தமிழ்நாடு அரசுப் பணியாளர் தேர்வாணையம் நடத்தும் தொகுதி-4 தேர்வில் இருபது இலட்சத்திற்கும் மேற்பட்ட இளைஞர்கள் களம் காணும் நிலையில், வெறும் சில ஆயிரம் பணியிடங்களை மட்டுமே அறிவிப்பது நியாயமல்ல என தமிழக வாழ்வுரிமைக் கட்சித் தலைவர் தி.வேல்முருகன் கடுமையாக விமர்சித்துள்ளார்.தமிழ்நாட்டில் அரசுப் பணிக்காக இலட்சக்கணக்கான இளைஞர்கள் அல்லும் பகலும் கண்விழித்துப் படித்துக் காத்திருக்கும் சூழலில், அறிவிக்கப்படும் பணியிடங்களின் எண்ணிக்கை அவர்களின் உழைப்புக்கும் வாழ்வாதாரத் தேவைக்கும் ஏற்ப கணிசமாக உயர்த்தப்பட வேண்டும் என அவர் வலியுறுத்தினார்.

படித்த இளைஞர்களின் எண்ணிக்கையும் தேர்வெழுதுவோரின் கூட்டமும் ஆண்டுதோறும் புதிய உச்சத்தைத் தொடும் வேளையில், பணியிடங்களைக் குறைப்பது எந்த வகையிலும் நியாயமானது அல்ல என்றும் அவர் சுட்டிக்காட்டினார்.பல்வேறு அரசுத் துறைகளில் பல்லாயிரக்கணக்கான பணியிடங்கள் நீண்டகாலமாகக் காலியாகக் கிடக்கும்போது, அவற்றை முழுமையாகக் கணக்கெடுத்து நிரப்பத் தயங்குவது ஏன் என கேள்வி எழுப்பினார். குடும்ப வறுமைக்கும் பொருளாதார நெருக்கடிக்கும் நடுவே பல ஆண்டுகள் தவம் கிடக்கும் எளிய பின்னணி கொண்ட இளைஞர்களின் உழைப்புக்கு அரசு சொல்லும் விடை இதுதானா எனவும் அவர் கேட்டார்.

அரசு இயந்திரம் தொய்வின்றி இயங்கவும் மக்களுக்குச் சேவைகள் தடையின்றிச் சேரவும் ஆட்கள் தேவைப்படும்போது, புதிய நியமனங்களை ஒத்திப்போடுவது யாருடைய நலனுக்காக என்றும் கேள்வி எழுப்பினார்.ஆண்டுதோறும் தேர்வுக்கான கால அட்டவணையை வெளியிட்டு, சொன்ன தேதியில் தேர்வு முடிவுகளையும் பணி நியமனங்களையும் வழங்கிட இன்னும் எத்தனை காலம் காத்திருக்க வேண்டும் என அவர் வருத்தம் தெரிவித்தார். இளைஞர்களின் எதிர்காலக் கனவுகளை வெறும் தேர்வுப் படிவங்களோடு சுருக்கிவிடாமல், உண்மையான வேலைவாய்ப்பாக மாற்றிக் காட்ட அரசு ஏன் தயங்குகிறது எனவும் கேட்டார்.தமிழ்நாட்டின் கிராமப்புற மற்றும் அடித்தட்டு குடும்பங்களைச் சேர்ந்த எளிய தேர்வர்களுக்கு, அரசுப் பணி என்ற பெருங்கனவை நனவாக்கும் முதன்மையான நுழைவு வாயிலாகத் தொகுதி-4 தேர்வே திகழ்கிறது என அவர் குறிப்பிட்டார்.

இதையும் படிங்க: காவல்துறையில் காலி பணியிடங்கள்... ஏன் தாமதம்.? தேர்வெழுதி காத்திருக்கும் அவலம்.. வேல்முருகன் காட்டம்..!

எனவே, அரசுத் துறைகளில் உள்ள அனைத்துக் காலிப் பணியிடங்களையும் வெளிப்படைத்தன்மையுடன் முழுமையாகக் கணக்கெடுத்து, உடனடியாக இந்த ஆட்சேர்ப்பில் கூடுதல் பணியிடங்களாக இணைக்க வேண்டும் என வலியுறுத்தினார்.இளைஞர்களின் நீண்டகால எதிர்பார்ப்பைக் கருத்தில் கொண்டு, குறைந்தபட்சம் 15,000 தொகுதி-4 பணியிடங்களையாவது நிரப்ப தமிழ்நாடு அரசு போர்க்கால அடிப்படையில் நடவடிக்கை எடுக்க வேண்டும் என தமிழக வாழ்வுரிமைக் கட்சியின் சார்பில் அவர் கேட்டுக்கொண்டார்.

இதையும் படிங்க: சீறிப்பாய்ந்த காரை மடக்கிய சிங்கம்: துணிச்சல் காவலர் வேல்முருகனுக்கு முதல்வர் விஜய் நேரில் பாராட்டு!