மதுராந்தகம் மற்றும் தாராபுரம் சட்டமன்ற இடைத்தேர்தலில் ஆளும் தமிழக வெற்றிக் கழகம் பெற்றிருப்பது அதிகார பலத்திற்கும் பணநாயகத்திற்கும் கிடைத்த தற்காலிக வெற்றி மட்டுமே என்றும், புரட்சித் தலைவர் எம்.ஜி.ஆரும் புரட்சித் தலைவி அம்மாவும் கட்டிக் காத்த அனைத்திந்திய அண்ணா திராவிட முன்னேற்றக் கழகம் தகர்க்க முடியாத இரும்புக் கோட்டை என்றும் அதிமுக பொதுச்செயலாளரும் தமிழ்நாடு முன்னாள் முதலமைச்சருமான எடப்பாடி கே. பழனிசாமி திட்டவட்டமாகத் தெரிவித்துள்ளார்.

மதுராந்தகம் மற்றும் தாராபுரம் இடைத்தேர்தல் முடிவுகள் வெளியாகி தவெக வேட்பாளர்கள் வெற்றி பெற்றுள்ளதாக அறிவிக்கப்பட்டதைத் தொடர்ந்து, அதிமுக பொதுச்செயலாளர் எடப்பாடி பழனிசாமி இன்று விரிவான அதிகாரப்பூர்வ அறிக்கை ஒன்றை வெளியிட்டுள்ளார். அதில், தேர்தல் களத்தில் அதிமுக வேட்பாளர்களுக்கு வாக்களித்த வாக்காளப் பெருமக்களுக்கும், அயராது களப்பணியாற்றிய அதிமுக தொண்டர்கள் மற்றும் கூட்டணிக் கட்சித் தலைவர்களுக்கும் தனது நெஞ்சார்ந்த நன்றியைத் தெரிவித்துக் கொண்டுள்ளார்.

அந்த அறிக்கையில், கடந்த ஐந்து மாதங்களுக்கு முன்பு நடைபெற்ற சட்டமன்றப் பொதுத்தேர்தலில் எந்தக் கட்சிக்கும் பெரும்பான்மை கிடைக்காத நிலையில், ஒருசில கட்சிகளின் ஆதரவோடு மைனாரிட்டி ஆட்சியை அமைத்த தவெக, மெஜாரிட்டி அரசாக மாற வேண்டும் என்ற பேராசையோடு அதிமுக சட்டமன்ற உறுப்பினர்களிடம் குறுக்கு வழியில் குதிரை பேரத்தை நடத்தியதன் விளைவாகவே இந்த இடைத்தேர்தல் மக்கள் மீது திணிக்கப்பட்டது என்று சுட்டிக்காட்டியுள்ளார்.

இதையும் படிங்க: தமிழகம் தூய சக்தியின் கோட்டை என்பதை மக்கள் நிரூபித்துள்ளனர்! முதல்வர் விஜய் அறிக்கை!

ஆளுங்கட்சியின் அதிகார அத்துமீறல்களைக் கடுமையாகச் சாடிய அவர், பண பலம், அதிகார பலம் மற்றும் ஒட்டுமொத்த அமைச்சரவையையும் களமிறக்கி ஆளுங்கட்சி தேர்தலை எதிர்கொண்டது. அதிமுக தாராபுரம் தொகுதி வேட்பாளர் மற்றும் தொண்டர்கள் மீது பொய் வழக்குகள் புனையப்பட்டன; மாவட்டக் கழகச் செயலாளரையே சட்டவிரோதமாக அடைத்து வைத்து, நிர்வாகிகளை அச்சுறுத்தி தவெகவில் இணைக்கும் அராஜகங்கள் அரங்கேறின.

அரை மணி நேரம் பேசினாலே கொத்துப் புரோட்டா என்று வீர வசனம் பேசிய முதல்வர் விஜய், இந்தத் தேர்தலுக்காகத் தெருத்தெருவாக அலைந்து விசில் ஊதவேண்டிய நிலைக்குத் தள்ளப்பட்டார். காவல் துறையால் தேடப்படும் குற்றவாளியுடன் ரேக்ளா மாட்டு வண்டியில் வலம் வந்து, ஜனநாயகப் படுகொலை செய்தே ஆளும் கட்சி இந்த வெற்றியைப் பெற்றுள்ளது எனக் குற்றம்சாட்டியுள்ளார்.

தேர்தல் முடிவுகள் குறித்துப் பேசிய எடப்பாடி பழனிசாமி, பொதுவாக இடைத்தேர்தல்கள் ஆளும் கட்சிக்குச் சாதகமாகவே அமையும். நான் முதலமைச்சராக இருந்தபோது கூட விக்கிரவாண்டி, நாங்குநேரி இடைத்தேர்தல்களில் அதிமுக வெற்றி பெற்றது. தீர்ந்துபோன சக்தி என்றும், மற்றும் பலர் என்றும் நம்மை ஏளனம் செய்தவர்களுக்கு, இந்த இடைத்தேர்தல் மரண பயத்தைக் காட்டியிருக்கிறது. அதிமுக கோட்டைக்குள் நுழைந்துவிட்டதாக தவெக கனவு காணலாம்; ஆனால் இது தற்காலிக வெற்றி மட்டுமே. இதை வைத்து அதிமுகவை அழித்துவிடலாம் என்று யாரும் பகற்கனவு காண வேண்டாம் என்று எச்சரித்துள்ளார்.

மேலும், தர்மத்தின் வாழ்வுதனை சூது கவ்வும், இறுதியில் தர்மமே வெல்லும். ரீல்ஸ் ஆட்சியில் ரீல்ஸ்களில் மயங்கி மக்கள் வாக்களித்திருந்தாலும், அதிமுக ஆட்சி அமைய வாய்ப்பில்லை என்பது தெரிந்த நிலையிலும் இரு தொகுதிகளிலும் நமக்கு கணிசமான வாக்குகள் கிடைத்துள்ளன. பிள்ளை பிடிக்கும் கும்பல் போல நமது எம்.எல்.ஏ-க்களை விலைபேசிப் பிடித்தே ஆட்சியில் இருக்கும் தவெக என்ற தற்காலிக வெற்றிக் கழகத்தின் இந்தச் சோதனையையும் அதிமுக நிச்சயம் முறியடிக்கும் என்று சூளுரைத்துள்ளார்.

இறுதியாக, அதிமுகவிற்குத் தேர்தல் களத்தில் தோளோடு தோள் நின்ற பாரதிய ஜனதா கட்சி, அம்மா மக்கள் முன்னேற்றக் கழகம், புதிய நீதிக் கட்சி, இந்திய ஜனநாயகக் கட்சி, பெருந்தலைவர் மக்கள் கட்சி, தமிழ் மாநில முஸ்லீம் லீக் உள்ளிட்ட தோழமைக் கட்சிகளின் தலைவர்களுக்கும், இரவு பகலாக உழைத்த அதிமுகவின் அனைத்து நிலை நிர்வாகிகள் மற்றும் தொண்டர்களுக்கும் தனது இதயபூர்வமான நன்றியை எடப்பாடி பழனிசாமி தெரிவித்துள்ளார்.

இதையும் படிங்க: துரோகத்துக்கு கிடைத்த இடைக்கால வெற்றி! இடைத்தேர்தல் முடிவு குறித்து மு.க.ஸ்டாலின் அறிக்கை!