தமிழ் சினிமாவின் வரலாற்றை இரண்டு காலகட்டங்களாகப் பிரித்துப் பார்க்க வேண்டிய நிலையை உருவாக்கிய இயக்குநர்களில் மிக முக்கியமான பெயர் பாரதிராஜா. கிராமிய வாழ்க்கையின் மண்வாசனையையும், மனித உறவுகளின் நுட்பமான உணர்வுகளையும், தமிழ் மண்ணின் இயற்கை அழகையும் வெள்ளித்திரையில் உயிரோட்டத்துடன் பதிவு செய்த கலைஞராக அவர் போற்றப்பட்டார். இன்று அவர் உடலால் நம்மிடையே இல்லாவிட்டாலும், அவர் உருவாக்கிய திரைப்படங்களும், அவர் விட்டுச் சென்ற கலை மரபும் தலைமுறைகளைத் தாண்டி வாழும் என்பதில் சந்தேகமில்லை.

இயக்குநர் இமயம் என்று ரசிகர்களாலும் திரையுலகினராலும் அன்புடன் அழைக்கப்பட்ட பாரதிராஜாவின் மறைவு, தமிழ் திரையுலகை மட்டுமல்லாமல் ஒட்டுமொத்த தமிழகத்தையும் சோகத்தில் ஆழ்த்தியுள்ளது. அவரது மறைவுக்குப் பிறகு சென்னை முதல் தேனி வரை கண்ணீர் அஞ்சலிகளும், நினைவுகளும், உணர்ச்சிகரமான நிகழ்வுகளும் தொடர்ந்தன. ஆனால் அந்த அனைத்தையும் தாண்டி மக்களின் மனதை நெகிழச்செய்த ஒரு விஷயம் இருந்தது. அது, “நான் இறந்த பிறகு என்னை என் சொந்த மண்ணில்தான் அடக்கம் செய்ய வேண்டும்” என்ற அவரது கடைசி ஆசை.

தேனி மாவட்டத்தின் மண்ணில் பிறந்த சின்னச்சாமி என்ற இளைஞன், பின்னர் தமிழ் சினிமாவின் பாரதிராஜாவாக உயர்ந்தார். ஆனால் அந்த உயரம் அவரை தனது வேர்களிலிருந்து ஒருபோதும் பிரிக்கவில்லை என்பதுதான் இன்று பலராலும் பேசப்படுகிறது. குடும்பத்தின் மீது அளவற்ற பாசம் கொண்டவராக அறியப்பட்ட பாரதிராஜா, தனது இயற்பெயரான சின்னச்சாமியை மாற்றியபோது கூட குடும்ப உறவுகளை மறக்கவில்லை. தனது தங்கை பாரதி மற்றும் தம்பி ஜெயராஜ் ஆகியோரின் பெயர்களை இணைத்தே ‘பாரதிராஜா’ என்ற பெயரை தேர்வு செய்ததாக அவரது குடும்பத்தினர் பலமுறை கூறியுள்ளனர்.

இதையும் படிங்க: எந்தவொரு திறமையையும் ஊக்குவிக்க மறக்காதவர்..!! பாரதிராஜா மறைவு.. ஜி.வி.பிரகாஷ் புகழஞ்சலி..!

அந்த ஒரு சம்பவமே, குடும்பம் மீது அவர் வைத்திருந்த பாசத்தை வெளிப்படுத்துவதாக அவரது உறவினர்கள் நினைவுகூர்கின்றனர். தமிழ் சினிமாவில் கிராமம் என்பது ஒரு பின்னணி மட்டுமே என்ற பார்வையை மாற்றியவர் பாரதிராஜா. அவர் வந்த பிறகு கிராமமே கதாநாயகனாக மாறியது என்று கூறினாலும் அது மிகையாகாது. 1977-ஆம் ஆண்டு வெளியான 16 வயதினிலே திரைப்படம் தமிழ் சினிமாவில் ஒரு புரட்சியை ஏற்படுத்தியது. அதன்பிறகு அவர் இயக்கிய பல படங்கள் தென் மாவட்ட மக்களின் வாழ்க்கை, காதல், கலாசாரம், உறவுகள் மற்றும் சமூகச் சூழல்களை மிக இயல்பாக பதிவு செய்தன.

