தமிழ்நாட்டின் அரசியல் களத்தில் இன்று ஒரு முக்கியமான நிகழ்வு நடைபெற்றது. அதிமுகவின் முன்னாள் அமைச்சரும், ஓ.பன்னீர்செல்வம் அணியின் முன்னணி ஆதரவாளருமான வெல்லமண்டி என். நடராஜன், தமிழக வெற்றி கழகம் கட்சியில் இணைந்தார். தவெக பொதுச் செயலாளர் என்.ஆனந்த் முன்னிலையில் இந்த இணைப்பு நிகழ்ந்தது. இந்த நடவடிக்கை தமிழ்நாட்டு அரசியலில் புதிய கூட்டணி மற்றும் சக்தி மாற்றங்களுக்கு வழி வகுக்கும் என எதிர்பார்க்கப்படுகிறது. 

வெல்லமண்டி நடராஜன் தமிழ்நாடு அரசியலில் நீண்டகால அனுபவம் கொண்டவர். 2016 சட்டமன்றத் தேர்தலில் திருச்சி கிழக்கு தொகுதியிலிருந்து அதிமுக சார்பில் போட்டியிட்டு வெற்றி பெற்ற அவர், ஜெயலலிதா அமைச்சரவையில் சுற்றுலாத் துறை அமைச்சராகப் பொறுப்பேற்றார். அதிமுகவில் மாவட்டச் செயலராக பல முறை பணியாற்றிய அவர், கட்சியின் அவைத் தலைவராகவும் 16 ஆண்டுகள் செயல்பட்டுள்ளார். ஜெயலலிதாவால் வளர்க்கப்பட்ட தலைவர்களில் ஒருவராக அவர் தன்னை அடையாளப்படுத்திக் கொண்டவர்.

அதிமுகவில் ஓபிஎஸ் - இபிஎஸ் இடையே மோதல் ஏற்பட்டபோது, ஓபிஎஸ் அணியில் உறுதியாக நின்ற வெல்லமண்டி நடராஜன் கட்சியிலிருந்து நீக்கப்பட்டார். அதன்பின் ஓபிஎஸ் உடன் இணைந்து செயல்பட்டார். 2026 பிப்ரவரியில் ஓபிஎஸ் திடீரென திமுகவில் இணைந்தபோது, வெல்லமண்டி நடராஜன் திமுகவுக்கு செல்ல மறுத்து, அதிமுக பொதுச் செயலாளர் எடப்பாடி பழனிசாமியை சந்தித்து மீண்டும் அதிமுகவில் இணைந்தார். அப்போது அவருக்கு அமைப்புச் செயலாளர் பொறுப்பும் வழங்கப்பட்டது. “ஜெயலலிதாவால் வளர்க்கப்பட்ட என்னால் திமுகவில் பயணிக்க முடியாது” என்று அவர் அப்போது வெளிப்படையாகக் கூறினார்

இதையும் படிங்க: எந்த மேதை குடுத்த ஐடியா தெரில… பயிர்க்கடன் தள்ளுபடி விவகாரம்.. சாடிய O.S. மணியன்..!!

இந்நிலையில், அவர் தமிழக வெற்றிக் கழகத்தில் இணைந்தார். தவெக, 2024 பிப்ரவரியில் நடிகர் விஜய் தொடங்கிய புதிய கட்சி. 2026 தமிழ்நாடு சட்டமன்றத் தேர்தலில் குறிப்பிடத்தக்க வெற்றியைப் பெற்று, புதிய அரசியல் சக்தியாக உருவெடுத்துள்ளது. வெல்லமண்டி நடராஜன் போன்ற அனுபவம் மிக்க தலைவரின் வருகை, தவெகவுக்கு கூடுதல் வலு சேர்க்கும் எனக் கூறப்படுகிறது.

இதையும் படிங்க: "எங்களுக்குள் பிளவு இல்லை"..! அதிமுகவில் ஒற்றுமை தான்... S.P. வேலுமணி உறுதி..!