பிரபல பட்டிமன்றப் பேச்சாளரும், பல திரைப்படங்களில் நடித்தும் கவனம் பெற்றவருமான ராஜா, அமெரிக்காவின் அட்லாண்டா நகரில் கடந்த பிப்ரவரி 3ஆம் தேதி நடைபெற்ற தமிழ்ச் சங்க நிகழ்ச்சியில் கலந்து கொண்டது சமீப நாட்களில் சர்ச்சையாக மாறியுள்ளது. தமிழர் திரளாக வசிக்கும் வெளிநாட்டு நகரங்களில் நடைபெறும் கலாச்சார நிகழ்ச்சிகளில் தவறாமல் பங்கேற்று வருபவராக அறியப்படும் ராஜா, அந்த நிகழ்ச்சியிலும் சிறப்பு விருந்தினராக கலந்துகொண்டார். ஆனால், நிகழ்ச்சிக்குப் பிறகு சமூக வலைதளங்களில் வெளியான ஒரு பதிவு, அவரைச் சுற்றி எதிர்ப்பையும் விவாதத்தையும் கிளப்பியுள்ளது.

அந்த நிகழ்ச்சியில் உணவு பரிமாறியிருந்த பெண்களிடம், ராஜா முதலில் அவர்கள் எந்த ஊரைச் சேர்ந்தவர்கள் என்று கேட்டதாகவும், பின்னர் சாதி குறித்து கேள்வி எழுப்பியதாகவும் குற்றச்சாட்டு முன்வைக்கப்பட்டது. சம்பந்தப்பட்ட பெண்ணின் சகோதரர் எனத் தெரிவித்த ஒருவர், சமூக வலைதளத்தில் இதுகுறித்து பதிவிட்டதன் மூலம் இந்த விவகாரம் வெளிச்சத்துக்கு வந்தது. அந்த பதிவு குறுகிய நேரத்திலேயே வைரலாகி, பலரும் அதனை பகிர்ந்தனர். சிலர் கடுமையான எதிர்ப்பையும் பதிவு செய்தனர்.

சமூக வலைதளங்களில் கருத்துக்கள் வேகமாக பரவியதையடுத்து, பட்டிமன்றப் பேச்சாளர் ராஜா மீது விமர்சனங்கள் அதிகரித்தன. குறிப்பாக சாதி சார்ந்த கேள்வி எழுப்பியதாக குற்றம் சாட்டப்பட்டதால், பலரும் விளக்கம் கோரினர். இந்த சூழ்நிலையில், ராஜா தானாக முன்வந்து வீடியோ ஒன்றை வெளியிட்டு தனது விளக்கத்தை அளித்துள்ளார்.

இதையும் படிங்க: KGF பார்த்து இருக்கீங்களா.. அதை விட பயங்கரமாக இருக்கும்..! 'பிச்சைக்காரன் 3' குறித்து அப்டேட் கொடுத்த விஜய் ஆண்டனி..!

அந்த வீடியோவில் ராஜா பேசுகையில், “அந்த நிகழ்ச்சியில் பரிமாறிய உணவு மிகவும் ருசியாக இருந்தது. அதனால் அது செட்டிநாட்டு முறைப்படி சமைக்கப்பட்டதா என்பதை அறியவே ‘செட்டிநாடா?’ என்று கேட்டேன். மற்றபடி ‘செட்டியாரா?’ என்று சாதி ரீதியாக நான் கேட்கவில்லை. ஒருவர் என்ன சமூகம் என்பதை யோசிக்கும் அளவுக்கு சின்ன புத்தி எனக்கு இல்லை.

தமிழ்நாட்டில் எத்தனையோ பகுதிகளுக்கு சென்று ஆயிரக்கணக்கான மக்களை சந்தித்திருக்கிறேன். யாரையாவது சாதி, சமய உணர்வுகளோடு பார்த்திருந்திருப்பேனா? ‘தமிழன்’ என்ற ஒன்றைத்தான் நான் பெருமையாக கருதுகிறேன். உண்மையில் மிகவும் மனவலியுடன் இதை பேசுகிறேன். எந்த காலத்திலும் நான் அப்படி இருந்ததில்லை,” என்று அவர் கூறியுள்ளார்.