கிராம மக்களின் பேச்சு நடை, உடல் மொழி, வாழ்க்கை முறை, இயற்கைச் சூழல் ஆகியவற்றை அவர் திரையில் காட்டிய விதம், தமிழ் சினிமாவுக்கு புதிய அடையாளத்தை உருவாக்கியது. பாரதிராஜா பல ஆண்டுகளாக சென்னையில் வசித்து வந்தாலும், தனது சொந்த ஊருடனான பிணைப்பை ஒருபோதும் இழக்கவில்லை என்று அவரது நண்பர்களும் உறவினர்களும் கூறுகின்றனர். அடிக்கடி தேனி மாவட்டத்திற்கு சென்று உறவினர்களை சந்திப்பது, நண்பர்களுடன் நீண்ட நேரம் உரையாடுவது, பழைய நினைவுகளை பகிர்வது ஆகியவற்றில் அவர் அதிக ஆர்வம் கொண்டிருந்தார்.

பெரிய இயக்குநராக மாறிய பிறகும், தனது ஊருக்குச் செல்லும் போது சாதாரண மனிதராகவே பழகுவார் என்று கிராம மக்கள் நினைவுகூர்கின்றனர். பாரதிராஜாவின் வாழ்க்கையில் மிகப்பெரிய துயரங்களில் ஒன்று அவரது மகன் மனோஜின் மறைவு. அந்த இழப்பு அவரை மனதளவிலும் உடலளவிலும் பெரிதும் பாதித்ததாக நெருங்கிய நண்பர்கள் கூறுகின்றனர். மகன் மீது கொண்டிருந்த அளவற்ற பாசம் காரணமாக, அந்த இழப்பிலிருந்து முழுமையாக மீள முடியாமல் இருந்ததாகவும், அதன் பின்னர் அவரது உடல்நிலையும் மெதுவாக பாதிக்கத் தொடங்கியதாகவும் கூறப்படுகிறது.

அவரை நெருக்கமாக அறிந்த பலர், “மகனை இழந்த பிறகு பாரதிராஜாவின் மனநிலையில் பெரிய மாற்றம் ஏற்பட்டது” என்று நினைவுகூர்கின்றனர். உடல்நலக்குறைவு காரணமாக சிகிச்சை பெற்று வந்த காலத்தில், மலேசியாவில் வசித்து வந்த தனது மகள் ஜனனியுடன் அதிக நேரம் செலவிட்டதாக கூறப்படுகிறது. அந்த காலகட்டத்தில்தான் தனது வாழ்க்கையின் மிக முக்கியமான ஆசையை மகளிடம் வெளிப்படுத்தியுள்ளார். “அம்மா... நான் இறந்த பிறகு என்னை சென்னையில் அடக்கம் செய்ய வேண்டாம்.

என் சொந்த ஊரில்தான் நான் ஓய்வெடுக்க விரும்புகிறேன். தேனி மாவட்டம் வத்தலகுண்டு அருகே உள்ள காட்ரோடு பண்ணைத் தோட்டத்தில்தான் என் உடலை அடக்கம் செய்ய வேண்டும்,” என்று அவர் மகளிடம் கூறியதாக குடும்பத்தினர் தெரிவிக்கின்றனர். அதுமட்டுமல்லாமல், “நான் பிறந்த மண்ணில் என்னை அடக்கம் செய்தால், அது என் தாய் மடியில் உறங்குவது போன்ற உணர்வை தரும்” என்றும் அவர் உருக்கமாக கூறியதாக தெரிவிக்கப்படுகிறது. இந்த வார்த்தைகள் இன்று பலரது மனதையும் நெகிழச்செய்துள்ளன.

