தமிழகம் முழுவதற்குமான இறுதி வாக்காளர் பட்டியல் இன்று வெளியிடப்படுகிறது. இது வரும் 2026 சட்டமன்றத் தேர்தலுக்கு முன்பாக மிக முக்கியமான படியாகும். தேர்தல் ஆணையத்தின் சிறப்பு தீவிர திருத்தம் என்ற பெரிய முயற்சியின் இறுதிக் கட்டமாக இது அமைகிறது. கடந்த ஆண்டு அக்டோபர் மாதம் வரை தமிழகத்தில் சுமார் 6.41 கோடி வாக்காளர்கள் இருந்தனர்.

ஆனால் SIR திருத்தப் பணிகள் தொடங்கிய பிறகு, நவம்பர் 4-ம் தேதி முதல் வீடு வீடாக கணக்கெடுப்பு நடத்தப்பட்டது. டிசம்பர் 19-ம் தேதி வரைவு வாக்காளர் பட்டியல் வெளியிடப்பட்டபோது, அதில் சுமார் 5.43 கோடி பேர்தான் இடம்பெற்றிருந்தனர். அதாவது, கிட்டத்தட்ட 97 லட்சம் பெயர்கள் நீக்கப்பட்டிருந்தன. இதில் பலர் இறந்தவர்கள், இடமாறியவர்கள், இரட்டைப் பதிவு உள்ளவர்கள், ஆதார் அல்லது ஆவணங்கள் இல்லாதவர்கள் போன்ற பிரிவுகளைச் சேர்ந்தவர்கள் என கூறப்பட்டது.

வரைவு பட்டியல் வெளியான பிறகு, டிசம்பர் 19 முதல் பிப்ரவரி 10 வரை மக்களுக்கு உரிமைகோரல் மற்றும் ஆட்சேபனை தெரிவிக்கும் கால அவகாசம் கொடுக்கப்பட்டது. லட்சக்கணக்கானோர் தங்கள் பெயரைச் சேர்க்கவோ, திருத்தவோ, தவறாக நீக்கப்பட்டதை மீட்டெடுக்கவோ விண்ணப்பித்திருந்தனர். இந்த விண்ணப்பங்கள் அனைத்தும் மாவட்ட அளவிலான தேர்தல் பதிவு அலுவலர்களால் சரிபார்க்கப்பட்டு, தேவையான ஆவணங்கள், சுய உறுதிமொழி போன்றவை ஆய்வு செய்யப்பட்டன.

இதையும் படிங்க: புதுவையில் இறுதி வாக்காளர் பட்டியல் வெளியீடு...! தேர்தல் ஆணையம் அதிகாரப்பூர்வ அறிவிப்பு..!

இப்போது அந்த அனைத்துப் பணிகளும் முடிந்த நிலையில், இன்று தமிழக தலைமை தேர்தல் அதிகாரி அர்ச்சனா பட்நாயக் சென்னை தலைமைச் செயலகத்தில் இருந்து மாநில அளவிலான இறுதித் தரவுகளை வெளியிடுகிறார். மாவட்டங்கள் தோறும் உள்ளூர் அலுவலகங்கள், பஞ்சாயத்து அலுவலகங்கள், வார்டு அலுவலகங்கள் போன்ற இடங்களில் இறுதி பட்டியல் காட்சிப்படுத்தப்படும். இணையத்தில் voters.eci.gov.in அல்லது tn.gov.in தளங்களில் தொகுதி வாரியாக PDF வடிவில் பதிவிறக்கம் செய்யலாம். இந்த இறுதி பட்டியலில் பெயர் இல்லையென்றால், இனி வரும் தேர்தலில் வாக்களிக்க முடியாது என்பதால், அனைவரும் தங்கள் பெயரை உறுதி செய்துகொள்ள வேண்டும் என கூறப்பட்டுள்ளது. 

இதையும் படிங்க: நெருங்கும் சட்டமன்றத் தேர்தல்... பரபரக்கும் தமிழகம்... துணை தேர்தல் ஆணையர் தமிழகம் வருகை..!