தமிழ்நாடு நகர்ப்புற வாழ்விட மேம்பாட்டு வாரியத்தின் மூலம் வீடு ஒதுக்கீடு செய்யப்பட்டு, அதற்கான ஆணையைப் பெற்றும் நான்கு ஆண்டுகளாகியும் வீடு வழங்கப்படாததைக் கண்டித்து, சென்னை கிரீன்வேஸ் சாலையில் உள்ள துணை முதலமைச்சர் உதயநிதி ஸ்டாலின் இல்லத்தின் முன்பு பொதுமக்கள் இன்று திரண்டு கண்ணீர் மல்கப் போராட்டத்தில் ஈடுபட்டனர்.

சென்னை மற்றும் அதன் சுற்றுவட்டாரப் பகுதிகளில் வசிக்கும் நூற்றுக்கணக்கான எளிய எளிய மக்கள், தங்களுக்கு ஏற்கனவே வழங்கப்பட்ட வீடு ஒதுக்கீடு ஆணைகளை (Allotment Orders) கையில் ஏந்தியபடி இந்தப் போராட்டத்தில் பங்கேற்றனர். கடந்த 2022-ஆம் ஆண்டிலேயே தங்களுக்கு வீடுகள் ஒதுக்கப்பட்டும், இதுவரை சாவிகள் வழங்கப்படவில்லை என அவர்கள் குற்றம் சாட்டினர்.

எங்களுக்கு ஒதுக்கப்பட்ட வீடுகள் கட்டி முடிக்கப்பட்டுத் தயாராக உள்ளன. ஆனால், எதனால் எங்களுக்கு இன்னும் ஒப்படைக்கப்படவில்லை என்று தெரியவில்லை. வாடகை வீட்டில் வசிக்க முடியாமல் தவிக்கிறோம்" எனக் கூறிப் போராட்டத்தில் ஈடுபட்ட பெண்கள் கண்ணீர் விட்டு அழுதது அங்கிருந்தோரை நெகிழ்ச்சியில் ஆழ்த்தியது.

இதையும் படிங்க: எழும்பூர் ஆவண காப்பகத்தில் புதிய வசதிகள்...! துணை முதல்வர் உதயநிதி ஸ்டாலின் திறந்து வைத்தார்!

துணை முதலமைச்சர் உடனடியாகத் தலையிட்டுத் தங்களுக்கு உரியப் பாதுகாப்பான வீடுகளை வழங்க வேண்டும் என அவர்கள் முழக்கமிட்டனர். ஒதுக்கீடு ஆணையை கையில் வைத்துக்கொண்டே வீடின்றி வீதியில் நிற்பது தங்களுக்கு இழைக்கப்படும் பெரும் அநீதி எனப் பயனாளிகள் கொதித்தெழுந்தனர்.

கிரீன்வேஸ் சாலையில் உள்ள துணை முதல்வர் இல்லத்திற்குப் பொதுமக்கள் திரண்டு வந்ததால், அந்தப் பகுதியில் பலத்த போலீஸ் பாதுகாப்புப் போடப்பட்டது. போராட்டக்காரர்களை அப்புறப்படுத்த முயன்ற போலீசாருடன் பயனாளிகள் வாக்குவாதத்தில் ஈடுபட்டதால் அங்குச் சிறிது நேரம் பரபரப்பு ஏற்பட்டது.

தஞ்சாவூர் மண்ணில் நாளை விஜய் கால் பதிக்கும் அரசியல் பரபரப்புக்கு இடையே, சென்னையில் எளிய மக்களின் இந்த வாழ்வாதாரப் போராட்டம் அரசுக்கு ஒரு பெரும் நெருக்கடியை ஏற்படுத்தியுள்ளது. இது குறித்து நகர்ப்புற வாழ்விட மேம்பாட்டு வாரிய அதிகாரிகள் தரப்பில் முறையான விளக்கம் அளிக்கப்படும் என எதிர்பார்க்கப்படுகிறது.

இதையும் படிங்க: மத்திய கைலாஷ் டிராஃபிக்கிற்கு எண்டு கார்டு! ₹60 கோடி ‘எல்’ வடிவ மேம்பாலத்தை இன்று திறந்து வைக்கிறார் முதல்வர்!