பஹ்ரைனில் நடைபெற்ற ஆசிய இளையோர் கபடி போட்டி இளம் வீர, வீராங்கனைகளின் திறமையை வெளிப்படுத்திய ஒரு பெரும் மேடை. இந்தியா பல துறைகளில் தங்கம் வென்று அசத்திய நிலையில், மகளிர் கபடி அணி அனைவரையும் பெருமைப்பட வைத்தது. இறுதிப் போட்டியில், இந்திய மகளிர் அணி ஈரான் அணியை 75-21 என்ற கணக்கில் வீழ்த்தி தங்கம் வென்று வரலாறு படைத்தது.

இந்த வெற்றியில் முக்கிய பங்காற்றியவர் சென்னையின் கண்ணகி நகர் பகுதியைச் சேர்ந்த இளம் கபடி வீராங்கனை கார்த்திகா. இவர் இந்த இந்திய அணியின் துணை கேப்டனாக இருந்து தன்னுடைய சிறப்பான ஆட்டத்தின் மூலம் ரசிகர்களின் கவனத்தை ஈர்த்தார். கார்த்திகா போட்டியின் முழு தொடரிலும் பல முறை எதிரணி அணிகளை ஒற்றை ரெய்டில் வீழ்த்தி, ரசிகர்களிடம் ‘கில்லி’ என்ற பெயரால் அறியப்பட்டார். அவரின் ஆட்ட நுணுக்கமும், தைரியமும் இந்திய அணியை தங்கம் வெல்லும் பாதையில் முன்னோக்கி இட்டுச் சென்றது. ஆசிய அளவில் இந்திய பெண்கள் அணிக்கு இது ஒரு பெரும் பெருமை. இத்தகைய பெருமையை சேர்த்த கார்த்திகாவுக்கு தமிழக அரசும் பாராட்டுத் தெரிவித்து, ரூ.25 லட்சம் ஊக்கத்தொகை வழங்கியுள்ளது. அதேபோல், எதிர்க்கட்சித் தலைவர் எடப்பாடி கே. பழனிசாமி அதிமுக சார்பில் ரூ.5 லட்சம் நிதி உதவி வழங்கி கார்த்திகாவை பாராட்டியுள்ளார். இந்த வெற்றியை தொடர்ந்து, கார்த்திகாவை நேரில் சந்தித்து பலரும் வாழ்த்தி வருகின்றனர்.

அரசியல் தலைவர்கள் மட்டுமின்றி, பல திரைப்பட நட்சத்திரங்களும் அவரை பாராட்டி வருகின்றனர். அந்த வரிசையில், நடிகர் மன்சூர் அலிகான் கார்த்திகாவை நேரில் சந்தித்து ரூ.1 லட்சம் பண உதவியை வழங்கியுள்ளார். மன்சூர் அலிகான் தனது தனித்துவமான பாணியில் கார்த்திகாவை ஊக்குவித்து பேசினார். அப்போது பேசிய அவர், “நீ ஆசிய அளவில் தங்கம் வென்றிருக்க. இது ஒரு பெரிய சாதனை. அடுத்த இலக்கு ஒலிம்பிக்ஸ் தங்கம் தான் இருக்கணும். நீ ஒலிம்பிக்ஸ்ல தங்கம் வென்றா, உன் கல்யாணத்துக்கு நான் 100 பவுன் நகை போடுறேன்” என கூறி அனைவரையும் ஷாக்கில் உறைய வைத்தார். இந்த வாக்குறுதி சமூக வலைதளங்களில் வைரலாகி ரசிகர்களிடையே பெரும் பேச்சு பொருளாக மாறியுள்ளது.

இதையும் படிங்க: தண்ணீரை பற்றி பேசி நெட்டிகளிடம் சிக்கிய பிக்பாஸ் ராஜு..! அரசியல் கூட்டத்தை சொல்றாரா.. என மக்கள் கேள்வி..!

