக் கழகத்தால் தி.மு.க. வெற்றிக்கு எந்த பாதிப்பும் ஏற்படாது. விஜய் இரண்டு தொகுதிகளில் போட்டியிடுவது அவரது அவநம்பிக்கையை வெளிப்படுத்துகிறது” என்று அவர் தெரிவித்தார். 

வில்லிவாக்கம் தொகுதியில் தி.மு.க. சார்பில் போட்டியிடும் வேட்பாளர் கார்த்திக் மோகன் தீவிர பிரசாரத்தில் ஈடுபட்டு வருகிறார். நேற்று தொகுதிக்குட்பட்ட குடியிருப்போர் நலச் சங்கத் தலைவர்களுடன் ஆதரவு கேட்கும் கூட்டம் வில்லிவாக்கம் சிட்கோ நகரில் உள்ள தனியார் மண்டபத்தில் நடைபெற்றது. 

இந்தக் கூட்டத்தில் முதல்வர் ஸ்டாலினின் மருமகனும், வேட்பாளர் கார்த்திக்கின் நண்பருமான சபரீசன் தனது மனைவி செந்தாமரையுடன் திடீரென வந்தார். கூட்டத்தில் பேசிய சபரீசன், “கார்த்தி என் நண்பர். அவரை நீங்கள் என்னை வேட்பாளராக நினைத்து ஆதரவு கொடுங்கள். அவரை வெற்றி பெறச் செய்தால், உங்கள் தொகுதிக்குத் தேவையான அனைத்து வேலைகளையும் அவர் செய்து தருவார். அதற்கு நான் கியாரன்டி” என்று உறுதியளித்தார்.

இதையும் படிங்க: என்ன விஜய்?!! இப்படிப்பண்ணா எப்படி? பெரம்பூரில் பூட்டிக் கிடக்கும் தவெக அலுவலகம்!!

பின்னர் அளித்த பேட்டியில் சபரீசன் கூறியதாவது: “தி.மு.க. ஆட்சி தொடரும். கடந்த ஐந்தாண்டுகளில் மக்கள் விரும்பும் பல மக்கள் நலத் திட்டங்களை செயல்படுத்தியுள்ளோம். எனவே தி.மு.க.வுக்கு பெரிய வெற்றி கிடைக்கும். தமிழகத்தில் இப்போது பிரதான எதிர்க்கட்சி என்று எதுவும் இல்லை. அரசியலில் புதிதாக வந்த தவெகவால் தி.மு.க.வுக்கு எந்தப் பாதிப்பும் ஏற்படாது.

விஜய் இரண்டு தொகுதிகளில் போட்டியிடுவது ஒரு தலைவரின் அவநம்பிக்கையைத்தான் காட்டுகிறது” என்றார். சபரீசனின் இந்தக் கருத்து தேர்தல் களத்தில் பரபரப்பை ஏற்படுத்தியுள்ளது. தி.மு.க. தரப்பில் தவெகவை குறைத்து மதிப்பிடும் போக்கு அதிகரித்து வரும் நிலையில், முதல்வரின் மருமகன் நேரடியாக விஜய்யை விமர்சித்திருப்பது கவனத்தை ஈர்த்துள்ளது.

வில்லிவாக்கம் தொகுதியில் தி.மு.க. வெற்றி பெறும் நம்பிக்கையில் சபரீசன் வாக்குறுதி அளித்துள்ளார். தி.மு.க. கூட்டணி வலுவாக உள்ளதாகவும், எதிர்க்கட்சிகளால் ஆட்சியை பாதிக்க முடியாது என்றும் அவர் நம்பிக்கை தெரிவித்தார்.

இதையும் படிங்க: விஜய் ஏமாத்திட்டா என்ன? நம்ம அஜித் இருக்காரே!! அதிமுக புதிய ப்ளான்! எடப்பாடியாருக்கு ஏக குஷி!