கேரள சட்டமன்றத் தேர்தல் முடிவுகள் வெளியாகி ஒரு வாரம் கடந்த நிலையிலும், அம்மாநிலத்தின் அடுத்த முதலமைச்சர் யார் என்பதை முடிவு செய்ய முடியாமல் காங்கிரஸ் மேலிடம் திணறி வருகிறது. கோஷ்டி பூசல் மற்றும் அதிகாரப் போட்டியால் முதலமைச்சர் தேர்வு இழுபறியில் நீடிப்பது ஐக்கிய ஜனநாயக முன்னணி (UDF) தொண்டர்களிடையே சோர்வை ஏற்படுத்தியுள்ளது.

கேரள முதலமைச்சர் நாற்காலிக்காக காங்கிரஸ் கட்சியின் மூன்று முக்கியத் தலைவர்களிடையே கடும் போட்டி நிலவுகிறது. வி.டி. சதீசன் கடந்த ஐந்தாண்டுகளாக எதிர்க்கட்சித் தலைவராகச் சிறப்பாகச் செயல்பட்டவர் என்ற முறையில், இவருக்கு இளம் எம்.எல்.ஏ-க்கள் மற்றும் ஒரு தரப்பு மூத்த நிர்வாகிகளின் ஆதரவு அதிகமாக உள்ளது.

ரமேஷ் சென்னிதாலா கட்சியில் நீண்ட கால அனுபவம் கொண்டவர் மற்றும் ஹை-கமாண்டிற்கு நெருக்கமானவர் என்ற அடிப்படையில், தனக்கு முதலமைச்சர் பதவி வழங்கப்பட வேண்டும் என்பதில் அவர் உறுதியாக உள்ளார்.

இதையும் படிங்க: காங்கிரஸ் சட்டமன்ற குழு தலைவராக ராஜேஷ்குமார் தேர்வு! தாரகை கத்பர்ட், விஸ்வநாதனுக்கு முக்கிய பொறுப்பு!

கே.சி. வேணுகோபால் அகில இந்திய காங்கிரஸ் பொதுச்செயலாளராக இருக்கும் இவரை முதலமைச்சராக்க ராகுல் காந்தி விரும்புவதாகத் தகவல்கள் தெரிவிக்கின்றன. தேசிய அரசியலில் இருந்து மாநில அரசியலுக்கு இவரை அழைத்து வருவது கட்சியின் எதிர்காலத்திற்கு நல்லது என ஒரு தரப்புக் கருதுகிறது.

கேரளாவில் காங்கிரஸ் கூட்டணி வெற்றி பெற்றும், கோஷ்டி பூசல் காரணமாகப் பதவியேற்பு விழா தள்ளிப் போய்க்கொண்டே இருக்கிறது. டெல்லியில் இருந்து அனுப்பப்பட்ட பார்வையாளர்கள் ஒவ்வொரு எம்.எல்.ஏ-விடமும் தனித்தனியாகக் கருத்துகளைக் கேட்டுள்ளனர். ஆனால், யாருக்கும் தெளிவான பெரும்பான்மை ஆதரவு கிடைக்காதது சிக்கலை ஏற்படுத்தியுள்ளது. கே.சி. வேணுகோபால் மீது ராகுல் காந்திக்குத் தனிப்பட்ட நம்பிக்கை இருந்தாலும், உள்ளூர் தலைவர்களின் எதிர்ப்பைச் சமாளிப்பது அவருக்குச் சவாலாக உள்ளது.

தமிழகத்தில் தேர்தல் முடிந்து சில நாட்களிலேயே முதலமைச்சர் விஜய் பதவியேற்று, சட்டமன்றப் பணிகளைத் தொடங்கிவிட்ட நிலையில், அண்டை மாநிலமான கேரளாவில் இன்னும் முதலமைச்சரே முடிவு செய்யப்படாதது நிர்வாகச் சிக்கல்களை உருவாக்கியுள்ளது. இன்னும் ஓரிரு நாட்களில் காங்கிரஸ் மேலிடம் தனது இறுதி முடிவை அறிவிக்கும் என எதிர்பார்க்கப்படுகிறது.
 

இதையும் படிங்க: எதிரியும் எதிரியும் நண்பன்..? எப்படி..! தமிழ்நாடு ஏற்காது... ஜோதிமணி திட்டவட்டம்..!