தமிழக வெற்றிக் கழகத் தலைவர் விஜய் மேற்கொண்டு வரும் தொடர் ஆன்மீகப் பயணங்கள் குறித்து பாஜகவின் மூத்த தலைவரும், முன்னாள் ஆளுநருமான தமிழிசை சௌந்தரராஜன் கடுமையான விமர்சனங்களை முன்வைத்துள்ளார். விஜய்யின் இந்தப் பயணம் ஆன்மீகத் தேடல் அல்ல, அடுத்த படத்திற்கான இடத்தைத் தேடும் (Location Scouting) வேலை என அவர் கிண்டல் செய்துள்ளார்.

விஜய் நாளை சீரடி செல்லவிருப்பது குறித்துச் செய்தியாளர்கள் கேட்ட கேள்விக்குப் பதிலளித்த தமிழிசை, "தமிழக வெற்றிக் கழகத் தலைவர் விஜய் தற்போது மேற்கொண்டு வரும் ஆன்மீகப் பயணங்கள் எல்லாம் வெறும் கண்துடைப்பு. அவர் ஆன்மீகத் தேடலுக்குச் செல்கிறேன் என்று சொல்லிவிட்டு, உண்மையில் தனது அடுத்த திரைப்படப் படப்பிடிப்பிற்காக இடம் தேடச் செல்கிறார். வாக்கு எண்ணிக்கை நடைபெறும் மே 4-ஆம் தேதி வரை அவர் என்ன வேண்டுமானாலும் கனவு காணட்டும்; அதன் பிறகு உண்மை நிலவரம் அவருக்குப் புரியும்" எனத் தெரிவித்தார்.

தொடர்ந்து விஜய்யின் தேர்தல் பிரசார யுக்திகள் குறித்தும் தமிழிசை தனது அதிருப்தியைப் பதிவு செய்தார். "விஜய் ஒரு நல்ல நடிகராக இருக்கலாம், அதில் எனக்கு மாற்றுக்கருத்து இல்லை. ஆனால், குழந்தைகளை வைத்து அவர்களது பெற்றோர்களிடம் வாக்குச் செலுத்தச் சொல்வது மிகவும் தவறான முன்னுதாரணம். குழந்தைகள் படிக்க வேண்டியவர்கள்; அவர்களின் பிஞ்சு மனதில் இப்போதே அரசியலையும், தவறான எண்ணங்களையும் விதைக்கக் கூடாது. இது ஆரோக்கியமான அரசியல் கிடையாது" என்று அவர் ஆவேசமாகத் தெரிவித்தார்.

இதையும் படிங்க: "நமது வாக்கு - நமது உரிமை".. ஜனநாயகக் கடமை ஆற்றுவதைத் தவிர்க்காதீர்..!! தவெக தலைவர் விஜய் வேண்டுகோள்..!!

2026 சட்டமன்றத் தேர்தல் முடிவுகள் வெளியாக இன்னும் சில நாட்களே உள்ள நிலையில், விஜய்யின் ஒவ்வொரு நகர்வையும் பாஜக உள்ளிட்ட பிற கட்சியினர் உன்னிப்பாகக் கவனிப்பதோடு, கடுமையான விமர்சனங்களையும் முன்வைத்து வருவது தமிழக அரசியலில் அனலைப் பறக்க விட்டுள்ளது. விஜய்யின் ஆன்மீகப் பயணங்கள் உண்மையானவையா அல்லது அரசியல் வியூகமா என்ற விவாதம் தற்போது பொதுமக்களிடையே எழுந்துள்ளது.

இதையும் படிங்க: கொங்கு மண்டலத்தில் மாஸ் என்ட்ரி கொடுக்கும் விஜய்..!! அவினாசி, பெருமாநல்லூரில் இன்று அனல் பறக்க பிரச்சாரம்..!!