திருப்பதி ஏழுமலையான் கோயிலில் வருடாந்திர பிரம்மோற்சவ விழா கோலாகலமாக நடைபெற்று வருகிறது. இந்த ஆண்டு புரட்டாசி மாதத்தில் செப்டம்பர் 15 முதல் 23 வரை ஒன்பது நாட்கள் சாலகட்ல பிரம்மோற்சவம் விமரிசையாகக் கொண்டாடப்படுகிறது. பிரம்மதேவனால் தொடங்கப்பட்ட இந்த உற்சவம் கலியுக வைகுண்டமாகக் கருதப்படும் திருமலையில் பக்தர்களுக்கு அரிய தரிசனங்களை அளித்து வருகிறது.

தினமும் காலை மாலை வாகன சேவைகளில் மலையப்ப சுவாமி பல்வேறு வாகனங்களில் எழுந்தருளி மாட வீதிகளில் உலா வருவது பக்தர்களை ஆனந்தத்தில் ஆழ்த்துகிறது.விழாவின் எட்டாவது நாளான இன்று தேரோட்டம் விமரிசையாக நடைபெறுகிறது. அதிகாலையிலேயே சிறப்பு பூஜைகள் நடைபெற்ற பிறகு ஸ்ரீதேவி பூதேவியுடன் சமேத மலையப்ப சுவாமி மரத்தால் செய்யப்பட்ட பிரம்மாண்டமான தேரில் எழுந்தருளினார்.

தங்கக் குடையுடன் அலங்கரிக்கப்பட்ட தேரில் சுவாமி அருள் தரிசனம் அளிக்க, பக்தர்கள் கோவிந்தா கோவிந்தா என்ற முழக்கங்களுடன் தேரை வடம்பிடித்து இழுத்துச் சென்றனர். நான்கு மாட வீதிகளிலும் தேர் மெல்ல மெல்ல நகர்ந்து செல்லும்போது பக்தர்கள் மலர்கள் தூவி ஆராதனை செய்தனர். வேத கோஷங்கள், மங்கள வாத்தியங்கள் மற்றும் பஜனைகள் வானை அதிரச் செய்தன. யானைகள் முன்னால் செல்ல, கலாச்சாரக் குழுக்கள் நடனம் மற்றும் இசை நிகழ்ச்சிகளுடன் ஊர்வலத்தை அலங்கரித்தன.

இதையும் படிங்க: கோவிந்தா... கோபாலா..! திருப்பதி பிரம்மோற்சவம்... மோகினி அவதாரத்தில் சுவாமி வீதியுலா.!!

தேரோட்டத்தின் முக்கியத்துவம் மிகப் பெரியது. தேரில் எழுந்தருளும் கேசவனைத் தரிசித்தால் மறுபிறவி இல்லை என்ற புராண வாக்கியம் பக்தர்களுக்கு உற்சாகத்தை ஊட்டுகிறது. சுவாமி பக்தர்களுக்கு நேரடியாக அருள்பாலிக்கும் இந்த நிகழ்வு ஆன்மீக அனுபவமாக அமைகிறது. ஆயிரக்கணக்கான பக்தர்கள் அதிகாலை முதலே மாட வீதிகளில் குழுமியிருந்து தேர் வரும் வரை காத்திருந்தனர். சிலர் தேரைத் தொட்டு வணங்கினர். சுவாமியின் அலங்காரம், நகைகள் மற்றும் மலர் மாலைகள் கண்கொள்ளாக் காட்சியாக விளங்கின.

இதையும் படிங்க: "சூடித் தந்த சுடர்கொடி"..! ஆண்டாள் சூடிக்கொடுத்த மாலை..! திருப்பதி பிரம்மோற்சவத்திற்கு புறப்பாடு..!