பஞ்சாப் மாநிலம் ஜலந்தரில் மத்திய உள்துறை அமைச்சர் அமித் ஷா பங்கேற்க உள்ள பொதுக்கூட்டத்துக்கு முன்னதாக வெடிகுண்டு மிரட்டல் மின்னஞ்சல் வந்துள்ளதாக அதிகாரிகள் தெரிவித்துள்ளனர். இதையடுத்து ஜலந்தர் மற்றும் சுற்றுவட்டாரப் பகுதிகளில் பாதுகாப்பு ஏற்பாடுகள் தீவிரப்படுத்தப்பட்டுள்ளன.

பாஜக சார்பில் நடத்தப்பட்டு வரும் ‘நஷா முக்த் பஞ்சாப் யாத்திரை’ நிறைவு நிகழ்ச்சியாக ஜலந்தரின் பராக்பூர் பகுதியில் இன்று பொதுக்கூட்டம் நடைபெறுகிறது. இதில் அமித் ஷா உரையாற்ற உள்ளார். செப்டம்பர் 18ஆம் தேதி தொடங்கிய இந்த யாத்திரை, பஞ்சாபின் 117 சட்டப்பேரவைத் தொகுதிகளையும் கடந்து சுமார் 4,000 கிலோமீட்டர் பயணம் செய்துள்ளதாக தகவல்கள் தெரிவிக்கின்றன.

இந்த நிலையில், அமித் ஷா வருகைக்கு சில மணி நேரங்களுக்கு முன்பு ஜலந்தர் மற்றும் சுற்றுப்பகுதிகளில் உள்ள சில இடங்களுக்கு வெடிகுண்டு மிரட்டல் மின்னஞ்சல்கள் வந்ததாக போலீசார் தெரிவித்துள்ளனர்.

இதையும் படிங்க: பாகிஸ்தானுக்கு தூக்கமே இல்லை! அமேதியில் தயாராகும் ஏகே-203... பயங்கரவாதிகள் குறித்து அமித் ஷா பரபரப்பு தகவல்!

பள்ளிகள் உள்ளிட்ட கல்வி நிறுவனங்கள், பொதுக்கூட்டம் நடைபெறும் இடம், தேவி தலாப் கோயில் மற்றும் நீதிமன்ற வளாகம் ஆகியவை மிரட்டலில் குறிப்பிடப்பட்டுள்ளதாக தகவல் வெளியாகியுள்ளது.

மின்னஞ்சல் கிடைத்ததும் போலீசார் மற்றும் பாதுகாப்பு அதிகாரிகள் உடனடியாக நடவடிக்கையில் இறங்கினர். மிரட்டல் மின்னஞ்சல் உண்மையானதா அல்லது வெறும் அச்சுறுத்தலா என்பதை கண்டறியும் வகையில் சம்பந்தப்பட்ட இடங்களில் சோதனைகள் மேற்கொள்ளப்பட்டு வருகின்றன. இதுவரை வெடிகுண்டு இருப்பது உறுதி செய்யப்பட்டதாக தகவல் வெளியாகவில்லை.

மேலும், மின்னஞ்சல் எந்த இடத்திலிருந்து அனுப்பப்பட்டது என்பதை கண்டறிய தொழில்நுட்ப ரீதியான ஆய்வு நடைபெற்று வருகிறது. மின்னஞ்சலின் பின்னணி மற்றும் அதை அனுப்பிய நபர் அல்லது குழு குறித்து போலீசார் விசாரணை நடத்தி வருகின்றனர்.

அமித் ஷா வருகையை முன்னிட்டு ஜலந்தர் பொதுக்கூட்டம் நடைபெறும் பகுதி மட்டுமின்றி, தேவி தலாப் கோயில் உள்ளிட்ட முக்கிய இடங்களிலும் பாதுகாப்பு அதிகரிக்கப்பட்டுள்ளது. கோயிலுக்கு அமித் ஷா சென்று வழிபாடு நடத்திவிட்டு பொதுக்கூட்டத்தில் பங்கேற்க உள்ளதாக முன்கூட்டியே தெரிவிக்கப்பட்டிருந்தது.

பஞ்சாபின் பல பகுதிகளில் கடந்த சில மாதங்களாக பள்ளிகள் மற்றும் பொதுமக்கள் கூடும் இடங்களுக்கு மின்னஞ்சல் மூலம் வெடிகுண்டு மிரட்டல்கள் வந்துள்ளன. சில சம்பவங்களில் சோதனைகளுக்குப் பிறகு அவை போலியான மிரட்டல்கள் என தெரியவந்துள்ளன. இதனால் தற்போதைய மிரட்டலையும் போலீசார் தீவிரமாக ஆய்வு செய்து வருகின்றனர்.

அமித் ஷாவின் ஜலந்தர் நிகழ்ச்சி நடைபெறும் நாளிலேயே இந்த மிரட்டல் வந்துள்ளதால், பாதுகாப்பு அமைப்புகள் கூடுதல் எச்சரிக்கையுடன் செயல்பட்டு வருகின்றன.

இதையும் படிங்க: 2029 டிசம்பர் 31... இந்தியாவில் போதைப்பொருள் முற்றிலும் ஒழிக்கப்படும்! அமித் ஷா வைத்த அதிரடி கெடு!!