மத்திய பட்ஜெட் இன்று தாக்கல் செய்யப்படவுள்ள நிலையில், தமிழகத்தின் மிக முக்கியமான நிலுவை நிதிகள் மற்றும் புதிய திட்டங்கள் குறித்து முதலமைச்சர் மு.க.ஸ்டாலின் அவர்கள் ஒன்றிய அரசுக்குக் காரசாரமானக் கேள்விகளை முன்வைத்துள்ளார். வழக்கமானத் திருக்குறள் மேற்கோள்களுடன் மட்டும் நின்றுவிடாமல், தமிழகத்தின் நீண்டகாலக் கோரிக்கைகளுக்கு முறையான நிதி ஒதுக்கீடு செய்ய வேண்டும் என அவர் வலியுறுத்தியுள்ளார்.
தமிழக மாணவர்களின் படிப்புக்காக மத்திய அரசிடமிருந்து விடுவிக்கப்படாமல் நிறுத்தி வைக்கப்பட்டுள்ள ₹3,548 கோடி கல்வி நிதியை இந்த பட்ஜெட்டில் உடனடியாக ஒதுக்க வேண்டும். கோயம்புத்தூர் மற்றும் மதுரை மெட்ரோ ரயில் திட்டங்களுக்கு ஒன்றிய அரசு உடனடியாக ஒப்புதல் அளித்து, அதற்கானத் திட்ட நிதியை விடுவிக்க வேண்டும். சென்னை மெட்ரோ இரண்டாம் கட்டத் திட்டத்திற்கான ஒன்றிய அரசின் பங்குத் தொகையான ₹9,500 கோடி நிலுவையும் இதில் அடங்கும்.
இதையும் படிங்க: தமிழ்நாடு தலைகுனியாது! 234 தொகுதிகளிலும் திமுகவின் அதிரடி பரப்புரை இன்று தொடக்கம்!
குடிநீர் இணைப்புத் திட்டத்தைச் சிறப்பாகச் செயல்படுத்தி வரும் தமிழகத்திற்கு வழங்க வேண்டிய ₹3,112 கோடி நிலுவை நிதியை வழங்க வேண்டும்.
16-வது நிதி ஆணையத்தின் பரிந்துரைப்படி, ஒன்றிய அரசின் வரி வருவாயில் மாநிலங்களுக்கானப் பகிர்வை 41%-லிருந்து 50%-ஆக உயர்த்த வேண்டும் எனத் தமிழக அரசு தொடர்ந்து வலியுறுத்தி வருகிறது. இது மாநிலங்களின் நிதிச் சுயாட்சிக்கு மிக அவசியம் என முதலமைச்சர் குறிப்பிட்டுள்ளார்.
கிடப்பில் உள்ளப் புதிய இரயில்வே பாதை திட்டங்கள் மற்றும் இரட்டைப் பாதை பணிகளுக்குத் தேவையான நிதியை ஒதுக்க வேண்டும். எங்களது கோரிக்கைகள் மதுரை எய்ம்ஸ் போல வெறும் அறிவிப்போடு நின்றுவிடக் கூடாது; முறையான நிதி ஒதுக்கீட்டுடன் குறித்த காலத்தில் நிறைவேற்றப்பட வேண்டும் என்று முதலமைச்சர் தனது உரையில் ஆதங்கத்தை வெளிப்படுத்தியுள்ளார். 2026 சட்டமன்றத் தேர்தலை முன்னிட்டாவது தமிழகத்தின் இக்கோரிக்கைகளுக்கு ஒன்றிய அரசு செவிசாய்க்குமா என்பது இன்னும் சில நிமிடங்களில் தெரிந்துவிடும்.
இதையும் படிங்க: "தமிழக விவசாயிகளை வஞ்சிக்காதே!" - ஆவினின் முடிவுக்கு அன்புமணி ராமதாஸ் கடும் எதிர்ப்பு!