நாகோயா: ஜப்பானில் நடைபெற்று வரும் 2026 ஆசிய விளையாட்டுப் போட்டியில் இந்திய துப்பாக்கிச் சுடுதல் வீராங்கனை இளவேனில் வாலறிவன் ஒரே நாளில் இரண்டு வெள்ளிப் பதக்கங்களை வென்று சாதனை படைத்துள்ளார். பெண்களுக்கான 10 மீட்டர் ஏர் ரைபிள் அணிப் பிரிவிலும், தனிநபர் பிரிவிலும் அவர் வெள்ளிப் பதக்கம் வென்றுள்ளார். இதையடுத்து அவருக்கு பல்வேறு தரப்பினரும் வாழ்த்து தெரிவித்து வருகின்றனர்.

ஆசிய விளையாட்டுப் போட்டியின் முதல் நாளிலேயே இந்தியாவின் பதக்க வேட்டையை துப்பாக்கிச் சுடுதல் அணியினர் தொடங்கி வைத்தனர். பெண்களுக்கான 10 மீட்டர் ஏர் ரைபிள் அணிப் போட்டியில் இளவேனில் வாலறிவன், சோனம் மாஸ்கர், விதர்சா வினோத் ஆகியோர் அடங்கிய இந்திய அணி 1,898 புள்ளிகளுடன் வெள்ளிப் பதக்கம் வென்றது. சீனா தங்கப் பதக்கத்தை கைப்பற்றியது.

இதனைத் தொடர்ந்து நடைபெற்ற தனிநபர் இறுதிப்போட்டியிலும் இளவேனில் வாலறிவன் சிறப்பாக செயல்பட்டார். 24 ஷாட்கள் கொண்ட இறுதிப்போட்டியில் அவர் 252.4 புள்ளிகள் பெற்று வெள்ளிப் பதக்கத்தை கைப்பற்றினார். ஜப்பானின் ஹினாதா தைச்சி 253.0 புள்ளிகளுடன் தங்கம் வென்றார். தென் கொரியாவின் பான் ஹியோஜின் வெண்கலம் பெற்றார்.

இதையும் படிங்க: மக்கள் தயவில்தான் தவெக ஆட்சி! மு.க.ஸ்டாலின் விமர்சனத்திற்கு அமைச்சர் ராஜ்மோகன் பதிலடி!

இதன் மூலம் ஒரே நாளில் அணிப் பிரிவிலும் தனிநபர் பிரிவிலும் பதக்கம் வென்ற வீராங்கனையாக இளவேனில் கவனம் பெற்றுள்ளார். இந்தியாவின் துப்பாக்கிச் சுடுதல் அணிக்கும் அவரது செயல்பாடு முக்கிய பங்களிப்பாக அமைந்துள்ளது.

இளவேனில் வாலறிவனின் இந்த இரட்டை வெள்ளி சாதனைக்கு தமிழக விளையாட்டுத்துறை அமைச்சர் ஆதவ் அர்ஜுனா வாழ்த்து தெரிவித்துள்ளார். தனது எக்ஸ் பதிவில், அவரது விடாமுயற்சி, அர்ப்பணிப்பு மற்றும் தொடர் உழைப்பு இளைஞர்களுக்கு முன்னுதாரணமாக இருப்பதாக பாராட்டியுள்ளார்.

முன்னாள் பாஜக தேசிய மகளிரணி தலைவர் வானதி சீனிவாசனும் இளவேனிலுக்கு வாழ்த்து தெரிவித்துள்ளார். இந்தியாவுக்கும் தமிழகத்துக்கும் பெருமை சேர்த்துள்ளதாக குறிப்பிட்டுள்ள அவர், சர்வதேச அளவில் மேலும் பல சாதனைகளை படைக்க வாழ்த்து தெரிவித்துள்ளார்.

ஆசிய விளையாட்டில் இந்தியாவின் பதக்கப் பயணம் தொடங்கியுள்ள நிலையில், முதல் நாளிலேயே இளவேனில் வாலறிவன் இரண்டு வெள்ளிப் பதக்கங்களை வென்றிருப்பது இந்திய விளையாட்டு ரசிகர்களிடையே உற்சாகத்தை ஏற்படுத்தியுள்ளது.

இதையும் படிங்க: அதிமுகவில் இருந்து 20 எம்எல்ஏக்கள் தவெகவுக்கு வர ரெடி! தாராபுரத்தில் செங்கோட்டையன் பேச்சால் பரபரப்பு!