மாருதி சுசுகியின் புதிய பிரெஸ்ஸா மாடல் மீதான தேவை கணிசமாக உயர்ந்துள்ளதால், நிறுவனம் உற்பத்தியை விரைவுபடுத்த தீவிர நடவடிக்கைகளை மேற்கொண்டுள்ளது. குறிப்பாக சிஎன்ஜி வகைகளுக்கான ஆர்டர்கள் அதிகரித்து வருவதால், விநியோகத்தை சீராக்கும் நோக்கில் கார்கோடா உள்ளிட்ட புதிய தொழிற்சாலைகளில் உற்பத்தி அளவு உயர்த்தப்பட்டு வருகிறது. 

தற்போது நிறுவனத்தின் மொத்த நிலுவை ஆர்டர்கள் இரண்டு லட்சத்தைத் தாண்டியுள்ளன. இதில் பிரெஸ்ஸா மட்டும் சுமார் 95,000 ஆர்டர்களைக் கொண்டுள்ளது. விரைவில் இது ஒரு லட்சத்தை எட்டும் என எதிர்பார்க்கப்படுகிறது. செப்டம்பர் மாதத்தில் மட்டும் 15,000-க்கும் மேற்பட்ட பிரெஸ்ஸா கார்கள் விநியோகிக்கப்பட்டன.

புதிய பிரெஸ்ஸாவில் 1.0 லிட்டர் பூஸ்டர்ஜெட் டர்போ என்ஜின் அறிமுகப்படுத்தப்பட்டுள்ளது. இது சுமார் 108-110 பிஹெச்பி சக்தியும் 170 நியூட்டன் மீட்டர் முறுக்குத் திறனும் வழங்குகிறது. அதே என்ஜினைப் பயன்படுத்தும் ஃபிரான்ஸ்க்ஸ் மாடல் 99-100 பிஹெச்பி மற்றும் 147 நியூட்டன் மீட்டர் திறனுடன் இயங்குகிறது. எனவே பிரெஸ்ஸா அதிக செயல்திறன் கொண்டதாகத் தெரிகிறது. இருப்பினும், வாடிக்கையாளர்களிடையே சிஎன்ஜி வகைதான் முதன்மைத் தேர்வாகத் திகழ்கிறது. 

இதையும் படிங்க: புதிய வேரியண்ட்களுடன் கியா கேரன்ஸ் கிளாவிஸ்!! விலை மற்றும் சிறப்பம்சங்கள் இதோ..!!

ஆர்டர்களில் சுமார் 40 சதவீதம் அண்டர் பாடி சிஎன்ஜி மாடல்களுக்கும், 38 சதவீதம் டர்போ வகைக்கும், மீதம் 1.5 லிட்டர் பெட்ரோல் மாடலுக்கும் உள்ளன.விக்டோரிஸ் மாடலுக்குப் பிறகு பிரெஸ்ஸாவில் அறிமுகப்படுத்தப்பட்ட அண்டர்ஃப்ளோர் சிஎன்ஜி டேங்க், பூட் இடத்தை முழுமையாகப் பாதுகாக்கிறது. இதனால் 328 லிட்டர் சேமிப்பு இடம் கிடைக்கிறது. இது குடும்பப் பயனாளர்களுக்கு மிகவும் பயனுள்ளதாக அமைகிறது. 

புதிய அம்சங்களாக ஆக்டிவ் கூலிங்குடன் கூடிய வயர்லெஸ் சார்ஜிங் பேட், எலக்ட்ரிக் சன்ரூஃப், மேம்படுத்தப்பட்ட எச்.வி.ஏ.சி கட்டுப்பாடு மற்றும் இரண்டாம் வரிசை ஹெட்ரெஸ்ட்கள் இடம்பெற்றுள்ளன. சுசுகி ஜப்பான் 100 கிலோ எடை குறைப்பு இலக்கின் ஒரு பகுதியாக உலோக சிஎன்ஜி டேங்கிற்குப் பதிலாக ரெசின் டேங்கை அறிமுகப்படுத்தத் திட்டமிட்டுள்ளது. 

இதனால் சுமார் 40 கிலோ எடை குறையும். இது எரிபொருள் திறனையும் மேம்படுத்தும். திருவிழாக் காலத் தேவையை எதிர்கொள்ள மாருதி தொடர்ந்து உற்பத்தியை அதிகரித்து வருகிறது.
 

இதையும் படிங்க: ஒருமுறை சார்ஜ் செய்தால் 669 கி.மீ.! BMW-ன் புதிய கார் அறிமுகம்..!! விலை என்ன?