அர்னாப் புயல் மேலும் தீவிரமடைந்துள்ளது. வங்கக்கடலில் உருவாகிய இந்த புயல் நாளை மறுநாளான அக்டோபர் 28ஆம் தேதி ஆந்திரக் கடற்கரையை தீவிர புயலாகக் கடக்க வாய்ப்புள்ளதாக வானிலை ஆய்வு மையம் தெரிவித்துள்ளது. புயல் கரையைக் கடக்கும்போது மணிக்கு 115 முதல் 125 கிலோமீட்டர் வேகத்தில் காற்று வீசும் என்றும், அதிகபட்சமாக 140 கிலோமீட்டர் வேகம் வரை அடையும் என்றும் கணிக்கப்பட்டுள்ளது.பாபட்லா மற்றும் விசாகப்பட்டினம் இடையே ஏனாம் அருகே புயல் கரையைத் தாக்கும் என எதிர்பார்க்கப்படுகிறது.

இதனால் ஆந்திர மாநிலத்தின் கடலோரப் பகுதிகளில் பலத்த காற்று மற்றும் கனமழை ஏற்படும் வாய்ப்பு உள்ளது. தமிழகத்தில் சென்னை மற்றும் புறநகர் பகுதிகளில் மிதமான மழைக்கு வாய்ப்புள்ளதாக அறிவிக்கப்பட்டுள்ளது. மேற்குத் தொடர்ச்சி மலை மாவட்டங்களில் மழை தொடரும் என்றும் தெரிவிக்கப்பட்டுள்ளது.

வடமேற்கு வங்கக்கடல் பகுதிகளில் அக்டோபர் 28ஆம் தேதி வரை மீன்பிடிக்கச் செல்லத் தடை விதிக்கப்பட்டுள்ளது. மீனவர்கள் கடலுக்குச் செல்ல வேண்டாம் என எச்சரிக்கை விடுக்கப்பட்டுள்ளது. புயல் தீவிரமடைந்து வருவதால் கடலோரப் பகுதிகளில் உள்ள மக்கள் எச்சரிக்கையுடன் இருக்கும்படி அறிவுறுத்தப்பட்டுள்ளனர். வானிலை ஆய்வு மையம் தொடர்ந்து கண்காணித்து வருவதாகவும், புதிய அறிவிப்புகள் வரும்போது உடனடியாகத் தெரிவிக்கப்படும் என்றும் கூறப்பட்டுள்ளது.

இதையும் படிங்க: நாகைக்கு ஆரஞ்சு அலர்ட்.! வெளுக்கப்போகும் மழை..!! தமிழகத்திற்கு எச்சரிக்கை..!!

இந்தப் புயலின் தாக்கம் ஆந்திரக் கடற்கரையில் அதிகமாக இருக்கும் என்றாலும், தமிழகத்தின் சில பகுதிகளில் மழைப்பொழிவு தொடர வாய்ப்புள்ளது. பொதுமக்கள் வானிலை அறிவிப்புகளை உன்னிப்பாகக் கவனித்து, தேவையான முன்னெச்சரிக்கை நடவடிக்கைகளை மேற்கொள்ளுமாறு கேட்டுக்கொள்ளப்பட்டுள்ளது.

இதையும் படிங்க: பேய் மழை..! ஆர்ப்பரிக்கும் தண்ணீர்..! மணிமுத்தாறு அருவியில் குளிக்க 6வது நாளாக தடை..!!