சென்னை: தி.மு.க.,வின் தற்போதைய சரிவிலிருந்து கட்சியை மீட்டெடுக்க எதிர்க்கட்சித் தலைவர் உதயநிதி ஸ்டாலின் தமிழகம் முழுவதும் நடைபயணம் மேற்கொள்ள திட்டமிட்டுள்ளதாக கட்சி வட்டாரங்கள் தெரிவிக்கின்றன. இந்த நடவடிக்கை மூலம் மக்களை நேரடியாகச் சந்தித்து கட்சியை வலுப்படுத்தவும், அடுத்த சட்டசபைத் தேர்தலுக்கு தயாராகவும் தி.மு.க., தலைமை முடிவு செய்துள்ளது.

சமீபத்தில் நடைபெற்ற தமிழக சட்டசபைத் தேர்தலில் 20க்கும் மேற்பட்ட கட்சிகளுடன் கூட்டணி அமைத்தும் தி.மு.க., தோல்வியைத் தழுவியது. முதல்வர் வேட்பாளராக இருந்த மு.க. ஸ்டாலின் கூட சென்னை கொளத்தூர் தொகுதியில் தோல்வியடைந்தார். இந்த தோல்விக்கான காரணங்களை ஆராய ஒரு குழுவை ஸ்டாலின் அமைத்துள்ளார். 

கடந்த 2011ல் பெரிய பின்னடைவைச் சந்தித்த தி.மு.க., 2016 தேர்தலுக்கு முன்பாக 2015 செப்டம்பரில் ஸ்டாலின் சுற்றுப்பயணத்தைத் தொடங்கினார். அந்த பயணம் அவரை மக்கள் மத்தியில் பெரிய அளவில் அறிமுகப்படுத்தியது. அதே பாணியில் உதயநிதியை கட்சியின் அடுத்த தலைவராக வளர்க்க ஸ்டாலின் திட்டமிட்டுள்ளார். ஆந்திர மாநில அரசியல் பாணியில் பிரமாண்ட நடைபயணத்தை மேற்கொள்ள உதயநிதிக்கு அறிவுறுத்தப்பட்டுள்ளது.

இதையும் படிங்க: வீதி வீதியாக சென்று நன்றி: சேப்பாக்கம் மக்களிடையே உதயநிதி ஸ்டாலின் நெகிழ்ச்சி!

தற்போது தமிழக முதல்வராக விஜய் பெரும் வெற்றி பெற்றுள்ள நிலையில், அவரை எதிர்கொள்ள இப்போதே களத்தில் இறங்க வேண்டும் என தி.மு.க., தலைமை நினைக்கிறது. உதயநிதியின் நடைபயணம் மக்களின் பிரச்சினைகளை நேரடியாகக் கேட்பதோடு, கட்சி நிர்வாகிகள் மற்றும் தொண்டர்களை உற்சாகப்படுத்தி, கட்சி கட்டமைப்பை முழுமையாக சீரமைக்கும் நோக்கத்துடன் வடிவமைக்கப்பட்டுள்ளது.

கோடை வெயில் தீவிரம் குறைந்த பிறகு இந்த நடைபயணம் தொடங்கும் என எதிர்பார்க்கப்படுகிறது. தமிழகத்தின் அனைத்து மாவட்டங்களிலும் பயணம் செய்ய உதயநிதி திட்டமிட்டுள்ளார். இந்த பயணத்தின் மூலம் தி.மு.க.,வுக்கு புதிய ஆற்றல் கிடைக்கும் என்று கட்சி மூத்த நிர்வாகிகள் நம்பிக்கை தெரிவிக்கின்றனர்.

2011 தோல்விக்குப் பிறகு ஸ்டாலின் மேற்கொண்ட பயணம் கட்சியை மீட்டெடுக்க உதவியதைப் போலவே, உதயநிதியின் நடைபயணமும் தி.மு.க.,வுக்கு புதிய உயிர் கொடுக்கும் என கட்சியினர் பார்க்கின்றனர். அடுத்த சட்டசபைத் தேர்தலில் வெற்றி பெறும் இலக்குடன் தி.மு.க., தனது தேர்தல் தயாரிப்புகளை தீவிரப்படுத்தியுள்ளது.

இதையும் படிங்க: தமிழக சட்டசபைத் தேர்தல்: வரலாற்றில் மறக்க முடியாத திருப்பம்..!! எதிர்க்கட்சி தலைவராகிறார் உதயநிதி ஸ்டாலின்..??