மகாராஷ்டிரா மாநில துணை முதலமைச்சரும், தேசியவாத காங்கிரஸ் கட்சியின் முக்கிய தலைவருமான அஜித் பவார் இன்று (ஜனவரி 28, 2026) காலை ஏற்பட்ட கொடூரமான விமான விபத்தில் உயிரிழந்தார். இச்சம்பவம் மாநில அரசியல் வட்டாரங்களில் பெரும் அதிர்ச்சி அலைகளை ஏற்படுத்தியுள்ளது. பாராமதி விமான நிலையத்தில் தரையிறங்க முயன்றபோது, Learjet 45 வகை தனியார் ஜெட் விமானம் கட்டுப்பாட்டை இழந்து ரன்வேயிலிருந்து விலகிச் சென்று தீப்பிடித்து வெடித்தது.
விமானத்தில் பயணித்த அனைவரும் உயிரிழந்ததை இயக்குநரகப் பொது விமானப் போக்குவரத்து ஆணையம் (DGCA) உறுதிப்படுத்தியுள்ளது. விமானம் VT-SSK என்ற பதிவு எண்ணைக் கொண்டது. இதை டெல்லியைத் தலைமையிடமாகக் கொண்ட VSR Ventures Pvt Ltd நிறுவனம் இயக்கியது. இந்நிறுவனம் மும்பை, போபால், ஹைதராபாத் உள்ளிட்ட பல நகரங்களில் தனியார் ஜெட் சார்ட்டர், லீசிங் மற்றும் ஏர் அம்புலன்ஸ் சேவைகளை வழங்கி வருகிறது.
இதையும் படிங்க: விமான விபத்தில் அஜித் பவார் மரணம்..!! வெளியான பகீர் சிசிடிவி..!! 3 நாட்கள் துக்கம் அனுசரிப்பு..!!
விமானம் மும்பையிலிருந்து காலை 8.10 மணிக்குப் புறப்பட்டு, பாராமதிக்கு சென்றது. அங்கு ஜில்லா பரிஷத் தேர்தல் பிரச்சாரத்துக்காக அஜித் பவார் நான்கு பொதுக்கூட்டங்களில் கலந்துகொள்ள திட்டமிட்டிருந்தார். விபத்து காரணமாக அனைத்து நிகழ்ச்சிகளும் ரத்து செய்யப்பட்டுள்ளன. இந்த விபத்து VSR Ventures நிறுவனத்தின் கடந்த மூன்று ஆண்டுகளில் இரண்டாவது பெரிய சம்பவமாகும்.
2023 செப்டம்பர் 14 அன்று அதே வகை Learjet 45 XR (VT-DBL) விமானம் மும்பை விமான நிலையத்தில் தரையிறங்கும்போது கனமழை மற்றும் குறைந்த பார்வை காரணமாக ரன்வேயிலிருந்து விலகிச் சென்றது. அப்போது உயிரிழப்பு ஏற்படவில்லை என்றாலும் விமானம் கடுமையாக சேதமடைந்தது. தற்போது நிறுவனத்தின் அதிகாரப்பூர்வ இணையதளம் முடங்கிய நிலையில் உள்ளது.
Learjet 45XR ஒரு நடுத்தர அளவிலான பிசினஸ் ஜெட் ஆகும். இது அதிவேகப் பயணத்துக்கு ஏற்றது மற்றும் 9 பேர் வரை அமரக்கூடிய வசதி கொண்டது. நிறுவனத்தின் வாடிக்கையாளர்களில் ஹேவெல்ஸ் இந்தியா, வெல்ஸ்பன், ஏபிஎல் அப்போலோ போன்ற பெருநிறுவனங்கள் அடங்கும். நிறுவனத்தின் உரிமையாளர் விஜய் குமார் சிங் ஆவார்.அஜித் பவாரின் மறைவு மகாராஷ்டிரா அரசியலில் பெரும் இடைவெளியை ஏற்படுத்தியுள்ளது.
பாராமதி தொகுதியில் அவருக்கு இருந்த வலுவான செல்வாக்கு, மாநில அரசின் கொள்கைகளில் அவரது பங்கு ஆகியவை இப்போது பெரும் கேள்விக்குறியாகியுள்ளன. மாநில அரசியல் கட்சிகள், தலைவர்கள் இழப்பை வருத்தத்துடன் நினைவுகூர்ந்து வருகின்றனர். விபத்து குறித்து ஆய்வு நடைபெற்று வருவதாக அதிகாரிகள் தெரிவித்துள்ளனர்.
இதையும் படிங்க: "மகாராஷ்டிராவிற்கு ஈடு செய்ய முடியாத இழப்பு!" - அஜித் பவார் மறைவுக்கு முதல்வர் ஸ்டாலின் இரங்கல்..!