தமிழ், தெலுங்கு மற்றும் இந்தி என மூன்று மொழித் திரையுலகிலும் தனித்த அடையாளத்தை உருவாக்கி, இன்று பாலிவுட்டின் முக்கிய நடிகைகளில் ஒருவராக வலம் வருபவர் நடிகை டாப்ஸி பன்னு. கதாநாயகியாக மட்டுமல்லாமல், வித்தியாசமான கதாபாத்திரங்களை தேர்வு செய்து நடிப்பதன் மூலம் தனது தனித்துவத்தை நிரூபித்துள்ள டாப்ஸி, சமீபத்தில் அளித்த ஒரு நேர்காணலில் தனது திரைப்பயணத்தின் ஆரம்ப கால அனுபவங்களை வெளிப்படையாக பகிர்ந்துள்ளார்.
குறிப்பாக, தனது இயல்பான சுருள் முடி காரணமாக பல திரைப்பட வாய்ப்புகளை இழந்ததாக அவர் கூறியுள்ள கருத்துகள் தற்போது திரையுலக வட்டாரத்திலும் சமூக வலைதளங்களிலும் பெரும் விவாதத்தையும் கவனத்தையும் ஈர்த்துள்ளன. இப்படி இருக்க டாப்ஸி பன்னு, தென்னிந்திய சினிமா ரசிகர்களுக்கு ‘ஆடுகளம்’ திரைப்படத்தின் மூலம் அறிமுகமானவர். நடிகர் தனுஷ் நடிப்பில் வெளியான இந்த படம், தேசிய விருதுகள் உள்ளிட்ட பல விருதுகளை குவித்து விமர்சகர்களின் பாராட்டைப் பெற்றது. அந்த படத்தில் டாப்ஸி நடித்த கதாபாத்திரம் பெரிய அளவில் பேசப்படவில்லை என்றாலும், அவரது இயல்பான நடிப்பும், திரையில் தோன்றிய அழகும் ரசிகர்களின் கவனத்தை ஈர்த்தது. இதனைத் தொடர்ந்து, தமிழ் மற்றும் தெலுங்கு திரையுலகில் அவருக்கு தொடர்ச்சியான வாய்ப்புகள் கிடைத்தன.
ஆரம்பகட்டத்தில் டாப்ஸி, கமர்ஷியல் கதாநாயகி என்ற படிமத்திற்குள் அடங்காமல், தன்னுடைய தனித்துவத்தை காப்பாற்ற முயன்றவர். தமிழ், தெலுங்கு படங்களில் நடித்துக் கொண்டிருந்த போதே, இந்தி சினிமாவிலும் அவர் வாய்ப்புகளை தேடத் தொடங்கினார். பின்னர் பாலிவுட்டில் காலடி எடுத்து வைத்த டாப்ஸி, ‘பிங்க்’, ‘முல்க்’, ‘பட்லா ஹவுஸ்’, ‘தப்பாட்’ போன்ற படங்களின் மூலம் ஒரு வலிமையான நடிகை என்ற அடையாளத்தைப் பெற்றார். பெண்களை மையமாகக் கொண்ட கதைகளில் நடித்து, சமூக கருத்துகளை வலியுறுத்தும் படங்களில் தனது நடிப்புத் திறமையை நிரூபித்தார். இந்த நிலையில், சமீபத்தில் அவர் அளித்த ஒரு நேர்காணலில், தனது திரைப்பயணத்தின் ஆரம்ப நாட்களில் எதிர்கொண்ட சிக்கல்கள் குறித்து பேசினார்.
இதையும் படிங்க: சினிமா செட்டில் என்னை சுற்றிலும் ஆண்கள்..! கூசாமல் ஓபனாக கேப்பாங்க.. நடிகை ராதிகா ஆப்தே வருத்தம்..!
அதில், தனது இயல்பான சுருள் முடி தான் பல வாய்ப்புகளை இழக்கச் செய்ததாக அவர் கூறியுள்ளார். அதன்படி, “நான் சினிமாவுக்கு வந்த ஆரம்ப காலத்தில், ஒவ்வொரு இயக்குநரும், தயாரிப்பாளரும் என்னிடம் முதலில் கேட்ட விஷயம் என் தலைமுடி பற்றி தான். ‘முடியை நேராக்க முடியுமா?’, ‘கர்லி ஹேர் ஸ்கிரீனில் நல்லா வராது’ என்பதுபோன்ற கருத்துகளை அடிக்கடி கேட்க வேண்டியிருந்தது” என்று டாப்ஸி தெரிவித்தார். மேலும் அவர் கூறுகையில், “அந்த காலகட்டத்தில், என் சுருள் முடி காரணமாகவே சில கதாபாத்திரங்களுக்கு என்னை தேர்வு செய்யவில்லை என்பதை நான் நேரடியாக உணர்ந்தேன். சிலர் வெளிப்படையாகவே ‘ஹீரோயினுக்கு இந்த மாதிரி முடி வேண்டாம்’ என்று சொன்னார்கள்.
