டாக்காவில் உள்ள தூராக் நதியில் முன்னாள் விமானப்படை அதிகாரி ஒருவரின் உடல் கண்டெடுக்கப்பட்டுள்ளது. 28 வயதான கே.எம். தாஹ்சிஃப் சௌரி என்ற அந்த இளம் அதிகாரி, செவ்வாய்க்கிழமை மாலை முதல் காணாமல் போயிருந்தார். அவரது குடும்பத்தினர் புகார் அளித்ததைத் தொடர்ந்து காவல்துறை தேடுதல் நடத்தியதில், நேற்று பிற்பகல் சுமார் 4.30 மணியளவில் உத்தர்கான் பகுதியிலுள்ள ராஜபாரி கேட்டருகே நதிக் காவல்துறையினர் அவரது சடலத்தை மீட்டனர்.

தேசிய அவசர எண் 999 மூலம் கிடைத்த தகவலின் அடிப்படையில் டோங்கி நதிக் காவல் அணியினர் செயல்பட்டனர். ஆரம்பத்தில் அடையாளம் தெரியாத உடலாகக் கருதப்பட்ட அதில், கருப்பு நிற முழு கை சட்டை, வெள்ளை பைஜாமா ஆகியவை அணிந்திருந்தன. கைக்கடிகாரமும் பாக்கெட்டில் ஐபோன் கைப்பேசியும் இருந்தன. அந்தக் கைப்பேசியின் மூலமே அவரது அடையாளம் உறுதி செய்யப்பட்டது.

வெளிப்புறத்தில் காயங்கள் எதுவும் தென்படவில்லை என்றும், மூக்கிலிருந்து ரத்தம் வந்திருந்ததாகவும் ஆரம்ப அறிக்கை குறிப்பிடுகிறது. உடல் ஷாஹீத் சுஹ்ராவர்தி மருத்துவக் கல்லூரி மருத்துவமனை மோர்க்கிற்கு பிரேத பரிசோதனைக்காக அனுப்பப்பட்டுள்ளது. மரணக் காரணம் பிரேத அறிக்கை வந்த பின்னரே தெரியும் என நதிக் காவல் அதிகாரிகள் தெரிவித்துள்ளனர்.

இதையும் படிங்க: முதல்வர் விஜய் வர்றாருனு காலையில இருந்தே காத்திருக்க முடியுமா? மேயர் பிரியா ஆவேசம்!

தாஹ்சிஃப் உத்தரா செக்டர் 18-இல் குடும்பத்துடன் வசித்து வந்தார். அவரது தந்தை கே.எம். எனாயெதூர் ஹெலால். 2024 ஆகஸ்ட் 5 அன்று மாணவர் எழுச்சிக்குப் பின்னர் அப்போதைய பிரதமர் ஷேக் ஹசீனா நாட்டை விட்டு விமானத்தில் புறப்பட்ட காட்சிகளைப் பதிவு செய்து சமூக வலைதளங்களில் பகிர்ந்தவர் என்று பரவலாகப் பேசப்பட்டவர் இவர்தான். 

அந்த வீடியோ உலகளவில் பெரும் கவனத்தை ஈர்த்தது. அதைத் தொடர்ந்து அவர் உள்ளிட்ட சில அதிகாரிகள் ஒழுங்குமுறை காரணங்களால் பணியிலிருந்து விடுவிக்கப்பட்டனர். பின்னர் அவர் வங்கதேச கிரிக்கெட் வாரியம் உள்ளிட்ட நிறுவனங்களில் பணியாற்றினார்.

குடும்பத்தினர் இதை இயற்கை மரணம் அல்ல என்றும், வீடியோ தொடர்பாகத் தொடர்ந்து அச்சுறுத்தல்களும் மன உளைச்சலும் எதிர்கொண்டதாகவும் குற்றம்சாட்டுகின்றனர். அவரது உறவினர் ஒருவர் சமூக வலைதளத்தில் “என் சகோதரன் கொல்லப்பட்டார்” எனக் குறிப்பிட்டுள்ளார். தந்தை, மகன் உயிருக்கு அஞ்சி வந்ததாகவும், அந்தப் பகுதியில் முன்பு சென்றதில்லை என்றும் கூறியுள்ளார். 

உள்துறை அமைச்சர், விசாரணை மற்றும் பிரேத பரிசோதனை முடியும் வரை கருத்து தெரிவிக்க இயலாது என அறிவித்துள்ளார். இந்தச் சம்பவம் அரசியல் மற்றும் பாதுகாப்பு வட்டாரங்களில் பெரும் அதிர்ச்சியை ஏற்படுத்தியுள்ளது.
 
 

இதையும் படிங்க: அமெரிக்காவிலும் செயல்பட துவங்கியது RSS! அவதூறுகளை முறியடிக்க புதிய முயற்சி!