கேரளாவில் ஷிகெல்லா பாக்டீரிய தொற்று வேகமாகப் பரவி வரும் பின்னணியில், எர்ணாகுளம் மாவட்டம் திரிபுனிதுராவில் உள்ள அரசு ஆயுர்வேத கல்லூரி விடுதியில் பெரும் அச்சம் ஏற்பட்டுள்ளது. விடுதியில் தங்கியிருந்த 25க்கும் அதிகமான மாணவ, மாணவிகளுக்கு கடும் வாந்தி, பேதி, வயிற்று வலி உள்ளிட்ட அறிகுறிகள் ஏற்பட்டதை அடுத்து, கல்லூரி நிர்வாகம் ஒரு வார கால விடுமுறை அறிவித்துள்ளது.

முதலில் மாணவிகள் விடுதியில் பாதிப்பு தெரியவந்த நிலையில், விரைவில் மாணவர்கள் விடுதிக்கும் தொற்று பரவியது. சுகாதாரத் துறை அதிகாரிகள் உடனடியாக விடுதியின் குடிநீர் மாதிரிகளைச் சேகரித்து பரிசோதனைக்கு அனுப்பினர். பாதிக்கப்பட்ட மாணவர்களிடமிருந்து மலம், இரத்த மாதிரிகள் எடுக்கப்பட்டு, ஷிகெல்லா அல்லது பிற பாக்டீரிய தொற்றுகள் உறுதி செய்யப்படுகின்றன. தற்போது அனைத்து மாணவர்களும் மருத்துவமனைகளில் அனுமதிக்கப்பட்டு உரிய சிகிச்சை பெற்று வருகின்றனர்.

சுகாதாரத் துறை அமைச்சர் முரளீதரன் இது குறித்து விளக்கமளிக்கையில், “ஜனவரி முதல் இதுவரை மாநிலம் முழுவதும் 146 ஷிகெல்லா பாதிப்புகள் உறுதி செய்யப்பட்டுள்ளன. இதில் ஜூன் மாதத்தில் மட்டும் 70 பேர் பாதிக்கப்பட்டுள்ளனர். அதாவது மொத்த பாதிப்புகளில் சுமார் 50 சதவீதம் இந்த மாதத்தில் ஏற்பட்டுள்ளது” என்றார். கோழிக்கோடு மாவட்டத்தில் இந்த தொற்று அதிக அளவில் பதிவாகியுள்ளது. மாநிலம் முழுவதும் இதுவரை 6 உயிரிழப்புகள் ஏற்பட்டுள்ளதாகவும் அவர் தெரிவித்தார்.

இதையும் படிங்க: கேரளாவில் பெண்களுக்கு ஃப்ரீ பஸ்..!! இன்று முதல் அமலுக்கு வந்தாச்சு..!!

ஷிகெல்லா என்பது மாசுபட்ட குடிநீர், உணவு மற்றும் அசுத்தமான கைகள் மூலம் எளிதில் பரவக்கூடிய பாக்டீரிய தொற்று ஆகும். வயிற்றுப்போக்கு, வாந்தி, காய்ச்சல், வயிற்று வலி ஆகியவை முக்கிய அறிகுறிகளாகும். குழந்தைகள், இளைஞர்கள் மற்றும் நோய் எதிர்ப்பு சக்தி குறைந்தவர்கள் இதனால் அதிகம் பாதிக்கப்படுகின்றனர். சரியான நேரத்தில் சிகிச்சை அளிக்காவிட்டால் உயிருக்கு ஆபத்து ஏற்படலாம்.இந்தச் சூழலில் கேரள அரசு தீவிர நடவடிக்கைகளை மேற்கொண்டுள்ளது. 

பள்ளி, கல்லூரி விடுதிகள், உணவகங்கள், பொதுக் குடிநீர் ஆதாரங்கள் ஆகியவற்றில் தீவிர பரிசோதனை நடைபெற்று வருகிறது. மக்களிடையே விழிப்புணர்வை ஏற்படுத்தும் வகையில் பிரசாரப் பணிகள் தீவிரப்படுத்தப்பட்டுள்ளன. சுகாதாரமான குடிநீர் பயன்படுத்துதல், கைகளை அடிக்கடி சோப்பு போட்டு கழுவுதல், உணவை நன்கு சமைத்து உண்ணுதல், அசுத்தமான உணவைத் தவிர்த்தல் போன்ற எளிய பாதுகாப்பு நடவடிக்கைகளின் மூலம் இந்தத் தொற்றைத் தடுக்க முடியும் என மருத்துவ நிபுணர்கள் அறிவுறுத்துகின்றனர்.

திரிபுனிதுரா சம்பவம் மாநிலம் முழுவதும் பெரும் பரபரப்பை ஏற்படுத்தியுள்ளது. மாணவர்களின் உடல்நிலையை அறிய பெற்றோர்கள் கவலை தெரிவித்து வருகின்றனர். அரசு மற்றும் சுகாதாரத் துறை அதிகாரிகள் தொடர்ந்து கண்காணிப்புப் பணிகளை மேற்கொண்டு வருகின்றனர். தொற்று மேலும் பரவாமல் தடுக்க அனைத்துத் தரப்பினரும் ஒத்துழைக்க வேண்டும் என அழைப்பு விடுக்கப்பட்டுள்ளது. 
 

இதையும் படிங்க: "நிபா வைரஸ் தடுப்பு நடவடிக்கை": தமிழக எல்லையில் தீவிரக் கண்காணிப்பு!