சென்னை: கொளத்தூர் தொகுதியில் தோல்வியடைந்த திமுக தலைவர் மு.க.ஸ்டாலின், வரும் இடைத்தேர்தலில் மீண்டும் சட்டசபைக்கு வருவாரா என்பது தற்போது தமிழக அரசியலில் பெரும் பேச்சாக உள்ளது.

கொளத்தூரில் தொடர்ந்து மூன்று முறை வெற்றி பெற்ற ஸ்டாலின், இம்முறை த.வெ.க.வின் வி.எஸ்.பாபுவிடம் தோற்றுப் போனது திமுக தலைவர்களை அதிர்ச்சியில் ஆழ்த்தியது. முதலமைச்சராக இருந்தபோதே அவர் தோற்றது கட்சிக்கு பெரும் அதிர்ச்சியாக அமைந்தது. திமுகவினர் ஸ்டாலினை மீண்டும் சட்டசபைக்கு அனுப்ப வேண்டும் என விரும்புகின்றனர்.

அண்மையில் மூத்த தலைவர் கே.என்.நேரு உள்ளிட்டோர் ஸ்டாலின் இடைத்தேர்தலில் போட்டியிட வேண்டும் என வெளிப்படையாக விருப்பம் தெரிவித்தனர். குறிப்பாக திருச்சி கிழக்கு தொகுதியில் ஸ்டாலின் களமிறங்க வேண்டும் என அவர்கள் கூறுகின்றனர். ஆனால் அரசியல் நிபுணர்கள் இதற்கு வாய்ப்பு குறைவு என்கின்றனர்.

இதையும் படிங்க: விட்டு விலகிய வைகோ! வேட்டு வைத்த மு.க.ஸ்டாலின்!! அடுத்தடுத்து விழும் விக்கெட்டுகள்!

2026 சட்டசபைத் தேர்தலில் திமுக பெரும்பான்மை பெறும் என நம்பியிருந்த நிலையில், த.வெ.க. 108 இடங்களில் வெற்றி பெற்று தனிப்பெரும் கட்சியாக ஆட்சியமைத்தது. இந்த தோல்வியை திமுகவினால் இன்னும் ஜீரணிக்க முடியவில்லை. முதலமைச்சர் விஜய் சட்டசபையில் “உங்கள் அப்பா எங்கே?” என கேட்ட கிண்டல் திமுகவினரை கோபப்படுத்தியுள்ளது.

இடைத்தேர்தலில் ஆளுங்கட்சிக்கு சாதகமான சூழல் இருப்பதால், ஸ்டாலின் போட்டியிட்டால் தோற்றால் அது பெரும் அவமானமாக மாறிவிடும் என அரசியல் விமர்சகர்கள் எச்சரிக்கின்றனர்

. ஜெயித்தாலும் “ஒரு எம்.எல்.ஏ. பதவிதானே” என்கிற நிலை ஏற்படும். மேலும் உதயநிதி ஸ்டாலின் ஏற்கெனவே எதிர்க்கட்சித் தலைவராக செயல்பட்டு வரும் நிலையில், ஸ்டாலின் உள்ளே வந்தால் தலைமைப் பொறுப்பில் குழப்பம் ஏற்படும் என்றும் கூறப்படுகிறது.

ஸ்டாலின் தேர்தலில் நேரடியாகக் களமிறங்காமல், கட்சித் தலைவராக வெளியில் இருந்து இடைத்தேர்தல் வியூகத்தை வகுப்பதே சிறந்தது என்பது பலரின் கருத்து. ஸ்டாலின் இதுவரை இடைத்தேர்தலில் போட்டியிடுவதாக எந்த அறிவிப்பும் வெளியிடவில்லை.

திமுகவினரின் ஆவலுக்கு மத்தியில் ஸ்டாலினின் அடுத்த நகர்வு என்னவாக இருக்கும் என அரசியல் களம் ஆவலுடன் எதிர்பார்த்துள்ளது.

இதையும் படிங்க: திருச்சி கிழக்கில் மு.க.ஸ்டாலின் போட்டி கன்பார்ம்! தவெகவுக்கு டஃப் கொடுக்க தயாராகும் திமுக!!