அது எனக்கு மிகவும் வருத்தமாக இருந்தது. ஏனென்றால், அது என் இயல்பான தோற்றம்” என்று தனது மனநிலையை பகிர்ந்துள்ளார். இந்த அழுத்தங்களுக்கிடையே, ஒரு கட்டத்தில் தனது தலைமுடியை நேராக்க ஒப்புக்கொண்டதாகவும் டாப்ஸி கூறியுள்ளார். அதில் “நான் தொடர்ந்து வாய்ப்புகளை இழந்து கொண்டிருந்ததால், ஒருகட்டத்தில் முடியை நேராக்கி பார்ப்போம் என்று முடிவு செய்தேன். அதன் பிறகு சில வாய்ப்புகள் கிடைத்தது உண்மை தான். ஆனால், அது என் மனதிற்கு முழுமையான திருப்தியை தரவில்லை” என்று அவர் தெரிவித்துள்ளார். இந்த அனுபவம், ஒரு நடிகை தனது இயல்பான தோற்றத்தை மாற்றிக் கொள்ள வேண்டிய கட்டாயம் எப்படி உருவாகிறது என்பதை வெளிப்படுத்துகிறது.
திரைப்படங்கள் மட்டுமல்லாமல், விளம்பர நிறுவனங்களும் தனது தலைமுடியை நேராக்கச் சொல்லி அழுத்தம் கொடுத்ததாக டாப்ஸி அந்த நேர்காணலில் குறிப்பிட்டுள்ளார். அதன்படி “சில விளம்பரங்கள் வந்தபோது கூட, ‘உங்கள் ஹேர் ஸ்டைல் கொஞ்சம் சேஞ்ச் பண்ணினா நல்லா இருக்கும்’ என்று கூறினார்கள். ஆனால், அந்த நேரத்தில் நான் அதை ஏற்றுக் கொள்ளவில்லை. ஏனென்றால், என் இயல்பான தோற்றத்தை மறுக்கும் எந்த வேலைக்கும் நான் சம்மதிக்க விரும்பவில்லை” என்று அவர் கூறினார்.
இதன் காரணமாக, சில விளம்பர வாய்ப்புகளை அவர் நிராகரித்ததாகவும் தெரிவித்துள்ளார். டாப்ஸியின் இந்த கருத்துகள், திரையுலகில் நிலவும் அழகுக்கான ஒரே மாதிரியான அளவுகோல்கள் குறித்து மீண்டும் கேள்வி எழுப்பியுள்ளது. குறிப்பாக, நடிகைகள் எப்படி இருக்க வேண்டும், அவர்களின் தோற்றம் எப்படி இருக்க வேண்டும் என்ற கட்டுப்பாடுகள் இன்னும் தொடர்கின்றன என்பதையும், அதனால் பல திறமையான கலைஞர்கள் பாதிக்கப்படுகின்றனர் என்பதையும் அவரது பேச்சு உணர்த்துகிறது. சமூக வலைதளங்களில் பலர், “டாப்ஸி போல பல நடிகைகள் இதுபோன்ற அனுபவங்களை சந்தித்திருப்பார்கள், ஆனால் எல்லோரும் வெளிப்படையாக பேச மாட்டார்கள்” என்று கருத்து தெரிவித்து வருகின்றனர்.
இந்நிலையில், தனது தற்போதைய நிலை குறித்து பேசும் போது, “இப்போது நான் என் தோற்றம் பற்றி எந்த சமரசமும் செய்ய மாட்டேன். என்னை எப்படி இருக்கிறேனோ அப்படியே ஏற்றுக் கொள்ளும் கதாபாத்திரங்களையும், இயக்குநர்களையும் தான் நான் தேர்வு செய்கிறேன்” என்று டாப்ஸி உறுதியாக தெரிவித்துள்ளார். இது, அவரது சினிமா பயணத்தில் ஏற்பட்ட மனமாற்றத்தையும், தன்னம்பிக்கையையும் வெளிப்படுத்துகிறது. தற்போது பாலிவுட்டில் பிஸியான நடிகையாக இருக்கும் டாப்ஸி, கடைசியாக அக்ஷய் குமாருக்கு ஜோடியாக ‘கேல் கேல் மெய்ன்’ திரைப்படத்தில் நடித்திருந்தார்.
இந்த படத்திலும் அவரது நடிப்பு ரசிகர்களிடையே கவனம் பெற்றது. தொடர்ந்து, பெண்களை மையமாகக் கொண்ட கதைகளில் நடிக்க விருப்பம் தெரிவித்து வரும் அவர், சினிமாவில் நிலவும் பாரம்பரிய அழகுக் கோட்பாடுகளை உடைக்கும் நடிகையாக பார்க்கப்படுகிறார். மொத்தத்தில், டாப்ஸி பன்னுவின் இந்த நேர்காணல், ஒரு நடிகையின் தோற்றம், இயல்பு மற்றும் தனித்துவம் குறித்து திரையுலகம் இன்னும் எவ்வளவு தூரம் முன்னேற வேண்டியுள்ளது என்பதை சுட்டிக்காட்டுகிறது.
தனது சுருள் முடியைப் பற்றிய அனுபவத்தை பகிர்ந்து கொண்ட டாப்ஸி, பல இளம் நடிகைகள் மற்றும் ரசிகர்களுக்கு தன்னம்பிக்கை ஊட்டும் ஒரு குரலாக மாறியுள்ளார். அவரது இந்த கருத்துகள், சினிமாவில் இயல்பை ஏற்றுக் கொள்ளும் சூழல் உருவாக வேண்டும் என்ற விவாதத்தை மேலும் வலுப்படுத்தியுள்ளது.
இதையும் படிங்க: உச்சகட்ட கவர்ச்சியில் நடிகை ஷ்ரத்தா ஸ்ரீநாத்..! நெட் உடையில் போஸ் கொடுத்த போட்டோஸ் வைரல்..!