அந்த நேரத்தில் தனது தந்தையின் பேச்சைக் கேட்ட ஜனனி, “ஏன் அப்பா இப்போதே இப்படிப் பேசுகிறீர்கள்? எல்லாம் உங்கள் விருப்பப்படி நடக்கும்” என்று கூறியதாக குடும்பத்தினர் நினைவுகூர்கின்றனர். இன்று அந்த வாக்குறுதியை அவர் நிறைவேற்றியுள்ளார். பாரதிராஜாவின் உடல் சென்னையிலிருந்து தேனி மாவட்டத்திற்கு கொண்டு செல்லப்பட்டு, அவர் விரும்பிய அதே பண்ணைத் தோட்டத்தில் அரசு மரியாதையுடன் நல்லடக்கம் செய்யப்படுகிறது. பாரதிராஜாவின் உடல் சொந்த ஊருக்கு கொண்டு வரப்பட்டதும், ஆயிரக்கணக்கான மக்கள் அங்கு திரண்டனர். உறவினர்கள், நண்பர்கள், கிராம மக்கள், ரசிகர்கள், அரசியல் தலைவர்கள், திரையுலக பிரபலங்கள் என பல்வேறு தரப்பினரும் நேரில் வந்து அஞ்சலி செலுத்தினர்.

பொதுமக்கள் எளிதாக அஞ்சலி செலுத்தும் வகையில் தனி ஏற்பாடுகள் செய்யப்பட்டிருந்தன. முக்கிய பிரமுகர்களுக்காகவும், பொதுமக்களுக்காகவும் தனித்தனி வழிகள் அமைக்கப்பட்டிருந்தன. இயக்குநர்கள், நடிகர்கள், அரசியல் தலைவர்கள் என பலர் நேரில் வந்து அஞ்சலி செலுத்தினர். அவரது நீண்டகால நண்பரான வைரமுத்து, நடிகைகள் ராதிகா சரத்குமார், சுஹாசினி, நடிகர்கள் வடிவேலு, கருணாஸ் உள்ளிட்ட ஏராளமானோர் அஞ்சலி செலுத்தினர்.

பலர் அவருடன் பணியாற்றிய அனுபவங்களை நினைவுகூர்ந்து கண்ணீர் மல்க பேசினர். பாரதிராஜாவின் தங்கை பாரதி தனது சகோதரரை நினைவுகூர்ந்து பேசியபோது, “சிறுவயது முதலே குடும்பத்தின் மீது மிகுந்த அக்கறையும் பாசமும் கொண்டவராக இருந்தார். அவர் வெற்றி பெறும் போதெல்லாம் நாங்கள் பெருமைப்படுவோம். மக்கள் அவரைப் பற்றி பெருமையாக பேசும்போது எங்கள் மனம் மகிழ்ச்சியால் நிரம்பும். இன்று அவர் இல்லை என்பது எங்களால் ஏற்றுக்கொள்ள முடியாத பேரிழப்பு” என்று கண்ணீருடன் கூறினார்.

பெரும்பாலான திரைப்பிரபலங்கள் வாழ்க்கையின் பெரும்பகுதியை சென்னையில் கழித்து, அங்கேயே இறுதி ஓய்வு பெறுவது வழக்கமாக இருக்கும். ஆனால் பாரதிராஜா மட்டும் தனது வாழ்க்கை தொடங்கிய மண்ணுக்கே திரும்பிச் செல்ல விரும்பினார். அவரது கடைசி ஆசை நிறைவேறியுள்ள இந்த தருணம், அவர் தனது வேர்களை எவ்வளவு நேசித்தார் என்பதை மீண்டும் ஒருமுறை நினைவூட்டுகிறது.

தேனி மண்ணில் பிறந்து, தமிழ் சினிமாவை உலக அரங்கில் உயர்த்திய அந்த மகத்தான கலைஞர், இன்று மீண்டும் தனது சொந்த மண்ணின் அரவணைப்பில் நீண்ட உறக்கத்துக்கு சென்றுள்ளார். அவர் உருவாக்கிய திரைப்படங்கள், அவர் கண்ட கனவுகள், அவர் விதைத்த கலை மரபு என்றும் தமிழ் சினிமாவின் நினைவுகளில் நிலைத்திருக்கும். “மண்ணை மறக்காத மனிதன்” என்ற அடையாளத்துடன் பாரதிராஜா வரலாற்றின் பக்கங்களில் என்றும் வாழ்ந்து கொண்டே இருப்பார்.

இதையும் படிங்க: இயக்குநர் பாரதிராஜாவின் உடல் சொந்த ஊரில் அடக்கம்..!! நாளை அரசு மரியாதையுடன் நல்லடக்கம்.. குவியும் ரசிகர்கள்..!