ராஜாவின் இந்த விளக்கம் வெளியானதையடுத்து, அவருக்கு ஆதரவாகவும் எதிராகவும் கருத்துக்கள் தொடர்ந்து வெளியாகி வருகின்றன. சிலர், அவரது விளக்கம் நம்பத்தகுந்ததாக உள்ளது என கூறியுள்ளார்கள். மற்றவர்கள், நிகழ்வின் முழு உண்மை வெளிவர வேண்டும் என வலியுறுத்துகின்றனர். இந்த நிலையில், தமிழ் பட்டிமன்ற உலகின் மூத்த நடுவரும், கல்வியாளருமான சாலமன் பாப்பையா, ராஜாவுக்கு ஆதரவாக வீடியோ ஒன்றை வெளியிட்டுள்ளார். அதில் அவர் பேசுகையில் “யாரோ ஒரு தாய் அறிந்தோ அறியாமலோ ராஜாவைப் பற்றி ஒரு தவறான கணிப்பில் இச்செய்தியை வெளியிட்டிருக்கிறார்.

ராஜா என்னுடைய பண்ணையிலே 45 ஆண்டுகளுக்கு மேலே இருக்கிறார்.  அவர் எப்படிப்பட்டவர் என்பது எனக்கு நன்றாகத் தெரியும். என்னுடைய பிள்ளை அது. நான் அங்கு இல்லாதபோது எதையும் உறுதிப்படுத்த முடியாது. ஆனால் அவருடைய மனசுக்குள்ளே சாதிய உணர்வோ, அதைப் பற்றிய சிந்தனையோ கொஞ்சமும் இல்லை என்பதை நான் ஆயிரம் முறை சத்தியம் செய்து சொல்லுவேன். அவரைப் பற்றி இப்படிச் சொன்னது மிகப்பெரிய வருத்தம்,” என்று தெரிவித்தார்.

சாலமன் பாப்பையாவின் இந்த ஆதரவு, பட்டிமன்ற வட்டாரங்களில் பெரும் தாக்கத்தை ஏற்படுத்தியுள்ளது. நீண்ட காலமாக ஒரே மேடையில் இணைந்து பணியாற்றிய உறவு, அவர்களுக்கிடையேயான நம்பிக்கை ஆகியவற்றை அவர் தனது கருத்தில் வெளிப்படுத்தியுள்ளார். சமூக வலைதளங்களில் எழும் குற்றச்சாட்டுகள் சில நேரங்களில் பெரிதாக பரவி விடுகின்றன.

குறிப்பாக சாதி, சமயம் போன்ற உணர்வுபூர்வமான விஷயங்கள் தொடர்பாக குற்றச்சாட்டு எழும்போது, அது உடனடியாகவே எதிர்ப்பை கிளப்புகிறது. இந்த விவகாரமும் அதற்கு விதிவிலக்காக இல்லை. அதேசமயம், எந்த ஒரு குற்றச்சாட்டும் உறுதிப்படுத்தப்படுவதற்கு முன் அதன் உண்மை நிலை தெளிவாக வெளிவர வேண்டும் என்பதும் முக்கியமான அம்சமாகும். ராஜா தனது விளக்கத்தை வழங்கியுள்ள நிலையில், சம்பந்தப்பட்ட தரப்பின் பதிலும் எதிர்பார்க்கப்படுகிறது.

மொத்தத்தில், அட்லாண்டாவில் நடைபெற்ற ஒரு நிகழ்ச்சியில் ஏற்பட்டதாக கூறப்படும் சம்பவம், சமூக வலைதளங்களின் வேகத்தால் பெரிய சர்ச்சையாக மாறியுள்ளது. ராஜா தனது விளக்கத்தை அளித்துள்ளதும், சாலமன் பாப்பையா ஆதரவாக கருத்து தெரிவித்திருப்பதும் இந்த விவகாரத்தில் புதிய திருப்பத்தை ஏற்படுத்தியுள்ளது. இந்நிலையில், உண்மை நிலை தெளிவாக வெளிவர வேண்டும் என்பதே பலரின் எதிர்பார்ப்பாக உள்ளது.

இதையும் படிங்க: Lovers-குள்ள சண்டை.. அதில் உடையுது மண்டை..! ஹைப்பை கிளப்பும் விஜய் ஆண்டனியின் "பூக்கி" பட டிரெய்லர் ரிலீஸ்..!