தமிழக வெற்றிக் கழகத்தில் அதிமுகவில் இருந்து வந்த முன்னாள் அமைச்சர்கள் மற்றும் முக்கிய நிர்வாகிகளுக்கு அடுத்தடுத்து கட்சிப் பொறுப்புகள் வழங்கப்பட்டுள்ள நிலையில், இதனால் கட்சியில் ஏற்கனவே பணியாற்றி வரும் சில நிர்வாகிகள் மத்தியில் அதிருப்தி ஏற்பட்டுள்ளதாக தகவல் வெளியாகியுள்ளது.

குறிப்பாக தொகுதிப் பொறுப்புகள் மற்றும் அமைப்பு ரீதியான அதிகாரங்கள் தொடர்பாக சில மாவட்ட நிர்வாகிகள் அதிருப்தியில் இருப்பதாக கட்சி வட்டாரங்கள் தெரிவிக்கின்றன.

சமீபத்தில் தவெக தலைவர் சி.ஜோசப் விஜய், 11 முன்னாள் அதிமுக அமைச்சர்கள் உள்பட 15 பேரை கட்சியின் துணைப் பொதுச்செயலாளர்களாக நியமித்தார். இதில் எம்.எஸ்.எம்.ஆனந்தன், எம்.சி.சம்பத், உடுமலை ராதாகிருஷ்ணன், கே.ராதாகிருஷ்ணன், கடம்பூர் ராஜூ உள்ளிட்ட முன்னாள் அமைச்சர்கள் இடம்பெற்றுள்ளனர். கட்சியின் அமைப்பை வலுப்படுத்தும் நோக்கில் இந்த நியமனங்கள் மேற்கொள்ளப்பட்டதாக தவெக தரப்பில் தெரிவிக்கப்பட்டுள்ளது.

இதையும் படிங்க: மாமாவ பாருடா செல்லம்.! மழலைகளை அள்ளிக் கொஞ்சிய முதல்வர்...! முத்த மழை..!!

மேலும், முன்னாள் அதிமுக எம்.எல்.ஏ. சி.மகேந்திரனுக்கு திருப்பூர் புறநகர் தெற்கு மாவட்டச் செயலாளர் பொறுப்பு வழங்கப்பட்டுள்ளதாக தகவல்கள் வெளியாகியுள்ளன. அந்த மாவட்ட அமைப்பில் மதத்துக்குளம் சட்டப்பேரவைத் தொகுதியும் இடம்பெறுகிறது. இதுபோன்ற மாற்றங்கள் ஏற்கனவே கட்சியில் பொறுப்பில் உள்ள சில நிர்வாகிகளிடையே பேசுபொருளாகியுள்ளதாக கூறப்படுகிறது.

கட்சிக்காக ஆரம்ப காலத்திலிருந்து பணியாற்றியவர்களுக்கு வழங்கப்பட்டிருந்த பொறுப்புகள் மற்றும் தொகுதிப் பணிகளில் மாற்றம் ஏற்படுவது குறித்து சில நிர்வாகிகள் தங்களது அதிருப்தியை வெளிப்படுத்தியதாக தகவல்கள் தெரிவிக்கின்றன.

அதேநேரத்தில், புதிதாக இணைந்த மூத்த அரசியல் நிர்வாகிகளின் அனுபவத்தை கட்சியின் அமைப்பு வளர்ச்சிக்கு பயன்படுத்தும் நோக்கத்திலேயே முக்கிய பொறுப்புகள் வழங்கப்படுவதாக தவெக தரப்பில் பார்க்கப்படுகிறது.

இதற்கிடையே, மதுராந்தகம் மற்றும் தாராபுரம் சட்டப்பேரவைத் தொகுதிகளுக்கு அக்டோபர் 6-ம் தேதி இடைத்தேர்தல் நடைபெற உள்ளது. இந்த தேர்தலை முன்னிட்டு பல்வேறு கட்சிகளும் தீவிர பிரசாரத்தில் ஈடுபட்டு வருகின்றன.

மதுராந்தகம் தொகுதியில் பாமக ஆதரவு யாருக்கு என்பது குறித்தும் அரசியல் வட்டாரங்களில் தொடர்ந்து விவாதம் நடைபெற்று வருகிறது. ஆனால், பாமக தலைவர் அன்புமணி ராமதாஸ், மதுராந்தகம் மற்றும் தாராபுரம் இடைத்தேர்தல்களில் அதிமுக, தவெக உள்ளிட்ட எந்தக் கட்சிக்கும் ஆதரவு இல்லை என்று அதிகாரப்பூர்வமாக அறிவித்துள்ளார்.

இந்த நிலையில், பாமக மறைமுகமாக தவெக வேட்பாளருக்கு ஆதரவளிக்க உள்ளதாக வெளியாகும் தகவல்களுக்கு இதுவரை அதிகாரப்பூர்வ உறுதிப்படுத்தல் இல்லை. தேர்தல் நெருங்கி வரும் நிலையில், கூட்டணி மற்றும் ஆதரவு தொடர்பான அரசியல் நகர்வுகள் தொடர்ந்து கவனத்தை ஈர்த்து வருகின்றன.

இதையும் படிங்க: “ஆபாசமாக பேசுவது திமுகவின் மரபணுவில் உள்ளது” - உதயநிதி பேச்சுக்கு அமைச்சர் மரிய வில்சன் பதிலடி!!