நடிகர் விஜய்யின் "ஜனநாயகன்" (Jana Nayagan) திரைப்படம் இணையத்தில் சட்டவிரோதமாகக் கசிந்த விவகாரத்தில், தமிழகச் சைபர் கிரைம் போலீசார் அதிரடி நடவடிக்கையில் இறங்கியுள்ளனர். படத்தை லீக் செய்த முக்கிய இணையதளங்கள் மற்றும் சமூக வலைதளப் பக்கங்களை முடக்கிப் போலீசார் உத்தரவிட்டுள்ளனர்.

படம் கசிந்த உடனேயே KVN புரொடக்ஷன்ஸ் மற்றும் திரையுலகப் பிரபலங்கள் கொடுத்த புகாரின் அடிப்படையில், சைபர் கிரைம் போலீசார் தீவிரக் கண்காணிப்பில் ஈடுபட்டனர். படத்தின் முழுப் பகுதியையும், முக்கியக் காட்சிகளையும் பதிவேற்றியிருந்த பல பைரசி இணையதளங்கள் (Piracy Websites) கண்டறியப்பட்டு உடனடியாக முடக்கப்பட்டுள்ளன.

சமீபகாலமாகப் படங்கள் கசிவதற்கு முக்கியக் காரணமாக இருக்கும் டெலிகிராம் (Telegram) செயலியில் இயங்கி வந்த பல சேனல்களைப் போலீசார் முடக்கியுள்ளனர். அதுமட்டுமின்றி, பேஸ்புக், எக்ஸ் (X) மற்றும் இன்ஸ்டாகிராம் போன்ற தளங்களில் படத்தின் வீடியோக்களைப் பகிர்ந்த கணக்குகளும் முடக்கப்பட்டு வருகின்றன.

இதையும் படிங்க: "ஜனநாயகன்" பட விவகாரம்: வதந்திகளுக்கு முற்றுப்புள்ளி வைத்த சென்சார் போர்டு!

படத்தை முதலில் கசியவிட்டது யார்? என்பது குறித்துப் போலீசார் தடயவியல் (Forensic) சோதனைகளை மேற்கொண்டு வருகின்றனர். தற்போது இணையதளங்கள் முடக்கப்பட்டுள்ளன. அடுத்தகட்டமாக இந்தப் பதிவேற்றங்களுக்குப் பின்னால் இருக்கும் நபர்களைக் கண்டறிந்து கைது செய்யும் பணி நடைபெற்று வருகிறது எனப் போலீஸ் தரப்பில் தெரிவிக்கப்பட்டுள்ளது.

முன்னதாக, இந்தப் படம் கசிந்தது குறித்துச் சூப்பர் ஸ்டார் ரஜினிகாந்த் கவலை தெரிவித்ததோடு, அரசு கடுமையான தண்டனை வழங்க வேண்டும் என வலியுறுத்தியிருந்தார். தற்போது போலீசாரின் இந்தத் துரித நடவடிக்கை படக்குழுவினருக்குச் சற்று நிம்மதியை அளித்துள்ளது.

"ஜனநாயகன்" திரைப்படம் பெரும் பொருட்செலவில் உருவானது என்பதால், பொதுமக்கள் யாரும் திருட்டுத்தனமாகப் படத்தைப் பார்க்க வேண்டாம் என்றும், திரையரங்குகளில் வெளியாகும் வரை காத்திருக்குமாறும் படக்குழுவினர் மீண்டும் ஒருமுறை வேண்டுகோள் விடுத்துள்ளனர்.

இதையும் படிங்க: ஜனநாயகன் கசிவை அரசியலாக்காதே! தவெக-விற்கு சரத்குமார் கண்டனம்!