சென்னை: தமிழக சட்டசபை தேர்தல் தேதி விரைவில் அறிவிக்கப்படும் நிலையில், அமலாக்கத் துறை (ED) தீவிரமடைந்துள்ளது. ED இயக்குநர் ராகுல் நவீன் இன்று (பிப்ரவரி 26, 2026) சென்னைக்கு வருகிறார். 3 நாட்கள் முகாமிட்டு, தமிழகத்தில் நிலுவையில் உள்ள முக்கிய வழக்குகளை அதிகாரிகளுடன் ஆய்வு செய்ய உள்ளார். இது அரசியல் வட்டாரத்தில் பெரும் பரபரப்பை ஏற்படுத்தியுள்ளது.

சமீபத்தில், தமிழ்நாடு நகராட்சி நிர்வாகம் மற்றும் நீர்வழங்கல் துறையில் (MAWS) பணி நியமனங்கள் மற்றும் டெண்டர் ஒதுக்கீட்டில் நடந்த முறைகேடுகள் தொடர்பாக ED கடிதம் அனுப்பியது. 2025 அக்டோபர் 27-ம் தேதி தமிழக டிஜிபிக்கு அனுப்பப்பட்ட கடிதத்தில், ரூ.630 கோடி மதிப்பிலான 'கேஷ் ஃபார் ஜாப்ஸ்' ஊழல், ரூ.1,020 கோடி டெண்டர் ஊழல் ஆகியவை குறிப்பிடப்பட்டன. இதில் அமைச்சர் கே.என்.நேரு தொடர்புடையதாக ED குற்றம்சாட்டியது.

தமிழக காவல்துறை நடவடிக்கை எடுக்காததால், சென்னை உயர்நீதிமன்றத்தில் வழக்கு தொடரப்பட்டது. கடந்த வாரம் (பிப்ரவரி 20) உயர்நீதிமன்றம், DVAC-க்கு உடனடியாக FIR பதிவு செய்ய உத்தரவிட்டது.

இதையும் படிங்க: லஞ்ச ஒழிப்பு துறையில் குவியும் புகார்கள்! 390 வழக்குபதிவு! 222 பேர் அதிரடி கைது!

ED அளித்த 232 பக்க ஆவணங்கள், டிஜிட்டல் ரெக்கார்டுகள், எக்செல் ஷீட்கள் ஆகியவை 'பிரைமா ஃபேசி' ஆதாரமாக இருப்பதாக நீதிமன்றம் குறிப்பிட்டது. பணி நியமனங்களில் ரூ.25-35 லட்சம் லஞ்சம், டெண்டர்களில் 7.5-10% கமிஷன், ஹவாலா மூலம் துபாய்க்கு பணம் அனுப்பியது உள்ளிட்ட குற்றச்சாட்டுகள் உள்ளன.

இந்த சூழலில் ED இயக்குநர் ராகுல் நவீனின் சென்னை வருகை மிக முக்கியத்துவம் வாய்ந்ததாக உள்ளது. அவர் தென்மண்டல அதிகாரிகளுடன் சந்தித்து, PMLA, FEMA வழக்குகள், மணி லாண்டரிங், ஊழல் தொடர்பான விசாரணைகளை விரைவுபடுத்த உத்தரவிட உள்ளார். KN நேரு தொடர்பான வழக்கு உட்பட உயர்மட்ட வழக்குகள் மீது கவனம் செலுத்தப்படும் என்று தகவல்கள் தெரிவிக்கின்றன.

ED சமீபத்தில் குவஹாத்தியில் நடந்த கூட்டத்தில் 500 சார்ஜ்ஷீட்கள் தாக்கல் செய்ய இலக்கு நிர்ணயித்தது. தமிழகத்தில் நிலுவை வழக்குகளை விரைவாக முடிக்க வேண்டும் என்ற உத்தரவு உள்ளது. தேர்தல் நெருங்கும் நிலையில் இந்த விசாரணைகள் திமுக அரசுக்கு பெரும் சவாலாக உருவெடுத்துள்ளன. எதிர்க்கட்சிகள் இதை 'ஊழல் அரசு' என்று விமர்சித்து வருகின்றன. ராகுல் நவீனின் ஆய்வு முடிவுகள் தமிழக அரசியலை பெரிதும் பாதிக்கும் என எதிர்பார்க்கப்படுகிறது.

இதையும் படிங்க: அரசு பணிகளை விற்று கல்லா கட்டுகிறதா திமுக?!! விழா நடத்துவது தான் கேடு! வெளுத்து வாங்கும் நயினார்!!