தமிழகத்தில் வடகிழக்குப் பருவமழை தீவிரமடைந்துள்ள நிலையில், பல்வேறு மாவட்டங்களில் தொடர்ந்து மழை பெய்து வருகிறது. குறிப்பாக, நீலகிரி, கோவை, கன்னியாகுமரி உள்ளிட்ட மாவட்டங்களில் கனமழை முதல் மிகக் கனமழை வரை பெய்யக்கூடும் என வானிலை ஆய்வு மையம் எச்சரித்துள்ளது. அக்டோபர் 24 முதல் 26-ஆம் தேதி வரை மழை நீடிக்க வாய்ப்புள்ளதாகவும் தெரிவிக்கப்பட்டுள்ளது

தமிழகத்தில் தொடர்ந்து பெய்து வரும் கனமழையால் தாழ்வான பகுதிகளில் மழைநீர் தேங்குதல், சாலைப் போக்குவரத்தில் பாதிப்பு உள்ளிட்ட பிரச்சினைகள் ஏற்பட்டு வருகின்றன. மழையின் தீவிரத்தைக் கருத்தில் கொண்டு, பல மாவட்டங்களில் முன்னெச்சரிக்கை நடவடிக்கைகள் மேற்கொள்ளப்பட்டு வருகின்றன.

நீலகிரி மாவட்டத்தில் இன்று கனமழை முதல் மிகக் கனமழை வரை பெய்யக்கூடும் என எச்சரிக்கை விடுக்கப்பட்டுள்ளது. மலைப்பகுதிகளில் மழை தீவிரமடையும் சூழலில், மண் சரிவு ஏற்படக்கூடிய பகுதிகள், மலைச்சாலைகள் மற்றும் நீர்நிலைகளுக்கு அருகிலுள்ள இடங்களில் கூடுதல் எச்சரிக்கையுடன் இருக்க வேண்டிய அவசியம் ஏற்பட்டுள்ளது. 

குறிப்பாக நீலகிரி மாவட்டத்தில் உதகமண்டலம், குன்னூர், கோத்தகிரி, குந்தா, கூடலூர், பந்தலூர் உள்ளிட்ட பகுதிகளில் மழையின் தாக்கம் குறித்து தொடர்ந்து கண்காணிக்கப்பட்டு வருகின்றன. இதனிடையே நேற்று இரவு  முதலே அப்பகுதிகளில் மழை பெய்து வருவதால், உதகமண்டலம், குன்னூர், கோத்தகிரி, குந்தா, கூடலூர், பந்தலூர் ஆகிய ஆறு வட்டங்களில் உள்ள பள்ளிகளுக்கு மட்டும் இன்று விடுமுறை அறிவிக்கப்பட்டுள்ளது.