தமிழகத்தில் கோடை வெயில் தனது விஸ்வரூபத்தைக் காட்டத் தொடங்கியுள்ளது. கத்திரி வெயில் எனப்படும் அக்னி நட்சத்திரம் தொடங்குவதற்கு முன்னரே, மாநிலத்தின் பல்வேறு மாவட்டங்களில் வெப்பம் 100 டிகிரி ஃபாரன்ஹீட்டைக் கடந்து பதிவாகி வருவது பொதுமக்களை நிலைகுலையச் செய்துள்ளது. இன்று நிலவரப்படி, தமிழகத்திலேயே மிக அதிகபட்சமாகத் திருச்சியில் 105°F வெப்பம் பதிவாகியுள்ளது.
திருச்சியைத் தொடர்ந்து, வேலூர் மற்றும் கரூரில் 104°F வெப்பம் பதிவாகி அனல் காற்று வீசியது. தலைநகர் சென்னை, ஈரோடு, மதுரை, தருமபுரி, திருப்பத்தூர், நாமக்கல், தஞ்சை மற்றும் சேலம் ஆகிய மாவட்டங்களிலும் வெப்பம் 100 டிகிரி ஃபாரன்ஹீட்டைக் கடந்து (சதமடித்து) பதிவாகியுள்ளது. இதனால் மதிய நேரங்களில் சாலைகளில் மக்கள் நடமாட்டம் குறைந்து காணப்பட்டது. சென்னையைப் பொறுத்தவரை ஈரப்பதம் அதிகமாக இருந்ததால், பதிவான வெப்பத்தை விடக் கூடுதலாக வியர்வை மற்றும் புழுக்கத்தின் தாக்கம் உணரப்பட்டது.
வானிலை ஆய்வு மையத்தின் தகவல்படி, அடுத்த 5 நாட்களுக்குத் தமிழகத்தின் உள் மாவட்டங்களில் வெப்பம் இயல்பை விட 2-3 டிகிரி செல்சியஸ் வரை அதிகமாக இருக்கக்கூடும். "வளிமண்டல மேலடுக்கு சுழற்சி காரணமாக ஏப்ரல் 30 முதல் சில இடங்களில் லேசான மழை பெய்ய வாய்ப்புள்ளது; அதுவரை வெப்பத்தின் தாக்கம் நீடிக்கும்" எனத் தெரிவிக்கப்பட்டுள்ளது. வெயிலின் தாக்கத்திலிருந்து தப்பிக்கப் பொதுமக்கள் அதிகப்படியான தண்ணீர், இளநீர் மற்றும் பழச்சாறுகளை அருந்துமாறும், மதிய நேரங்களில் தேவையற்ற பயணங்களைத் தவிர்க்குமாறும் சுகாதாரத் துறை அறிவுறுத்தியுள்ளது.
இதையும் படிங்க: அரசுப் பள்ளிகளில் அலைமோதும் கூட்டம்: 2026-27 கல்வியாண்டில் 1 லட்சத்தைக் கடந்த மாணவர் சேர்க்கை!
இதையும் படிங்க: தனுஷின் 'கர' படத்திற்குச் சிக்கல்: தலைப்பு தொடர்பாகச் சென்னை உயர் நீதிமன்றத்தில் வழக்கு!