காவிரி நீர் பகிர்வு மற்றும் மேக்கேதாட்டு அணை விவகாரம் தொடர்பாக கர்நாடக அரசுடன் முக்கிய பேச்சுவார்த்தை நடத்த தமிழ்நாடு முதல்வர் ஜோசப் விஜய் ஆகஸ்ட் 3-ஆம் தேதி கர்நாடகம் செல்ல உள்ளார். இந்த பயணத்தில் அவருடன் அமைச்சர்கள், உயர் அதிகாரிகள் மற்றும் சட்ட நிபுணர்கள் அடங்கிய 13 பேர் கொண்ட குழுவும் பங்கேற்க இருப்பதாக தகவல் வெளியாகியுள்ளது.

தமிழ்நாடு மற்றும் கர்நாடக மாநிலங்களுக்கு இடையே நீண்ட காலமாக நீடித்து வரும் காவிரி நீர் பிரச்சினைக்கு பேச்சுவார்த்தை மூலம் தீர்வு காணும் முயற்சியாக இந்த சந்திப்பு பார்க்கப்படுகிறது. குறிப்பாக, கர்நாடக அரசு மேக்கேதாட்டு பகுதியில் புதிய அணை கட்டும் திட்டத்தை முன்னெடுத்து வரும் நிலையில், அதற்கு தமிழ்நாடு தொடர்ந்து எதிர்ப்பு தெரிவித்து வருகிறது. இந்த விவகாரம் நீதிமன்றத்தில் நிலுவையில் இருந்தாலும், இரு மாநில முதல்வர்களின் நேரடி பேச்சுவார்த்தை முக்கியத்துவம் பெற்றுள்ளது.

தகவல்களின்படி, முதல்வர் விஜய்யுடன் அமைச்சர்கள் என். ஆனந்த் மற்றும் ஆதவ் அர்ஜூனா உள்ளிட்டோர் கர்நாடகம் செல்ல உள்ளனர். மேலும், தமிழக அரசின் தலைமைச் செயலர், நீர்வளத்துறை செயலர், காவிரி தொழில்நுட்பக் குழுவின் தலைவர் மற்றும் மூத்த சட்ட ஆலோசகர்கள் உள்ளிட்ட உயர் அதிகாரிகளும் இந்த குழுவில் இடம்பெறுகின்றனர். தமிழக அரசின் சார்பில் மூத்த வழக்கறிஞர் உமாபதியும் இந்த பேச்சுவார்த்தையில் பங்கேற்க உள்ளதாக கூறப்படுகிறது.

இதையும் படிங்க: CM விஜய் கர்நாடகா செல்லும் நாளிலேயே திமுக போராட்டம்! சூடுபிடிக்கும் காவிரி விவகாரம்! மு.க.ஸ்டாலின் மாஸ்டர் மூவ்!

ஆகஸ்ட் 3-ஆம் தேதி நண்பகல் 12 மணிக்குள் முதல்வர் விஜய் தலைமையிலான குழு கர்நாடகத்தை சென்றடையும் என எதிர்பார்க்கப்படுகிறது. அங்கு நடைபெறும் பேச்சுவார்த்தையில் காவிரி நீர் பகிர்வு, மேக்கேதாட்டு அணை திட்டம் மற்றும் இரு மாநிலங்களின் நீர்வள ஒத்துழைப்பு குறித்து விரிவாக ஆலோசிக்கப்படலாம் என தகவல்கள் தெரிவிக்கின்றன.

இதற்கு முன்பு தமிழ்நாட்டின் முதல்வராக இருந்த எம்.ஜி.ஆர். கர்நாடகத்திற்கு சென்று காவிரி விவகாரம் குறித்து பேச்சுவார்த்தை நடத்தியிருந்தார். அதன்பிறகு தற்போது முதல்வர் விஜய் இந்த முயற்சியை மேற்கொள்வது அரசியல் மற்றும் பொதுமக்கள் மத்தியில் கவனத்தை ஈர்த்துள்ளது. இந்த சந்திப்பு காவிரி பிரச்சினையில் புதிய முன்னேற்றத்தை ஏற்படுத்துமா என்ற எதிர்பார்ப்பு இரு மாநிலங்களிலும் அதிகரித்துள்ளது.

இதையும் படிங்க: விஜய் முதல்வராக இருக்கும் வரை! மேகதாது அணை கட்ட ஒரு செங்கல் கூட வைக்க முடியாது! அமைச்சர் செங்கோட்டையன் அதிரடி!