2026 சட்டமன்றத் தேர்தல் நெருங்கி வரும் சூழ்நிலையில் பல கட்சி தலைவர்கள் தங்களது சுற்றுப்பயணங்களை மேற்கொண்டு வருகின்றனர். அதன்படி தமிழக வெற்றிக் கழகத்தின் தலைவர் விஜய் கடந்த 13ஆம் தேதி தனது சுற்றுப்பயணத்தை தொடங்கினார். முன்னதாக விக்கிரவாண்டி மற்றும் மதுரையில் நடத்தப்பட்ட மாநாட்டுக்கு மாபெரும் வரவேற்பு கிடைத்தது. லட்சக்கணக்கான தொண்டர்கள் குவிந்தனர்.

விரைவில் விஜய் தனது சுற்றுப்பயணத்தை மேற்கொள்வார் என்று அறிவிக்கப்பட்டது. இதையடுத்து, திருச்சியில் தனது முதல் சுற்று பயணத்தை தொடங்கிய விஜய் தொடர்ந்து அரியலூரில் பிரச்சாரம் மேற்கொண்டார். விஜய் பிரச்சாரத்தை காண அலைக்கடலென தொண்டர்கள் குவிந்தனர். வரலாறு காணாத கூட்டம் காரணமாக தனது பெரம்பலூர் சுற்றுப்பயணத்தையே விஜய் ரத்து செய்துவிட்டார்.

அந்த அளவிற்கு கூட்ட நெரிசல் ஏற்பட்டுவிட்டது. விஜயின் பிரச்சார அட்டவணைப்படி வரும் செப்டம்பர் 20ஆம் தேதி அடுத்த கட்ட பயணத்தை நடத்துகிறார். நாகப்பட்டினம் மற்றும் திருவாரூர் மாவட்டங்களில் விஜய் சுற்றுப்பயணம் மேற்கொள்ள திட்டமிட்டு இருக்கும் நிலையில் இன்று மாவட்ட செயலாளர்களுடன் தீவிர ஆலோசனை மேற்கொண்டார். பயணத்திட்டம், காவல்துறையினரின் கட்டுப்பாடுகள், கூட்டத்தை கையாள்வது உள்ளிட்டவை குறித்து ஆலோசிக்கப்பட்டதாக தகவல் வெளியாகி உள்ளது. திருச்சி சுற்றுப்பயணத்தின் போது பொது சொத்துக்களை தமிழக வெற்றி கழகத்தினர் சேதப்படுத்திவிட்டதாக குற்றச்சாட்டுகள் முன்வைக்கப்பட்டது.

இதையும் படிங்க: இப்போ WFH தலைவர் இல்ல.. WEEKEND தலைவர்.. விஜயை கலாய்த்த தமிழிசை..!!

இந்த நிலையில், இதுபோன்ற சம்பவங்கள் நடக்காமல் இருப்பதற்கு என்ன நடவடிக்கை எடுக்கலாம் என்பது தொடர்பாகவும் ஆலோசிக்கப்பட்டதாக தெரிகிறது. விஜயின் சுற்றுப்பயணத்திற்கு பல்வேறு கட்டுப்பாடுகள் விதிக்கப்படுவதால், சென்னை உயர்நீதிமன்றத்தில் வழக்கு தொடரப்பட்டிருப்பது குறிப்பிடத்தக்கது.

இதையும் படிங்க: சென்னையில் விஜயின் சூறாவளி சுற்றுப் பயணம்... காவல் ஆணையரகத்தில் தவெக மனு,!