மேற்காசியாவில் இஸ்ரேல் மற்றும் பாலஸ்தீன காசா பகுதியை கட்டுப்படுத்தும் ஹமாஸ் பயங்கரவாத அமைப்புக்கு இடையே நடந்து வரும் இரண்டு ஆண்டுகள் போரை முடிவுக்கு கொண்டுவர, அமெரிக்க அதிபர் டொனால்ட் டிரம்ப் சமீபத்தில் 20 அம்ச அமைதி திட்டத்தை அறிவித்தார். இஸ்ரேல் பிரதமர் பெஞ்சமின் நெதன்யாகு இதை ஏற்கிறோம் என அறிவித்த நிலையில், ஹமாஸ் தரப்பில் யோசிக்க நேரம் கோரப்பட்டது. 

இந்நிலையில், டிரம்ப் நேற்று (அக்டோபர் 3) அறிவித்துள்ளார்: "நாளை (அக்டோபர் 5) மாலை 6:00 மணி (வாஷிங்டன் நேரம்) வரை ஹமாஸுக்கு அவகாசம் அளிக்கப்படும். அதற்குள் அமைதி திட்டத்தை ஏற்க வேண்டும். இது அவர்களுக்கு வழங்கப்படும் கடைசி வாய்ப்பு. இல்லையெனில், நரகம் எப்படி இருக்கும் என்பதை அவர்களுக்கு நாங்கள் காட்ட நேரிடும். எது எப்படி இருந்தாலும், மேற்காசியாவில் அமைதி உருவாகும்" என எச்சரிக்கை விடுத்தார்.

இந்த 20 அம்ச திட்டம், கடந்த செப்டம்பர் 29 அன்று வெளியிடப்பட்டது. இதன் முக்கிய அம்சங்கள்: உடனடி போர் நிறுத்தம், ஹமாஸ் வைத்திருக்கும் 48 இஸ்ரேலிய பிணைக்கைதிகளை (20 உயிருடன் உள்ளனர்) 72 மணி நேரத்தில் விடுவிப்பது, இஸ்ரேல் வைத்திருக்கும் 250 ஆயுள் தண்டனை பெற்றவர்கள் மற்றும் 1,700 பாலஸ்தீன கைதிகளை விடுவிப்பது. 

இதையும் படிங்க: நோபல் பரிசு கொடுத்துருங்க! இல்லைனா அவமானமா போயிடும்! புலம்பும் ட்ரம்ப்!

இறந்த பிணைக்கைதிகளின் உடல்களை சமர்பிக்க வேண்டும். ஒரு இஸ்ரேலிய உடலுக்கு 15 பாலஸ்தீன உடல்கள். ஹமாஸ் ஆயுதங்களை கைவிட வேண்டும்; அமைதிக்கு ஒப்புக்கொள்ளும் உறுப்பினர்களுக்கு பொது மன்னிப்பு அளிப்பது, விரும்பினால் வெளிநாடுகளுக்கு பாதுகாப்பான பயணம் செய்யலாம். 

இஸ்ரேலிய படைகள் பல கட்டங்களாக காசாவிலிருந்து வெளியேறுவது, ஹமாஸ் இல்லாத பகுதிகளில் உடனடி உதவி (நீர், மின்சாரம், மருத்துவம்) வழங்குவது, ராஃபா எல்லை திறப்பது, காசாவை 'புதிய காசா' (New Gaza) என்று மறுசீரமைப்பது.
காசாவின் இடைக்கால நிர்வாகத்தை, தொழில்நுட்ப வல்லுநர்கள் மற்றும் சர்வதேச நிபுநர்களைக் கொண்ட குழு நடத்தும்; இதன் மேற்பார்வைக்கு டிரம்ப் தலைமையிலான 'அமைதி வாரியம்' (Board of Peace) அமையும். 

ஹமாஸ் நிராகரித்தால், இஸ்ரேல் படைகள் தொடர்ந்து தாக்கும் என திட்டம் கூறுகிறது. இஸ்ரேல், திட்டத்தின் முதல் கட்டத்தை உடனடியாக செயல்படுத்த தயாராக உள்ளதாக அறிவித்துள்ளது. ஹமாஸ், சில அம்சங்களை ஏற்கிறோம் என்றாலும், ஆயுத கைவிடல் உள்ளிட்டவற்றுக்கு மேலும் பேச்சுவார்த்தை கோரியுள்ளது. டிரம்ப், ஹமாஸ் அமைதிக்கு தயாராக உள்ளதாக நம்புவதாகவும், இஸ்ரேல் காசா குண்டுவீச்சை உடனடியாக நிறுத்த வேண்டும் எனவும் கூறியுள்ளார்.

இந்தப் போர், 2023 அக்டோபர் 7 ஹமாஸ் தாக்குதலில் 1,200 இஸ்ரேலியர்கள் கொல்லப்பட்டதால் தொடங்கியது. இஸ்ரேல் பதிலடி தாக்குதலில் 66,000-க்கும் மேற்பட்ட பாலஸ்தீனர்கள் உயிரிழந்துள்ளனர். காசாவில் பஞ்சம், அழிவு, மனிதாபிமான நெருக்கடி தீவிரமடைந்துள்ளது. 

இத்திட்டத்தை எகிப்து, ஜோர்டான், சவுதி அரேபியா, கத்தார் உள்ளிட்ட அரபு நாடுகள் மற்றும் பிரான்ஸ், இத்தாலி போன்ற ஐரோப்பிய நாடுகள் ஆதரித்துள்ளன. பாலஸ்தீன அதிகாரசபை (PA) "டிரம்பின் உண்மையான முயற்சிகளை" வரவேற்றுள்ளது. டிரம்ப், "இது மிகவும் நியாயமான திட்டம்" எனவும், ஹமாஸ் ஏற்கும் என நம்புவதாகவும் கூறினார்.

இந்த அவகாசம், போரை முடிவுக்கு கொண்டுவரும் கடைசி வாய்ப்பாகக் கருதப்படுகிறது. ஹமாஸ் நிராகரித்தால், இஸ்ரேல் "வேலை முடிவுக்கு கொண்டுவரும்" என நெதன்யாகு எச்சரித்துள்ளார். சர்வதேச சமூகம், அமைதி முயற்சிகளை விரிவுபடுத்துமாறு அழைக்கிறது. டிரம்பின் திட்டம், காசாவை "பயங்கரவாதம் இல்லாத பகுதியாக" மாற்றி, பொருளாதார வளர்ச்சி மற்றும் அமைதி ஒப்பந்தங்களை உருவாக்கும் என எதிர்பார்க்கப்படுகிறது.

இதையும் படிங்க: ட்ரம்ப் அமைதி திட்டத்திற்கு விழுந்த அடி! காசாவில் 53 பேர் படுகொலை! இஸ்ரேல் செயலால் பின்னடைவு!