சென்னை: தமிழக வெற்றிக் கழகம் தலைமையிலான அரசில் அமைச்சர் பொறுப்பேற்ற காங்கிரஸ் தலைவர்களை வரவேற்க சத்தியமூர்த்தி பவனுக்கு முக்கிய காங்கிரஸ் தலைவர்கள் வராதது, கட்சிக்குள் நிலவும் கோஷ்டி பூசலை பகிரங்கமாக அம்பலப்படுத்தியுள்ளது.

முதல்வர் விஜய் தலைமையிலான அமைச்சரவையில் காங்கிரஸுக்கு இரண்டு அமைச்சர் பதவிகள் ஒதுக்கப்பட்டன. அதன்படி, விஸ்வநாதன் மற்றும் ராஜேஷ்குமார் ஆகியோர் நேற்று அமைச்சர்களாக பதவி ஏற்றனர். பதவி ஏற்புக்குப் பிறகு இருவரும் காங்கிரஸ் தலைமையகமான சத்தியமூர்த்தி பவனுக்கு சென்றனர். 

ஆனால், அங்கு அவர்களை வரவேற்க முன்னாள் தலைவர் தங்கபாலு தவிர வேறு எந்த முக்கிய தலைவர்களும் வரவில்லை. வெளியூர்களைச் சேர்ந்த சில தொண்டர்கள் மட்டுமே அங்கு இருந்தனர்.

இதையும் படிங்க: தவெகவுக்கு தாவும் காங்., நிர்வாகிகள்! தலைமைக்கு சென்ற கம்ப்ளைண்ட்! தலைவலியில் ராகுல்காந்தி!

மாநில நிர்வாகிகள், மாவட்டத் தலைவர்கள் மற்றும் முக்கிய நிர்வாகிகளுக்கு வரவேற்பு நிகழ்ச்சி குறித்து எந்தத் தகவலும் அனுப்பப்படவில்லை எனக் கூறப்படுகிறது. அதே நேரத்தில், முன்னாள் பிரதமர் ராஜிவ் காந்தி நினைவு தினத்தையொட்டி பயங்கரவாத எதிர்ப்பு உறுதிமொழி ஏற்பு நிகழ்ச்சி நடைபெற்றது. அதில் கலந்துகொண்ட தமிழக காங்கிரஸ் தலைவர் செல்வப்பெருந்தகை உடனடியாக புறப்பட்டுச் சென்றார்.

காங்கிரஸ் மேலிடப் பொறுப்பாளர் கிரீஷ் சோடங்கர் இதுகுறித்து கூறுகையில், “59 ஆண்டுகளுக்குப் பிறகு தமிழகத்தில் காங்கிரஸ் ஆட்சியில் பங்கேற்பது பெரும் மகிழ்ச்சி. ஆட்சியில் பங்கேற்றால்தான் மக்களுக்கு சிறப்பான சேவை செய்ய முடியும்” என்றார். புதிய அமைச்சர்கள் ஒவ்வொரு மாதமும் ஒரு நாள் சத்தியமூர்த்தி பவனில் தொண்டர்களை சந்தித்து அவர்களின் குறைகளை கேட்பார்கள் என்றும் அவர் தெரிவித்தார்.

அமைச்சர் விஸ்வநாதன் பேசுகையில், “காமராஜர், கக்கன் போன்ற தலைவர்கள் அமர்ந்த அமைச்சரவையில் இடம் பெற்றுள்ளோம். அவர்கள் வழியில் நேர்மையுடன் பணியாற்றுவோம். இந்த வாய்ப்பை வழங்கிய சோனியா, ராகுல், கார்கே ஆகியோருக்கு நன்றி” என்றார். அமைச்சர் ராஜேஷ்குமார், “காமராஜர் ஆட்சி அமைய வேண்டும் என காத்திருந்த தொண்டர்களின் கனவு நிறைவேறியுள்ளது. மக்களுக்கும் தொண்டர்களுக்கும் வெளிப்படையான முறையில் பணியாற்றுவோம்” என்று தெரிவித்தார்.

இந்த சம்பவம் காங்கிரஸ் கட்சியின் உள்ளாட்சி பூசலை வெளிச்சத்துக்கு கொண்டு வந்துள்ளது. தமிழக அரசியலில் புதிய கூட்டணி அரசு தொடங்கியுள்ள நிலையில், காங்கிரஸ் தரப்பில் தொடர்ந்து உள்ள இத்தகைய பிளவுகள் கட்சியின் எதிர்காலத்தை பாதிக்கும் என அரசியல் வட்டாரங்கள் கருதுகின்றன.

இதையும் படிங்க: அமைச்சர் பதவி கிடைக்காததால் எஸ்.பி.வேலுமணி, சி.வி.சண்முகம் அப்செட்!! உற்சாக கீதம் பாடும் எடப்பாடியார் தரப்பு!