ஈரான் தலைநகரில் பரபரப்பு! அரசு ஆதரவு பேரணியின்போது பயங்கர குண்டுவெடிப்பு!
ஈரானின் புதிய உச்சத் தலைவர் மொஜ்தபா கமேனி பொறுப்பேற்ற சில நாட்களிலேயே தலைநகரின் மையப்பகுதியில் இத்தகைய தாக்குதல் நடத்தப்பட்டிருப்பது சர்வதேச அளவில் பெரும் பதற்றத்தை ஏற்படுத்தியுள்ளது.
ஈரான் தலைநகர் தெஹ்ரானின் மையப்பகுதியில் இன்று அரசு ஆதரவு 'குத்ஸ் தின' பேரணி நடைபெற்றுக் கொண்டிருந்தபோது, எதிர்பாராத விதமாகப் பயங்கர சத்தத்துடன் குண்டுவெடிப்புச் சம்பவம் ஒன்று நிகழ்ந்துள்ளது. இந்தச் சம்பவம் தெஹ்ரான் நகரின் வரலாற்றுச் சிறப்புமிக்க ஃபெர்தோசி சதுக்கம் (Ferdowsi Square) அருகே நிகழ்ந்ததாகத் தகவல்கள் தெரிவிக்கின்றன.
ரமலான் மாதத்தின் கடைசி வெள்ளிக்கிழமையான இன்று, பாலஸ்தீனத்திற்கு ஆதரவாகவும் ஈரானிய அரசுக்கு ஆதரவாகவும் ஆயிரக்கணக்கான மக்கள் தெஹ்ரான் பல்கலைக்கழகம் அருகிலுள்ள சதுக்கங்களில் திரண்டிருந்தனர். அப்போது ஃபெர்தோசி சதுக்கம் மற்றும் எங்கெலாப் வீதி பகுதிகளில் மிகப்பெரிய சத்தத்துடன் குண்டுவெடிப்பு நிகழ்ந்தது.
இந்தக் குண்டுவெடிப்பைத் தொடர்ந்து நகரின் பல பகுதிகளில் கரும்புகை சூழ்ந்தது. இது தற்கொலைப் படைத் தாக்குதலா அல்லது வான்வழித் தாக்குதலா என்பது குறித்துத் தெளிவான தகவல்கள் இல்லை. எனினும், குண்டுவெடிப்பு நிகழ்வதற்குச் சற்று முன்னதாகவே வான்வழித் தாக்குதல் எச்சரிக்கை சைரன்கள் (Airstrike sirens) ஒலித்ததாக அங்கிருந்து வரும் செய்திகள் கூறுகின்றன.
இதையும் படிங்க: ஹார்முஸ் நீரிணை திறக்கப்படாது! ஈரானின் புதிய தலைவர் மொஜ்தபா கமேனி அதிரடி அறிவிப்பு!
இந்தத் தாக்குதலில் ஒரு பெண் உயிரிழந்ததாகவும், பலருக்குக் காயங்கள் ஏற்பட்டிருக்கலாம் என்றும் ஈரானிய அரசு ஊடகங்கள் முதற்கட்டமாகத் தெரிவித்துள்ளன. தாக்குதல் நடந்த இடத்திற்கு அருகே உயர்மட்ட ஈரானிய அதிகாரிகளும் இருந்ததாகக் கூறப்படுகிறது.
பிப்ரவரி 28-ல் தொடங்கிய Operation Epic Fury போர் நடவடிக்கையின் தொடர்ச்சியாக, ஈரானியத் தலைநகரில் உள்ள முக்கியப் பாதுகாப்பு நிலைகளைத் தாக்குவோம் என்று அமெரிக்கா மற்றும் இஸ்ரேல் ஏற்கனவே எச்சரிக்கை விடுத்திருந்த நிலையில் இந்தச் சம்பவம் நிகழ்ந்துள்ளது.
ஈரானியப் பாதுகாப்புப் படைத் தலைவர் அலி லாரிஜானி, இந்தப் பேரணியைக் குறிவைத்து நடத்தப்பட்ட தாக்குதல் எதிரிகளின் 'நப்பாசை மற்றும் விரக்தியின் அடையாளம்' எனக் குறிப்பிட்டுள்ளார்.
இந்தக் குண்டுவெடிப்பால் தெஹ்ரானில் பெரும் பதற்றம் நிலவி வருகிறது. இருப்பினும், தாக்குதல் நடந்த இடத்தைச் சுற்றியுள்ள பகுதிகளில் மக்கள் மீண்டும் திரண்டு அமெரிக்காவிற்கு வீழ்ச்சி என முழக்கமிட்டு வருவதால் அங்கு போர் மேகங்கள் மேலும் சூழ்ந்துள்ளன.
இதையும் படிங்க: சரணடைய மறுக்கும் ஈரான்..! மிரட்டும் ட்ரம்ப்! ஈரான் மிக கடுமையாக தாக்கப்படும்! ட்ரம்ப் எச்சரிக்கை!
