நெல்லை: 9 வயது சிறுமிக்கு பாலியல் தொல்லை கொடுத்த வழக்கில் நெல்லை மாவட்டம் வீரவநல்லூர் அரசு பள்ளி ஆசிரியர் சிதம்பரம் நடேசன் (63) என்பவருக்கு சாகும்வரை சிறை தண்டனை விதித்து நீதிமன்றம் தீர்ப்பளித்துள்ளது. இந்த அதிர்ச்சி சம்பவம் பள்ளி சூழலில் பாதுகாப்பு குறித்து மீண்டும் கேள்வியை எழுப்பியுள்ளது.

வீரவநல்லூர் பகுதியைச் சேர்ந்த சிதம்பரம் நடேசன், அந்தப் பகுதி அரசு பள்ளியில் கைத்தறி மற்றும் நெசவு பிரிவு ஆசிரியராகப் பணியாற்றி வந்தார். 2022ஆம் ஆண்டு வகுப்பறையில் 9 வயது மாணவியை பாலியல் தொல்லைக்கு உள்ளாக்கினார். பயந்து நடுங்கிய சிறுமி, சம்பவத்தை தனது பெற்றோரிடம் தெரிவித்தார்.

அதிர்ச்சியடைந்த பெற்றோர் உடனடியாக சேரன்மாதேவி அனைத்து மகளிர் போலீஸ் நிலையத்தில் புகார் அளித்தனர். போலீசார் உடனடியாக வழக்குப் பதிவு செய்து, போக்சோ சட்டத்தின் கீழ் சிதம்பரம் நடேசனை கைது செய்தனர். இந்த வழக்கு நெல்லை மாவட்ட சிறப்பு போக்சோ நீதிமன்றத்தில் விசாரணைக்கு வந்தது.

இதையும் படிங்க: பள்ளி மாணவர்களுக்கு போன ஆபாச படங்கள்..!! பதறிப்போன பெற்றோர்! சில்மிஷ வாத்தியாருக்கு சிறை!

நேற்று வழக்கை விசாரித்த நீதிபதி சுரேஷ்குமார், குற்றம் நிரூபிக்கப்பட்டதால் சிதம்பரம் நடேசனுக்கு சாகும்வரை சிறை தண்டனை வழங்கினார். மேலும் ரூ.20 ஆயிரம் அபராதமும் விதித்தார். பாதிக்கப்பட்ட சிறுமிக்கு அரசு சார்பில் ரூ.5 லட்சம் நிவாரணம் வழங்கவும் உத்தரவிட்டார்.

பள்ளி ஆசிரியர் என்னும் பொறுப்பில் இருந்த ஒருவர் இத்தகைய கொடூர செயலில் ஈடுபட்டது பெற்றோர்கள் மற்றும் பொதுமக்களிடையே பெரும் அதிர்ச்சியை ஏற்படுத்தியுள்ளது. குழந்தைகளின் பாதுகாப்புக்கு பள்ளிகளில் கடுமையான கண்காணிப்பு தேவை என்ற குரல் எழுந்துள்ளது.

போக்சோ வழக்குகளில் விரைவான நீதி கிடைத்துள்ள இந்த தீர்ப்பு, குழந்தைகளுக்கு எதிரான குற்றங்களுக்கு கடுமையான தண்டனை வழங்கப்படும் என்பதை உறுதிப்படுத்துகிறது. பாதிக்கப்பட்ட சிறுமியின் குடும்பத்தினர் நீதிமன்ற தீர்ப்பை வரவேற்றுள்ளனர். இந்த சம்பவம் தமிழகம் முழுவதும் பெரும் பேச்சாகியுள்ளது.

இதையும் படிங்க: 6 வயது சிறுமியிடம் பாலியல் அத்துமீறல்! சென்னை மெரினாவில் பயங்கரம்! குதிரை ஓட்டியை தட்டி தூக்கிய போலீஸ்!