இலங்கை கடற்படையினரால் கைது செய்யப்பட்டு அந்நாட்டுச் சிறைகளிலும் காவல்களிலும் அடைக்கப்பட்டுள்ள தமிழகத்தைச் சேர்ந்த 20 மீனவர்களையும், இதுவரை சிறைபிடிக்கப்பட்டு முடக்கி வைக்கப்பட்டுள்ள தமிழக மீனவர்களின் 270-க்கும் மேற்பட்ட விசைப்படகுகள் மற்றும் நாட்டுப் படகுகளையும் எந்தவித நிபந்தனையுமின்றி உடனடியாக விடுவிக்க விரைந்து நடவடிக்கை எடுக்க வேண்டும் என வலியுறுத்தி, மத்திய வெளியுறவுத்துறை அமைச்சர் எஸ்.ஜெய்சங்கருக்குத் தமிழ்நாடு முதலமைச்சர் திரு. விஜய் அவர்கள் இன்று அவசரக் கடிதம் ஒன்றை எழுதியுள்ளார்.

தமிழகத்தின் கடலோரப் பகுதிகளைச் சேர்ந்த எளிய மீனவர்கள் தங்களது பாரம்பரிய மீன்பிடிப் பகுதிகளில் வழக்கம்போல மீன்பிடிக்கச் செல்லும்போது, இலங்கை கடற்படையினர் எல்லை தாண்டி வந்ததாகக் கூறி அவர்களைத் தொடர்ந்து கைது செய்வதும், அவர்களது படகுகளைப் பறிமுதல் செய்து அரசுடைமையாக்குவதும் தொடர்கதையாகி வருகிறது.

 அண்மைக் காலங்களில் நடைபெற்ற இத்தகைய அத்துமீறிய நடவடிக்கைகளின் போது கைது செய்யப்பட்ட 20 தமிழக மீனவர்கள் தற்போது வரை இலங்கை சிறைக் காவலில் சொல்லொணாத் துயரங்களை அனுபவித்து வருகின்றனர்; மேலும், தமிழக மீனவர்களின் முதன்மை வாழ்வாதாரமான சுமார் 270 படகுகளும் இலங்கை அரசின் பிடியில் பல மாதங்களாக முடங்கிக் கிடக்கின்றன.

இதையும் படிங்க: SIR-ல் அதிக வாக்காளர்கள் நீக்கப்பட்ட இடங்களில் தவெக வெற்றி: பிசினஸ் லைன் ஆய்வில் தகவல்!

இப்பிரச்சினைக்கு உடனடித் தீர்வு காணும் வகையில் முதல்வர் விஜய் மத்திய அரசுக்கு எழுதியுள்ள கடிதத்தில், "தமிழக மீனவர்களின் வாழ்வாதாரமும் அவர்களது குடும்பங்களின் பாதுகாப்பும் மிகக் கடுமையான நெருக்கடியில் தள்ளப்பட்டுள்ளது; கடலுக்குச் செல்லும் மீனவர்கள் அச்சமின்றித் தொழில் செய்வதற்கு உகந்த சூழலை உருவாக்குவது அவசியமாகும்.

 தற்போது இலங்கை அதிகாரிகளின் பிடியில் உள்ள 20 தமிழக மீனவர்களைத் தூதரக ரீதியிலான முயற்சிகள் மூலம் எந்தவிதத் தாமதமுமின்றி உடனடியாக விடுதலை செய்து தாயகம் அழைத்து வர வேண்டும்; அதேபோன்று, இலங்கை வசம் முடங்கிக் கிடக்கும் நமது மீனவர்களின் 270 படகுகளையும் பாதுகாப்பாக மீட்டுத் தமிழகத்திற்குத் திரும்பக் கொண்டுவர வெளியுறவுத்துறை அமைச்சகம் உரிய ராஜீய நடவடிக்கைகளை உடனடியாக முன்னெடுக்க வேண்டும்" என்று மிக அழுத்தமாகக் கேட்டுக்கொண்டுள்ளார்.

மீனவர்களின் கைது நடவடிக்கைகளால் அவர்களது குடும்பத்தினர் தங்களது அன்றாட வாழ்வாதாரத்தை இழந்து தவித்து வரும் நிலையில், தமிழக அரசு எடுத்துள்ள இந்தத் தீவிர முன்னெடுப்பு மீனவ கிராமங்கள் மத்தியில் பெரும் நம்பிக்கையை ஏற்படுத்தியுள்ளது.

 மத்திய அரசு இந்த விவகாரத்தில் உடனடியாகத் தலையிட்டு இலங்கை அரசுடன் உயர்மட்டப் பேச்சுவார்த்தைகளைத் தொடங்கி மீனவர்களையும் படகுகளையும் மீட்க வேண்டும் என ஒட்டுமொத்த மீனவ சமூகமும் எதிர்பார்த்துக் காத்துக் கொண்டிருக்கிறது.

இதையும் படிங்க: மதுக்கடைகளை விட மலைகளைக் காப்பது முக்கியம்: உயர்நீதிமன்ற மதுரை கிளை ஆவேசம்!