சென்னை: ஜி7 நாடுகள் மட்டுமே ஒட்டுமொத்த உலகையும் கட்டுப்படுத்தும் காலம் முடிவுக்கு வந்துவிட்டது என்று கனடா பிரதமர் மார்க் கார்னி தெரிவித்துள்ளார். இந்தியாவின் பங்கேற்பு உலக அரங்கில் ஏற்பட்டுள்ள மாற்றத்தை பிரதிபலிப்பதாகவும் அவர் சுட்டிக்காட்டினார்.

பிரான்ஸின் ஈவியான் நகரில் தொடங்கிய ஜி7 அமைப்பின் 52வது உச்சி மாநாட்டில் அமெரிக்கா, கனடா, பிரான்ஸ், ஜெர்மனி, இத்தாலி, ஜப்பான் மற்றும் பிரிட்டன் ஆகிய நாடுகளின் தலைவர்கள் பங்கேற்றுள்ளனர். இந்தியா, பிரேசில், எகிப்து, கென்யா உள்ளிட்ட பல்வேறு நாடுகளின் தலைவர்கள் சிறப்பு அழைப்பாளர்களாக கலந்துகொண்டுள்ளனர்.

ஐரோப்பிய சுற்றுப்பயணத்தின் ஒரு பகுதியாக அயர்லாந்து சென்ற கனடா பிரதமர் மார்க் கார்னி, டிரினிட்டி கல்லூரியில் உரையாற்றினார். அப்போது அவர், “ஜி7 நாடுகள் மட்டுமே உலகை இயக்க முடியும் என்ற பாவனையை நாங்கள் விட்டுவிட்டோம். அப்படி ஒரு காலம் முடிந்துவிட்டது” என்றார்.

இதையும் படிங்க: ட்ரம்ப் முன்னிலையில் சீறிய மோடி! கடல்வழிப் போக்குவரத்து, மாலுமிகளைப் பாதுகாப்போம் என சூளுரை!

மேலும், “தற்போதைய உலகளாவிய சவால்களுக்கு தீர்வு காண வேண்டுமானால், பரந்த அளவிலான சர்வதேச ஒத்துழைப்பும், புதிய சிந்தனைகளும் அவசியம். ஜி7 நாடுகள் இந்த உண்மையை ஏற்றுக்கொண்டுள்ளன” எனக் கூறினார்.

உலகப் பொருளாதாரம் மற்றும் அரசியலில் ஏற்பட்டுள்ள மாற்றங்களை இந்தியாவின் பங்கேற்பு தெளிவாகக் காட்டுவதாக மார்க் கார்னி சுட்டிக்காட்டினார். ஜி7 உச்சி மாநாட்டில் இந்தியா போன்ற வளரும் நாடுகளுக்கு முக்கியத்துவம் அளிக்கப்படுவது, உலக ஒழுங்கில் ஏற்பட்டுள்ள மாற்றத்தை உறுதிப்படுத்துவதாக அவர் வலியுறுத்தினார்.

இந்த உச்சி மாநாட்டில் பொருளாதார ஒத்துழைப்பு, பாதுகாப்பு, காலநிலை மாற்றம், செயற்கை நுண்ணறிவு உள்ளிட்ட பல முக்கிய பிரச்னைகள் விவாதிக்கப்பட உள்ளன. இந்தியா உள்ளிட்ட அழைப்பாளர் நாடுகளின் பங்கேற்பு இந்த மாநாட்டுக்கு கூடுதல் முக்கியத்துவம் அளித்துள்ளது.

உலக அரங்கில் இந்தியாவின் செல்வாக்கு அதிகரித்து வரும் நிலையில், ஜி7 நாடுகளே இந்த மாற்றத்தை ஒப்புக்கொள்வது குறிப்பிடத்தக்கது. பிரதமர் நரேந்திர மோடியின் பங்கேற்பு மூலம் இந்தியாவின் நிலைப்பாடுகள் உலக அளவில் வலியுறுத்தப்படும் என எதிர்பார்க்கப்படுகிறது.

இதையும் படிங்க: பிரான்ஸில் தரையிறங்கிய மோடி! ராஜவரவேற்பு அளித்த மேக்ரான்! 'பாரத் இன்னோவேட்ஸ்' - இன்று துவக்கி வைப்பு!