நீலகிரி மாவட்டம், கோத்தகிரியில் அமைந்துள்ள மறைந்த முன்னாள் முதலமைச்சர் ஜெ.ஜெயலலிதாவுக்கு சொந்தமான கொடநாடு எஸ்டேட்டில் கடந்த 2017ம் ஆண்டு ஏப்ரல் 23-ம் தேதி நடந்த கொலை மற்றும் கொள்ளை சம்பவம் தமிழக அரசியலில் பெரும் பரபரப்பை ஏற்படுத்தியது. இது தொடர்பான வழக்கு ஊட்டி ஒருங்கிணைந்த நீதிமன்றத்தில் கடந்த 7 ஆண்டுகளாக நடந்து வருகிறது.
இந்த வழக்கில் காவலாளி ஓம் பகதூர் கொல்லப்பட்டு, ஆவணங்களும் பொருட்களும் கொள்ளையடிக்கப்பட்டன. சயான், வாளையார் மனோஜ் உள்ளிட்ட 10 பேர் கைது செய்யப்பட்டு, தற்போது ஜாமீனில் உள்ளனர். வழக்கு தொடர்பாக 500-க்கும் மேற்பட்டோரிடம் சிபிசிஐடி விசாரணை நடத்தியுள்ளது.
இதையும் படிங்க: ரூ.4 கோடி சிக்கிய வழக்கு: சிபிசிஐடி விசாரணையில் வெளிவந்த பரபரப்பு தகவல்..!
இந்நிலையில் ஜூலை 18-ம் தேதியான இன்று, உதகை மாவட்ட நீதிமன்றத்தில் வழக்கு விசாரணை நடைபெற்றபோது, கொடநாடு பங்களாவை மாவட்ட நீதிபதி நேரில் ஆய்வு செய்ய எந்த ஆட்சேபனையும் இல்லை என சிபிசிஐடி தரப்பில் தெரிவிக்கப்பட்டது. விசாரணையின் போது, குற்றவாளிகள் சார்பில் 2023-இல் தாக்கல் செய்யப்பட்ட, குற்றம் நடைபெற்ற இடத்தை ஆய்வு செய்யக் கோரிய மனு தள்ளுபடி செய்யப்பட்டிருந்தது.
இருப்பினும், தற்போது சிபிசிஐடி தரப்பு, பங்களாவை ஆய்வு செய்ய அனுமதி கோரிய மனுவை நீதிமன்றம் ஏற்றுக்கொண்டது. இதன்படி, நீதிபதி அப்துல் காதர் தலைமையில் விசாரணை நடைபெற்று, அரசு வழக்கறிஞர்கள் ஷாஜகான் மற்றும் கனகராஜ் ஆஜராகினர். வாளையார் மனோஜ் மட்டும் நீதிமன்றத்தில் நேரில் ஆஜரானார். வழக்கு விசாரணை அடுத்து ஆகஸ்ட் 14-ஆம் தேதிக்கு ஒத்திவைக்கப்பட்டுள்ளது. இந்த ஆய்வு, வழக்கில் முக்கிய திருப்பத்தை ஏற்படுத்தலாம் என எதிர்பார்க்கப்படுகிறது.
சமீபத்தில், எடப்பாடி பழனிசாமியின் நெருங்கிய நண்பரும் அதிமுக நிர்வாகியுமான சஜீவனுக்கு சிபிசிஐடி சம்மன் அனுப்பியது பரபரப்பை ஏற்படுத்தியது. மேலும், செல்போன் உரையாடல்கள் மற்றும் ஆதாரங்களை சேகரிக்க இன்டர்போல் உதவியுடன் விசாரணை தீவிரமாக நடைபெறுகிறது.
வழக்கில் மர்ம மரணங்கள், ஆதார அழிப்பு குற்றச்சாட்டுகள் மற்றும் அரசியல் தலையீடு குறித்த விவாதங்கள் தொடர்கின்றன. சென்னை உயர்நீதிமன்றம் எடப்பாடி பழனிசாமியை விசாரிக்கக் கூடாது என கேள்வி எழுப்பியது, ஆனால் உண்மைக் குற்றவாளிகளை கண்டறிய முழு விசாரணை தேவை என முதல்வர் உறுதியளித்துள்ளார். இவ்வழக்கு தமிழக அரசியலில் முக்கிய திருப்புமுனையாக உள்ளது.
இதையும் படிங்க: சூடுபிடிக்கும் சிறுவன் கடத்தல் வழக்கு.. பூவை ஜெகன்மூர்த்தி மீது சிபிசிஐடி வழக்குப்பதிவு..!