சென்னை: தமிழக சட்டசபைத் தேர்தல் முடிவுகளால் அதிருப்தியடைந்த பா.ஜ.,வைச் சேர்ந்த பல இளைஞர்கள் தமிழக வெற்றிக் கழகத்துக்கு (த.வெ.க.,) தாவி வரும் நிலை ஏற்பட்டுள்ளது. தேர்தலில் எதிர்பாராத தோல்வியை சந்தித்த பா.ஜ., தற்போது உள் பதற்றத்தில் உள்ளதாகக் கூறப்படுகிறது.

த.வெ.க., சந்தித்த முதல் சட்டசபைத் தேர்தலிலேயே வெற்றி பெற்று ஆட்சியைப் பிடித்துள்ளது. இளைஞர்கள் மத்தியில் புதிய மாற்றத்தை விரும்பும் மனநிலை மற்றும் சமூக ஊடகங்களின் ஆதரவுதான் இந்த வெற்றிக்கு முக்கிய காரணம் எனக் கருதப்படுகிறது. இரு பெரும் திராவிடக் கட்சிகளையும் பின்னுக்கு தள்ளிய த.வெ.க.,வுக்கு இளைஞர்கள் மத்தியில் பெரும் வரவேற்பு கிடைத்துள்ளது.

பா.ஜ.,வில் இளம் தலைமுறைக்கு பெரும் எதிர்பார்ப்பை ஏற்படுத்திய முன்னாள் மாநிலத் தலைவர் அண்ணாமலை, ஐ.பி.எஸ். அதிகாரியாக இருந்தவர், திராவிடக் கட்சிகளுக்கு குடைச்சல் கொடுத்தவர் என்பதால் கட்சியில் பெரும் எழுச்சியை ஏற்படுத்தினார். ஆனால் அதிமுக கூட்டணிக்காக அவரை பதவியில் இருந்து நீக்கியது இளைஞர்கள் மத்தியில் அதிருப்தியை ஏற்படுத்தியது.

இதையும் படிங்க: தமிழக பாஜகவில் விரைவில் அதிரடி மாற்றம்... அண்ணாமலைக்கு காத்திருக்கும் டபுள் ஜாக்பாட்... அமித் ஷா எடுத்த முக்கிய முடிவு...!

தேர்தல் தோல்விக்குப் பிறகு அண்ணாமலை ஆதரவாளர்கள் உள்ளிட்ட பல இளைஞர்கள் த.வெ.க.,வுக்கு தாவி வருகின்றனர். மதுரை மாவட்டத்தில் விளையாட்டுப் பிரிவு உள்ளிட்ட பல அணிகளைச் சேர்ந்த இளைஞர்கள் நாமக்கல் சென்று த.வெ.க., அமைச்சர் அருண்ராஜ் முன்னிலையில் கட்சியில் இணைந்த சம்பவம் பரபரப்பை ஏற்படுத்தியுள்ளது.

இதுகுறித்து பா.ஜ., நிர்வாகி ஒருவர் கூறுகையில், “மாநிலத் தலைவர் நயினார் நாகேந்திரனின் மகன் மூலம் சேர்க்கப்பட்ட சில இளைஞர்கள் மட்டுமே தாவியுள்ளனர். சித்தாந்த அடிப்படையில் உள்ள இளைஞர்கள் இன்னும் பா.ஜ.,வில்தான் உள்ளனர்” என்றார்.

பா.ஜ., ஐ.டி. விங் மாநிலச் செயலாளர் விஷ்ணு பிரசாத் கூறுகையில், “சமூக ஊடகங்கள் மூலம் வெற்றி பெற்ற விஜய்யை இளைஞர்கள் பலர் நம்புகின்றனர். அரசியல் சூழல் மாறிவிட்டது. அண்ணாமலை போன்ற படித்த, தொழில் முனைவோர் இளைஞர்களிடம் செல்வாக்கு பெற்ற தலைவர்களால்தான் எதிர்காலத்தில் பா.ஜ.,வால் செயல்பட முடியும். அண்ணாமலை புதிய பாதையில் பயணிப்பார் என எதிர்பார்க்கப்படுகிறது. அவருக்கு ரஜினி உள்ளிட்டோரின் ஆதரவும் உள்ளது. மே 28-ம் தேதி தமிழகம் வரும் அவர் அரசியலில் முக்கிய முடிவுகளை எடுப்பார்” என்றார்.

தேர்தல் தோல்விக்குப் பிறகு பா.ஜ., இளைஞர்கள் மத்தியில் ஏற்பட்டுள்ள அதிருப்தி மற்றும் த.வெ.க.,வுக்கு நடக்கும் தாவல் தமிழக அரசியலில் புதிய விவாதங்களை ஏற்படுத்தியுள்ளது. 

இதையும் படிங்க: வாழ்த்துகள் விஜய்..! தவெகவின் அமோக வெற்றி..!! அண்ணாமலை அன்புமழை..!!