தமிழ்நாடு சட்டமன்றத் தேர்தல் வரும் ஏப்ரல் 23-ம் தேதி நடைபெற உள்ள நிலையில், தி.மு.க.வில் ஒரு முக்கிய சலசலப்பு ஏற்பட்டுள்ளது. முன்னாள் அமைச்சர் அன்பழகனின் பேரனும், வில்லிவாக்கம் தொகுதி எம்.எல்.ஏ.,வுமான வெற்றியழகனுக்கு இம்முறை தொகுதி வாய்ப்பு மறுக்கப்பட்டுள்ளது. இந்த முடிவு கட்சிக்குள் அதிருப்தியை ஏற்படுத்தியுள்ளது.

கருணாநிதியின் நெருங்கிய நண்பர்களில் ஒருவராகவும், தி.மு.க.வின் மூத்த தலைவர்களில் ஒருவராகவும் விளங்கிய அன்பழகன், பல ஆண்டுகள் அமைச்சராகப் பணியாற்றியவர். உடல்நலக் குறைவு காரணமாக தேர்தல் களத்திலிருந்து ஒதுங்கிய அவர், பின்னர் மறைந்தார். அவரது மறைவுக்குப் பிறகு, 2021 சட்டமன்றத் தேர்தலில் வில்லிவாக்கம் தொகுதியில் அவரது பேரன் வெற்றியழகனுக்கு வாய்ப்பு அளிக்கப்பட்டது.

அந்தத் தேர்தலில் அ.தி.மு.க. வேட்பாளர் ஜே.சி.டி. பிரபாகரை 37,000 வாக்குகள் வித்தியாசத்தில் தோற்கடித்து வெற்றி பெற்றார் வெற்றியழகன். அவருக்கு அமைச்சர் பதவி கிடைக்கும் என்ற எதிர்பார்ப்பு இருந்தாலும், அது நிறைவேறவில்லை. கடந்த ஐந்து ஆண்டுகளாக எம்.எல்.ஏ.,வாக இருந்தும், கட்சி பணிகளில் அவர் பெரிதாக கவனம் செலுத்தவில்லை என்ற கருத்து கட்சிக்குள் நிலவியது.

இதையும் படிங்க: கணவர் கொலைக்கு நீதி வேண்டும்!! அதற்காகவே போட்டியிடுகிறேன்! பொற்கொடி ஆம்ஸ்ட்ராங் உருக்கம்!

இந்நிலையில், 2026 தேர்தலுக்கான வேட்பாளர் தேர்வில் வில்லிவாக்கம் தொகுதியில் வெற்றியழகனுக்கு வாய்ப்பு மறுக்கப்பட்டுள்ளது. அதற்கு பதிலாக, அண்ணா நகர் எம்.எல்.ஏ., மோகனின் மகன் கார்த்திக்குக்கு தொகுதி ஒதுக்கப்பட்டுள்ளது. 

அன்பழகன் ஆதரவாளர்கள் மத்தியில் இந்த முடிவு பெரும் அதிருப்தியை ஏற்படுத்தியுள்ளது. மூத்த தலைவர்களின் வாரிசுகளுக்கு சீட் வழங்கப்படும் போது, அன்பழகன் குடும்பத்துக்கு மட்டும் வாய்ப்பு மறுக்கப்பட்டது ஏன் என்ற கேள்வி எழுந்துள்ளது.

தி.மு.க.வில் பல அமைச்சர்கள் மற்றும் முக்கிய நிர்வாகிகளின் மகன்களுக்கு இம்முறை வாய்ப்பு அளிக்கப்பட்டுள்ள நிலையில், வெற்றியழகனுக்கு சீட் மறுக்கப்பட்டது கட்சியின் உள்கட்சி அரசியலில் புதிய விவாதத்தை உருவாக்கியுள்ளது. வெற்றியழகன் தரப்பில் இன்னும் அதிகாரப்பூர்வமான எந்தப் பதிலும் வரவில்லை என்றாலும், அன்பழகன் ஆதரவாளர்கள் மத்தியில் அதிருப்தி அதிகரித்து வருகிறது.

வேட்புமனு தாக்கல் நாளை தொடங்க உள்ளதால், தி.மு.க.வின் இறுதி வேட்பாளர் பட்டியல் விரைவில் முழுமையாக வெளியாகும் என்று எதிர்பார்க்கப்படுகிறது. இந்த சலசலப்பு தி.மு.க.வின் தேர்தல் தயாரிப்புகளில் ஏதேனும் பாதிப்பை ஏற்படுத்துமா என்பது அரசியல் வட்டாரங்களின் கவனத்தை ஈர்த்துள்ளது.

தேர்தல் நடத்தை விதிகள் அமலில் உள்ள நிலையில், அனைத்து கட்சிகளும் விதிமுறைகளை கடைப்பிடித்து பிரசாரத்தை முன்னெடுக்க வேண்டும் என்று தேர்தல் ஆணையம் வலியுறுத்தியுள்ளது. 

இதையும் படிங்க: இன்று வெளியாகிறது திமுக தேர்தல் அறிக்கை!! இடம்பெறும் கவர்ச்சிகர அறிவிப்புகள்!! நீளும் இலவசங்கள்!!