மத்திய அரசின் புகழ்பெற்ற 'அமிர்த் பாரத் ரயில் நிலையத் திட்டத்தின்' (ABSS) கீழ் ₹14.79 கோடி மதிப்பீட்டில் அதிநவீன வசதிகளுடன் மறுசீரமைக்கப்பட்ட சென்னை பூங்கா (Chennai Park) புறநகர் ரயில் நிலையத்தைப் பாரதப் பிரதமர் திரு. நரேந்திர மோடி அவர்கள் இன்று காணொளிக் காட்சி (Video Conferencing) வாயிலாகத் திறந்து வைத்து நாட்டுக்கு அர்ப்பணித்தார்.

பஞ்சாப் மாநிலம் ஜலந்தர் கண்டோன்மென்ட் ரயில் நிலையத்திலிருந்து காணொளி வாயிலாக இந்த மெகா திட்டத்தைத் தொடங்கி வைத்த பிரதமர் மோடி, சென்னை கோட்டத்திற்கு உட்பட்ட சென்னை பூங்கா ரயில் நிலையம் உட்பட நாடு முழுவதும் மறுசீரமைக்கப்பட்ட 75 அமிர்த் ரயில் நிலையங்களை ஒரே நேரத்தில் திறந்து வைத்தார். இதனை ஒட்டி சென்னை பூங்கா ரயில் நிலைய வளாகத்தில் இன்று பிரம்மாண்ட விழா ஒன்றுக்கு ஏற்பாடு செய்யப்பட்டிருந்தது. இந்த விழாவில் மாண்புமிகு தமிழ்நாடு ஆளுநர் திரு. ராஜேந்திர விஸ்வநாத் அர்லேகர் அவர்கள் சிறப்பு விருந்தினராகக் கலந்து கொண்டு, மறுசீரமைக்கப்பட்ட கல்வெட்டினைத் திறந்து வைத்துச் சிறப்பித்தார்.

இதையும் படிங்க: தொகுதி மறுவரையறை மசோதா 2026: அனைத்துக் கட்சிக் கூட்டத்தை கூட்ட கோரி பிரதமர் மோடிக்கு கார்கே கடிதம்!

இவ்விழாவில் பத்ம பூஷண் விருது பெற்ற திரு. நல்லி குப்புசாமி செட்டி, தெற்கு ரயில்வே கூடுதல் பொது மேலாளர் திரு. விபின் குமார், சென்னை கோட்ட ரயில்வே மேலாளர் (DRM) திரு. சைலேந்திர சிங், கூடுதல் கோட்ட ரயில்வே மேலாளர்கள் திரு. அங்கூர் சவுகான், டாக்டர் ஐ. செந்தில்குமார் மற்றும் கதி சக்தி திட்ட மேலாளர் திரு. ஷியோ குமார் பிரசாத் உள்ளிட்ட மூத்த ரயில்வே அதிகாரிகள் பலரும் கலந்து கொண்டனர். விழாவின் சிறப்பம்சமாக ரயில்வே ஊழியர்களின் கலை நிகழ்ச்சிகளும், பள்ளி மாணவர்களுக்கான பரிசளிப்பு விழாக்களும் நடைபெற்றன.

சென்னை கடற்கரை - செங்கல்பட்டு புறநகர் ரயில் தடத்தில் மிக முக்கியப் போக்குவரத்து மையமாக (SG-3 Category) விளங்கும் சென்னை பூங்கா ரயில் நிலையம், தற்போது ஒரு விரிவான கார்ப்பரேட் மாற்றத்திற்கு உட்பட்டுள்ளது. மேம்படுத்தப்பட்ட இந்த ரயில் நிலையத்தில், மாற்றுத்திறனாளிகள் மற்றும் முதியவர்கள் எளிதாகப் பயன்படுத்தும் வகையில் புதிய மின்தூக்கிகள் (Lifts), பிரத்யேக நடைபாதைகள் மற்றும் பயணிகள் தடையின்றி நடமாடுவதற்கான உகந்த பகுதிகள் உருவாக்கப்பட்டுள்ளன.

சென்னை சென்ட்ரல் மற்றும் மெட்ரோ ரயில் நிலையங்களை இணைக்கும் தடையற்ற பன்முக போக்குவரத்து இணைப்பை (Seamless Multimodal Connectivity) வழங்கும் நோக்கில் இந்த நவீன உள்கட்டமைப்பு வடிவமைக்கப்பட்டுள்ளது. பயணிகளுக்கு உலகத்தரம் வாய்ந்த பயண அனுபவத்தை வழங்கும் இந்திய ரயில்வேயின் அர்ப்பணிப்புக்கு இந்தத் திட்டம் ஒரு சிறந்த எடுத்துக்காட்டாகும்.

இதையும் படிங்க: ஒடிசா, ஜார்க்கண்டில் புதிய ரயில் தடம்: பொருளாதாரப் புரட்சிக்கு வித்திடும் எனப் பிரதமர் பெருமிதம்!