சென்னை: சிறுமிகள் மீதான பாலியல் வன்கொடுமை தொடர்பான வழக்கில் கிரானைட் தொழிலதிபர் ஆர். வீரமணி உள்பட எட்டு பேரை போலீசார் கைது செய்துள்ளனர். சிறுமியைக் காரில் அழைத்துச் சென்றதாகக் குற்றம்சாட்டப்பட்ட வீரமணியின் டிரைவர்கள் லாசர் மற்றும் பார்த்திபன் ஆகியோரும் புழல் சிறையில் அடைக்கப்பட்டுள்ளனர்.

12 சிறுமிகள் அளித்த புகார்களின் அடிப்படையில் வீரமணி மீது எட்டு போக்சோ வழக்குகள் பதிவு செய்யப்பட்டுள்ளன. இதில் இரண்டாவது போக்சோ வழக்கில் புழல் சிறையில் அடையாள அணிவகுப்பு நடைபெற்றது.

பாதிக்கப்பட்ட சிறுமியை மாஜிஸ்திரேட் முன்னிலையில் சிறைக்கு அழைத்துச் சென்று கைதிகளின் அடையாளம் காட்டச் செய்தனர். அப்போது வீரமணியிடம் தன்னை அழைத்துச் சென்ற லாசர் மற்றும் பார்த்திபனை சிறுமி சரியாக அடையாளம் காட்டியதாகத் தகவல் வெளியாகியுள்ளது. இதனால் இந்த வழக்கு விசாரணை மேலும் தீவிரமடைந்துள்ளது.

இதையும் படிங்க: தீபாவளிக்கு ஒரு ஸ்வீட் கேட்ட இன்ஸ்டா பிரபலம்! ஆர்டர்களால் திணறிய வீரமணிக்கு இறுதியில் கிடைத்த சர்ப்ரைஸ்!

சிறப்பு விசாரணைக் குழு (எஸ்ஐடி) இந்த வழக்கை விசாரித்து வருகிறது. வீரமணி, அவரது கூட்டாளிகள் சாந்தி, மகேந்திர சிம்மன் உள்ளிட்டோர் மற்றும் உதவியாளர்கள் இதுவரை கைது செய்யப்பட்டுள்ளனர். டிரைவர்கள் லாசர், பார்த்திபன், பாபு ஆகியோரும் கைது செய்யப்பட்டுள்ளனர். மேலாளர் சக்திவேல் உள்ளிட்டோர் மீதும் நடவடிக்கை எடுக்கப்பட்டுள்ளது.

விசாரணையில் டிஜிட்டல் சான்றுகள் மற்றும் ஆவணங்கள் பறிமுதல் செய்யப்பட்டுள்ளன. வீரமணி மற்றும் சில கைதிகள் புழல் சிறையில் அடைக்கப்பட்டுள்ளனர்.

நீதிமன்ற உத்தரவுப்படி விசாரணை தொடர்கிறது. மேலும் பாதிக்கப்பட்டவர்கள் முன்வரும்பட்சத்தில் கூடுதல் வழக்குகள் பதிவு செய்யப்படலாம் என போலீசார் தெரிவித்துள்ளனர். இந்த வழக்கு தொடர்பான விசாரணை சென்னை மத்திய குற்றப்பிரிவு மற்றும் சிறப்புக் குழுவினரால் தீவிரமாக நடத்தப்பட்டு வருகிறது.

இதையும் படிங்க: ஜெம் வீரமணி பாலியல் வழக்கில் அடுத்த பூகம்பம்... SIT கையில் சிக்கிய முக்கிய ஆதாரங்கள்...சோதனையில் திடுக் திருப்பம்...!