அமெரிக்காவின் 47வது அதிபராக இரண்டாவது முறையாக டொனால்டு ட்ரம்ப் இந்தாண்டு ஜனவரி 20ஆம் தேதி பதவியேற்றார். இவரது "அமெரிக்கா முதலில்" ("America First") கொள்கையின் முக்கிய அம்சமாக, உலகளாவிய வர்த்தகத்தில் கடுமையான வரி விதிப்புகளை அறிமுகப்படுத்தினார். இந்தக் கொள்கை, பிரிக்ஸ் (BRICS - பிரேசில், ரஷ்யா, இந்தியா, சீனா, தென்னாப்பிரிக்கா) நாடுகளுடனான உறவுகளில் பெரும் பதற்றத்தை ஏற்படுத்தியது. 

ட்ரம்ப், பிரிக்ஸ் நாடுகள் அமெரிக்க டாலருக்கு மாற்று நாணயத்தை உருவாக்குவதைத் தடுக்க 100% வரி விதிக்கப்படும் என எச்சரித்தார், மேலும் "அமெரிக்க எதிர்ப்பு" கொள்கைகளை ஆதரிக்கும் நாடுகளுக்கு கூடுதல் 10% வரி விதிக்கப்படும் என அறிவித்தார். இந்த அறிவிப்பு, 2025 ஜூலை 6-7ல் பிரேசிலின் ரியோ டி ஜெனிரோவில் நடந்த பிரிக்ஸ் மாநாட்டின் போது உலகளாவிய கவனத்தை ஈர்த்தது. 

பிரிக்ஸ் அமைப்பு, 2009இல் தொடங்கப்பட்டு, 2023இல் எகிப்து, எத்தியோப்பியா, ஈரான், ஐக்கிய அரபு எமிரேட்ஸ் மற்றும் இந்தோனேசியாவை உள்ளடக்கிய விரிவாக்கத்துடன், உலகளாவிய பொருளாதாரத்தில் அமெரிக்க மேலாதிக்கத்தை சவால் செய்யும் ஒரு மேடையாக உருவெடுத்துள்ளது. இந்த மாநாட்டில், பிரிக்ஸ் நாடுகள் ஒருதலைப் படுத்தப்பட்ட வரிகளுக்கு எதிராக "கடுமையான கவலை" தெரிவித்து, உலகளாவிய வர்த்தகத்தை பாதிக்கும் என எச்சரித்தனர். இதற்கு பதிலளிக்கும் விதமாக, ட்ரம்ப், பிரிக்ஸ் நாடுகளுக்கு எதிராக 10% கூடுதல் வரியை அறிவித்தார், இது அவர்களின் "அமெரிக்க எதிர்ப்பு" கொள்கைகளுக்கு எதிரான நடவடிக்கையாகக் கருதப்பட்டது. 

இதையும் படிங்க: நோபல் பரிசை ட்ரம்புக்கு கொடுங்க!! அசீம் நசீரை தொடர்ந்து வக்காலத்துக்கு வரும் நெதன்யாகு!

ட்ரம்ப் நிர்வாகம், 2025 ஏப்ரல் முதல் உலகளாவிய இறக்குமதிகளுக்கு 10% அடிப்படை வரியையும், எஃகு மற்றும் அலுமினியத்திற்கு 50% வரியையும், வாகனங்களுக்கு 25% வரியையும் விதித்தது. மேலும், காப்பருக்கு 50% வரி அறிவிக்கப்பட்டது. மருந்து பொருட்களுக்கு 200 சதவீதம் வரையும் வரி விதிக்க இருப்பதாக டிரம்ப் அறிவித்திருக்கிறார்.

இந்த புதிய வரி விதிப்பு ஆகஸ்ட் 1ம் தேதி முதல் நடைமுறைக்கு வரும் என்று அறிவிக்கப் பட்டிருக்கிறது. இது பிரேசில் போன்ற நாடுகளுக்கு பெரும் பாதிப்பை ஏற்படுத்தியது, ஏனெனில் அவை அமெரிக்காவிற்கு குறிப்பிடத்தக்க அளவு உலோக ஏற்றுமதி செய்கின்றன. 2024இல் பிரேசில் அமெரிக்காவிற்கு 40 பில்லியன் டாலர் மதிப்புள்ள பொருட்களை ஏற்றுமதி செய்தது, இதில் எஃகு மற்றும் கட்டுமானப் பொருட்கள் முக்கிய பங்கு வகிக்கின்றன.

பிரேசிலின் அதிபர் லூயிஸ் இனாசியோ லூலா டா சில்வா, ட்ரம்பின் வரி அசம்பாவிதமானது என்று கண்டித்து, "உலகத்திற்கு ஒரு பேரரசர் தேவையில்லை" எனக் கூறினார். பதிலடியாக, பிரேசில் அமெரிக்க பொருட்களுக்கு 50% வரி விதிக்கும் திட்டத்தை அறிவித்தது, இது உலக வர்த்தக அமைப்பில் (WTO) விவாதிக்கப்படலாம் எனக் கூறப்பட்டது. இந்த பதிலடி, பிரேசிலின் பொருளாதார பதிலளிப்பு சட்டத்தின் கீழ் மேற்கொள்ளப்பட்டது, ஆனால் பிரேசிலின் பொருளாதாரம், ஏற்றுமதி அதன் மொத்த உள்நாட்டு உற்பத்தியில் 28% மட்டுமே என்பதால், இதன் தாக்கம் மிதமாக இருக்கலாம் என கணக்கிடப்பட்டுள்ளது.

இது தொடர்பாக பிரேசில் அதிபர், லூயிஸ் இன்சியோலுலா டா சில்வா கூறியதாவது: முதலில் பேச்சுவார்த்தை நடத்த முயற்சிப்போம், ஆனால் பேச்சுவார்த்தை இல்லை என்றால், பரஸ்பர சட்டம் நடைமுறைக்கு வரும். அவர்கள் எங்களிடம் 50 சதவீத வரி வசூலிக்கப் போகிறார்கள் என்றால், நாங்கள் அவர்களிடம் 50% வரி வசூலிப்போம். இந்த பிரச்னையைத் தீர்க்க பிரேசில் உலக வர்த்தக அமைப்பை (WTO) நாடக்கூடும்.நாங்கள் சர்வதேச விசாரணைகளைக் கேட்கலாம். மேலும் இது குறித்து விளக்கங்களைக் கோரலாம். பிரேசில் பதிலளிக்கத் தயாராக உள்ளது என அவர் கூறியுள்ளார்.

இதையும் படிங்க: பாலியல் வழக்கில் கைது எப்போ? ட்ரம்பை மீண்டும் சீண்டும் எலான் மஸ்க்.. புதுக்கட்சி துவங்கியதும் பற்ற வைத்த வெடிகுண்டு!