விருதுநகர் மாவட்டம் ஸ்ரீவில்லிபுத்தூரில் அமைந்துள்ள புகழ்பெற்ற ஆண்டாள் திருக்கோயிலில், ஆண்டாளின் அவதார நட்சத்திரமான ஆடிப்பூரத்தை முன்னிட்டு நடைபெறும் திருவிழாவின் உச்சக்கட்ட நிகழ்ச்சியாக தேரோட்டம் இன்று (ஆகஸ்ட் 14) வெகு விமரிசையாக நடைபெற்றது.

108 வைணவ திவ்யதேசங்களுள் ஒன்றான இந்தத் தலம், பன்னிரு ஆழ்வார்களுள் ஒரே பெண் ஆழ்வாரான ஆண்டாளும், அவரது வளர்ப்புத் தந்தையான பெரியாழ்வாரும் அவதரித்த புண்ணிய பூமியாகும். ஆண்டாள் பூமிதேவியின் அவதாரமாகக் கருதப்படுகிறார். இக்கோயிலின் ராஜகோபுரம் தமிழ்நாடு அரசின் சின்னமாகவும் விளங்குகிறது. ஆசியாவிலேயே மிகப்பெரிய தேர்களுள் ஒன்றாகக் கருதப்படும் இங்குள்ள திருத்தேர் சுமார் 94-96 அடி உயரம் கொண்டது.

இந்த ஆண்டு ஆடிப்பூரப் பெருவிழா ஆகஸ்ட் 6ஆம் தேதி கொடியேற்றத்துடன் தொடங்கியது. அதன்பிறகு நாள்தோறும் ஆண்டாளும் ரெங்கமன்னாரும் பல்வேறு வாகனங்களில் வீதி உலா வந்து பக்தர்களுக்கு அருள்பாலித்தனர். ஆகஸ்ட் 10ஆம் தேதி ஐந்து கருட சேவை சிறப்பாக நடைபெற்றது. நேற்று முன்தின இரவு ஆண்டாளின் திருமடியில் ரெங்கமன்னார் சயன திருக்கோலத்தில் எழுந்தருளிய சயன சேவை நிகழ்ச்சியில், கிருஷ்ணன் கோயிலிலிருந்து சுமார் மூன்று கிலோமீட்டர் தூரம் வரிசையில் நின்று பக்தர்கள் நள்ளிரவு வரை தரிசனம் செய்தனர்.

இதையும் படிங்க: ஆடிப்பூரம் 2026: அன்னையின் அருளும் ஆண்டாளின் அவதாரமும்..!! தெரிந்துகொள்ளுங்கள்..!!

இன்று காலையில் சிறப்பு பூஜைகளுக்குப் பிறகு, அலங்கரிக்கப்பட்ட மாபெரும் திருத்தேரில் ஆண்டாளும் ரெங்கமன்னாரும் எழுந்தருளினர். தீபாராதனைக்குப் பின்னர் ஆயிரக்கணக்கான பக்தர்கள் “கோவிந்தா… கோவிந்தா… கோபாலா” என்ற பக்திக் கோஷங்களுடன் வடம் பிடித்து தேரை இழுத்தனர். நான்கு ரத வீதிகளிலும் லட்சக்கணக்கான பக்தர்கள் திரண்டு திருத்தேரில் வலம் வந்த தெய்வங்களை தரிசித்தனர். நகரம் முழுவதும் விழாக்கோலத்தில் மின்னியது.

ஸ்ரீரங்கம் மற்றும் மதுரை அழகர் கோயில்களிலிருந்து சீர்வரிசைப் பொருட்கள் வந்தடைந்தன. அரசியல் கட்சிகள் மற்றும் சேவை அமைப்புகள் தண்ணீர், மோர் பந்தல்களை அமைத்தன. நகராட்சி அடிப்படை வசதிகளையும் நடமாடும் கழிவறைகளையும் ஏற்படுத்தியது. ஆயிரக்கணக்கான போலீசார் பாதுகாப்பு பணியில் ஈடுபட்டனர். தீயணைப்பு மற்றும் சுகாதாரத் துறையினர் தயாரநிலையில் இருந்தனர். மாவட்டம் முழுவதும் உள்ளூர் விடுமுறை அறிவிக்கப்பட்டிருந்தது.

இதையும் படிங்க: இன்றைய ராசிபலன் (14-08-2026)..!! இந்த ராசிக்காரர்களுக்கு இன்று நிதி விஷயங்களில் கவனம் தேவை..!!