மன்சூர் அலிகான் மேலும் பேசுகையில், “இந்த மாதிரி திறமையான பெண்களுக்கு அரசு பெரிய ஆதரவு கொடுக்கணும். கார்த்திகாவுக்கு தமிழக அரசு ரூ.10 கோடி பரிசுத்தொகையும், ஒரு வீடும் வழங்க வேண்டும். ஏனெனில் இது ஒரு உலகளவிலான பெருமை” என்றார். அவரின் இந்த வேண்டுகோள் இணையத்தில் பரவியவுடன், ரசிகர்கள் மற்றும் பொதுமக்கள் பலரும் “மன்சூர் அலிகான் சரியாக சொல்றார்” என ஒத்துக் கொண்டுள்ளனர். சமூக வலைதளங்களில் கார்த்திகாவின் வெற்றி பெரும் அளவில் கொண்டாடப்படுகிறது. கண்ணகி நகர் பகுதி முழுவதும் பண்டிகை சூழல் நிலவுகிறது. அவரது நண்பர்கள், உறவினர்கள், ரசிகர்கள் அனைவரும் அவரை “பெருமைமிகு மகள்” எனப் பாராட்டி வருகின்றனர்.

கார்த்திகா தன் சாதனை குறித்து பேசியபோது, “இது எனக்கு மட்டுமல்ல, தமிழகத்திற்கான வெற்றி. நம்ம ஊருக்கு தங்கம் கொண்டு வருவேன் என்று உறுதியுடன் சென்றேன். அணி முழுக்க ஒருமித்த மனதுடன் போராடினோம். அந்த உழைப்பின் பலன்தான் இந்த தங்கம்” எனக் கூறியுள்ளார். அவர் மேலும், “என்னை நம்பி உதவிய அனைவருக்கும் நன்றி. சிறுமிகளும் கபடி விளையாடி உலக அளவிலான மேடைகளில் நிற்கலாம் என்பதற்கு இது ஒரு உதாரணம்” என பெருமையாக தெரிவித்துள்ளார். இந்த வெற்றி, தமிழக விளையாட்டு வரலாற்றில் ஒரு முக்கிய அத்தியாயமாக பதிவாகியுள்ளது. ஆசிய இளையோர் போட்டிகளில் இந்திய பெண்கள் அணி காட்டிய திறமை, பல ஆண்டுகள் நினைவில் நிற்கும் வகையில் அமைந்துள்ளது.

சிலர், மன்சூர் அலிகானின் வாக்குறுதியை நகைச்சுவையாகக் கொண்டு “இப்போதே 100 பவுன் டோக்கன் குடுக்கலாமே” என காமெடியாக பதிவிட்டு வருகின்றனர். இதற்கிடையில், கார்த்திகாவை கௌரவிக்கும் வகையில் சென்னை மாநகராட்சியும் ஒரு சிறப்பு விழாவை நடத்த திட்டமிட்டுள்ளதாக தகவல்கள் வெளியாகியுள்ளன. இளமையிலேயே உலகளவில் தன்னை நிரூபித்த கார்த்திகா, எதிர்காலத்தில் ஒலிம்பிக்ஸ் தங்கம் வெல்ல வேண்டும் என்பதே ரசிகர்கள் மற்றும் விளையாட்டு வட்டாரங்களின் எதிர்பார்ப்பு. மன்சூர் அலிகானின் ஊக்கமும், அரசின் ஆதரவும் கார்த்திகாவுக்கு பெரிய உற்சாகமாக மாறியுள்ளது.

எனவே கண்ணகி நகர் கார்த்திகா – இந்தியாவுக்கு தங்கத்தைத் தந்த தமிழச்சி என சொல்வதுடன் அவரின் உறுதி, உழைப்பு, அர்ப்பணிப்பு என அனைத்து இளம் பெண்களுக்கும் ஒரு ஊக்கக் கதையாக மாறியுள்ளது.

இதையும் படிங்க: குழந்தைக்கு அப்பா நீங்களா.. என்ன தகுதி இருக்கு உங்களுக்கு..! மாதம்பட்டி ரங்கராஜை வெளுத்து வாங்கிய ஜாய் க்ரிசில்டா..!