தமிழகத்தில் தி.மு.க-காங்கிரஸ் கூட்டணியில் காங்கிரஸ் கட்சியினர் அதிருப்தி தெரிவித்து வருகின்றனர். ஆட்சியில் சமமான பங்கு, கூடுதல் தொகுதிகள், தொகுதி மேம்பாட்டு நிதி உள்ளிட்ட கோரிக்கைகளை வலியுறுத்தி முன்னாள் தலைவர்கள் அழகிரி, திருநாவுக்கரசர், எம்பி-கள் மாணிக்தாகூர், கார்த்தி சிதம்பரம், விஜய் வசந்த், சட்டமன்ற காங்கிரஸ் தலைவர் ராஜேஷ்குமார் உள்ளிட்டோர் பேசி வருகின்றனர்.

 இந்நிலையில், சென்னை சத்தியமூர்த்தி பவனில் நடந்த ஆலோசனைக் கூட்டத்தில், காங்கிரஸ் எம்எல்ஏ-க்கள் தங்கள் புகார்களை வெளிப்படையாகத் தெரிவித்தனர். மேலிட பொறுப்பாளர் கிரிஷ் சோடங்கர், சோனியா காந்தி, ராகுல் காந்தி, கார்கே ஆகியோரை சந்திக்க அனுமதி வாங்கித் தருவதாக உறுதியளித்தார்.

நேற்றுமுன்தினம் (அக்டோபர் 13) நடந்த கூட்டத்தில், காங்கிரஸ் எம்எல்ஏ-க்கள் தி.மு.க கூட்டணியில் தங்கள் கட்சியின் பங்கு குறைவு என கடுமையாக விமர்சித்தனர். "தி.மு.க., கூட்டணியில் காங்கிரஸ் பெயர் அளவிற்கே உள்ளது. அந்த அளவுக்குத்தான் தி.மு.க., காங்கிரஸை நடத்துகிறது. தமிழகத்தில் தி.மு.க தனித்து ஆட்சி நடத்துகிறது; அதனால் கூட்டணி கட்சிகள் புறக்கணிக்கப்படுகின்றன" என சில எம்எல்ஏ-க்கள் கூறினர்.

இதையும் படிங்க: இது அதிமுகவுக்கு நடக்கலையே! தவெக ஏற்பாடு சரியா இல்ல… சட்டப்பேரவையில் முதல்வர் பேச்சு…!

மேலும், "நம் எம்எல்ஏ-க்களுக்கு மரியாதை இல்லை. அமைச்சர்களிடம் தொகுதி மேம்பாட்டு வேலைகள் நடப்பதில்லை. முக்கிய துறைகளை தி.மு.க தான் கையாளுகிறது. தி.மு.க அரசின் பெரும்பாலான முடிவுகளில் அக்கட்சியின் ஆதிக்கமே காணப்படுகிறது. இதனால் நாங்கள் புறக்கணிக்கப்பட்டதாகவே கருதுகிறோம்" என வெளிப்படையாக புகார் தெரிவித்தனர். இந்த விமர்சனங்கள், கட்சி வட்டாரங்களால் உறுதிப்படுத்தப்பட்டுள்ளன.

எம்எல்ஏ-க்களின் குறைகளைக் கேட்ட பின், காங்கிரஸ் மேலிட பொறுப்பாளர் கிரிஷ் சோடங்கர் பேசினார். "இப்போது தான் இதையெல்லாம் என்னிடம் சொல்கிறீர்கள். ஏற்கனவே பலமுறை தமிழகம் வந்து உங்களைச் சந்தித்துள்ளேன். அப்போது எதுவும் சொல்லாமல் இருந்து விட்டு, தோண்டித் துருவி எல்லாவற்றையும் நான் கேட்டபின் ஒவ்வொரு விஷயமாக சொல்கிறீர்கள்" என சாடினார்.

மேலும், "கூட்டணி குறித்து இனி யாரும் பொதுவெளியில் பேச வேண்டாம். ஒவ்வொருவருக்கும் உள்ள கருத்தை சோனியா, ராகுல், கார்கே ஆகியோரிடம் சொல்லுங்கள். அதற்காக டெல்லி வாருங்கள்; நானே அவர்களிடம் அப்பாயின்ட்மென்ட் வாங்கித் தருகிறேன். அவர்களும் உங்கள் கருத்தை கேட்கட்டும். அதன்பின் அவர்கள் கூட்டணி குறித்து இறுதி முடிவெடுக்கட்டும். அந்த முடிவை அனைவரும் ஏற்க வேண்டும். அதுவரை அமைதியாகவே இருங்கள்" என அறிவுறுத்தினார். 

தமிழகத்தில் தி.மு.க-காங்கிரஸ் கூட்டணி 2021 சட்டமன்றத் தேர்தலில் வெற்றி பெற்றது. ஆனால், 2026 தேர்தலுக்கு முன் கூட்டணியில் பிளவுகள் தெரிகின்றன. காங்கிரஸ் 25 தொகுதிகளில் போட்டியிட்டு 9 இடங்களில் வென்றது. இப்போது, ஆட்சியில் சமமான பங்கு, தொகுதி நிதி உள்ளிட்டவற்றை கோரி குரல்கள் எழுகின்றன. கிரிஷ் சோடங்கரின் அறிவுறுத்தல், கூட்டணியை வலுப்படுத்தும் முயற்சியாகக் கருதப்படுகிறது.

இந்த சர்ச்சை, 2026 தேர்தலில் கூட்டணியின் எதிர்காலத்தைப் பாதிக்கலாம். காங்கிரஸ் உயர்தலைவர்கள் என்ன முடிவெடுப்பார்கள் என்பது கவனிக்கத்தக்கது.

இதையும் படிங்க: ஏழு மணி நேரம் கழித்து தான் விஜய் வந்தார்… கரூரில் என்ன நடந்தது? சட்டப்பேரவையில் முதல்வர் விளக்கம்…!