மதுராந்தகம் மற்றும் தாராபுரம் தொகுதிகளுக்கான இடைத்தேர்தல் களம் சூடுபிடித்துள்ள நிலையில், வெற்றியை குறிவைத்து தமிழக வெற்றிக் கழகம் புதிய தேர்தல் வியூகத்தை வகுத்துள்ளதாக தகவல் வெளியாகியுள்ளது. இரண்டு தொகுதிகளிலும் தேர்தல் பணிகளை தீவிரப்படுத்தும் வகையில், முக்கிய நிர்வாகிகள் மற்றும் அமைச்சர்கள் அடங்கிய குழுக்கள் நியமிக்கப்பட்டுள்ளதாக கூறப்படுகிறது.

தமிழ்நாட்டில் மதுராந்தகம் மற்றும் தாராபுரம் தொகுதிகளுக்கு அக்டோபர் 6ஆம் தேதி இடைத்தேர்தல் நடைபெற உள்ளது. அதிமுக சார்பில் வெற்றி பெற்றிருந்த மரகதம் குமரவேல் மற்றும் சத்யபாமா ஆகியோர் தங்கள் பதவிகளை ராஜினாமா செய்து தவெகவில் இணைந்ததை தொடர்ந்து இந்த இடைத்தேர்தல் நடைபெறுகிறது. இதனால் இரு தொகுதிகளிலும் அரசியல் கட்சிகளின் கவனம் திரும்பியுள்ளது.

இந்நிலையில், மதுராந்தகம் தொகுதிக்கான தேர்தல் பொறுப்பாளராக ஆதவ் அர்ஜுனா தலைமையில் 5 அமைச்சர்களும், தாராபுரம் தொகுதிக்கான பொறுப்பாளராக செங்கோட்டையன் தலைமையில் 5 அமைச்சர்களும் தேர்தல் பணிகளை மேற்கொள்ள உள்ளதாக தகவல் தெரிவிக்கிறது. வாக்குச்சாவடி அளவிலான பணிகள் முதல் பிரசார நடவடிக்கைகள் வரை ஒருங்கிணைக்க திட்டமிடப்பட்டுள்ளதாக கூறப்படுகிறது.

இதையும் படிங்க: விஜய் vs ஸ்டாலின்! திமுகவை விடப்போவதில்லை! அடுத்த 3 மாதங்களுக்கு தவெகவின் ‘மாஸ்டர் பிளான்’ இதுதானா?

மேலும், தவெக ஆதரவு கட்சிகளின் கூட்டம் நடைபெற உள்ள நிலையில், கூட்டணிக்கு பெயர் சூட்டப்படலாம் என்றும் தகவல் வெளியாகியுள்ளது. இதன் மூலம் இடைத்தேர்தல் களத்தில் தவெக கூடுதல் பலத்துடன் இறங்கும் என எதிர்பார்க்கப்படுகிறது.

தவெக சார்பில் மரகதம் குமரவேல் மற்றும் திலகபாமா ஆகியோர் வேட்பாளர்களாக களமிறங்க வாய்ப்புள்ளதாகவும் கூறப்படுகிறது. அதே நேரத்தில் திமுக மற்றும் அதிமுகவும் களத்தில் இருப்பதால், மூன்று கட்சிகளுக்கு இடையே கடும் போட்டி உருவாகும் சூழல் ஏற்பட்டுள்ளது.

இரண்டு தொகுதிகளிலும் முதல்வர் விஜய் ரோடு ஷோ நடத்தி, பொதுக்கூட்டங்களில் பங்கேற்க உள்ளதாகவும் தகவல் வெளியாகியுள்ளது. இதனால் தவெக தொண்டர்கள் உற்சாகமடைந்துள்ளனர்.

ஆனால் மதுராந்தகம், தாராபுரம் ஆகிய தொகுதிகளில் அதிமுகவுக்கும் வலுவான வாக்கு அடித்தளம் இருப்பதாக பார்க்கப்படுகிறது. இதனால் அதிமுக வாக்குகளை தவெக பக்கம் திருப்புவது முக்கிய சவாலாக இருக்கும். குறிப்பாக எடப்பாடி பழனிசாமி தொடர்பான விஜய்யின் அரசியல் நிலைப்பாடு பிரசாரத்தில் முக்கிய விவாதமாக மாறுமா என்ற எதிர்பார்ப்பும் எழுந்துள்ளது.

இதையும் படிங்க: யாருக்கு வெற்றி வாய்ப்பு.? விறுவிறு அரசியல் களம்... இடைத் தேர்தல் வேட்பு மனுத் தாக்கல் தொடக்கம்.!!