குஜராத்தில் தடை செய்யப்பட்ட ஜெயிஷ்-இ-முகமது பயங்கரவாத அமைப்புடன் தொடர்பில் இருந்து, அந்த அமைப்பின் செயல்பாடுகளை மாநிலத்தில் விரிவுபடுத்த சதித்திட்டம் தீட்டியதாகக் கூறப்படும் 8 பேரை குஜராத் பயங்கரவாத எதிர்ப்புப் படை (ATS) கைது செய்துள்ளது. இந்த நடவடிக்கை, மாநிலத்தில் பாதுகாப்பு அமைப்புகள் நடத்திய தீவிர கண்காணிப்பின் போது மேற்கொள்ளப்பட்டதாக அதிகாரிகள் தெரிவித்துள்ளனர்.

விசாரணையில், கைது செய்யப்பட்டவர்கள் பாகிஸ்தானில் செயல்பட்டு வரும் ஜெயிஷ்-இ-முகமது அமைப்பைச் சேர்ந்த நபர்களுடன் தொடர்ந்து தொடர்பில் இருந்ததாகக் கூறப்படுகிறது. மேலும், அந்த அமைப்பின் கொள்கைகள் மற்றும் பிரசாரப் பொருட்களை உருது மொழியில் இருந்து குஜராத்தி மொழிக்கு மொழிபெயர்த்து பரப்பும் பணியிலும் ஈடுபட்டிருந்ததாக விசாரணையில் தெரியவந்துள்ளது.

அதிகாரிகளின் தகவலின்படி, குஜராத்தில் பயங்கரவாத நடவடிக்கைகளுக்கான அடித்தளத்தை உருவாக்கும் நோக்கில் இவர்கள் செயல்பட்டதாக சந்தேகிக்கப்படுகிறது. இதற்காக சுமார் ரூ.3 லட்சம் நிதி பெற்றதுடன், அந்தத் தொகையை பயன்படுத்தி பழைய கார் ஒன்றையும் வாங்கியிருந்ததாகவும் கூறப்பட்டுள்ளது. இந்த வாகனம் திட்டமிட்ட நடவடிக்கைகளுக்கு பயன்படுத்தப்பட இருந்ததா என்பது குறித்தும் விசாரணை நடைபெற்று வருகிறது.

இதையும் படிங்க: ஜெய்ஷ்-இ-முகமது, லஷ்கர்-இ-தொய்பா அமைப்புடன் தொடர்பு! 23 பேர் உபா சட்டத்தில் பயங்கரவாதிகளாக அறிவிப்பு!

கைது செய்யப்பட்டவர்களுடன் தொடர்புடைய இடங்களில் நடத்தப்பட்ட சோதனையில் 254 டிஜிட்டல் ஆவணங்கள், ஜிகாதி கருத்துகள் அடங்கிய புத்தகங்கள், உரைகள், ஆடியோ மற்றும் வீடியோ பதிவுகள், புகைப்படங்கள், ஜெயிஷ்-இ-முகமது அமைப்பின் கொடிகள், மொபைல் போன்கள் உள்ளிட்ட பல்வேறு பொருட்கள் பறிமுதல் செய்யப்பட்டுள்ளன. அதேபோல், அந்த அமைப்பின் தலைவர் மசூத் அசாரின் புத்தகங்கள், அமைப்பில் சேர அனுமதி கோரி எழுதப்பட்டதாகக் கூறப்படும் கடிதங்கள் மற்றும் உருது, குஜராத்தி மொழிகளில் தயாரிக்கப்பட்ட கொள்கை குறிப்புகளும் கைப்பற்றப்பட்டதாக அதிகாரிகள் தெரிவித்தனர்.

கைது செய்யப்பட்டவர்கள் குஜராத் மற்றும் மத்தியப் பிரதேசத்தைச் சேர்ந்தவர்கள் என தெரிவிக்கப்பட்டுள்ளது. அவர்களிடம் இருந்து கிடைத்த தகவல்களின் அடிப்படையில், மேலும் சில தொடர்புகள் குறித்து பயங்கரவாத எதிர்ப்புப் படையினர் தீவிர விசாரணை நடத்தி வருகின்றனர்.

இந்த வழக்கில் கைது செய்யப்பட்ட 8 பேர் மீதும் சட்டவிரோத நடவடிக்கைகள், பயங்கரவாத நடவடிக்கைகளுக்கு நிதி திரட்டுதல், பயங்கரவாத சதித்திட்டம், தடை செய்யப்பட்ட அமைப்புக்கு ஆட்சேர்ப்பு மற்றும் ஆதரவு வழங்குதல், குற்றச் சதி உள்ளிட்ட பல்வேறு சட்டப்பிரிவுகளின் கீழ் வழக்குப்பதிவு செய்யப்பட்டுள்ளது. இந்த கைது நடவடிக்கை, நாட்டின் உள்நாட்டு பாதுகாப்பை வலுப்படுத்தும் முக்கிய நடவடிக்கையாகக் கருதப்படுகிறது.

இதையும் படிங்க: கைரேகை முக்கியம்!! குற்றவாளிகள் தப்பிவிடக் கூடாது! டெல்லி மாநாட்டில் அமித்ஷா உறுதி!!