உலகின் முன்னணி தேடுபொறி நிறுவனமான கூகுளுக்கு, ஐரோப்பிய ஒன்றியத்தில் ஏற்பட்டுள்ள தனியுரிமை விதிமீறல் விவகாரம் பெரும் அதிர்ச்சியை ஏற்படுத்தியுள்ளது. பயனர்களின் தனிப்பட்ட இருப்பிடத் தகவல்களை உரிய அனுமதி மற்றும் வெளிப்படைத்தன்மையின்றி சேகரித்ததாக எழுந்த குற்றச்சாட்டைத் தொடர்ந்து, கூகுள் நிறுவனத்திற்கு சுமார் ரூ.4,435 கோடி அபராதம் விதிக்கப்பட்டுள்ளது.

அமெரிக்காவை தலைமையிடமாகக் கொண்ட கூகுள் நிறுவனத்தின் ஐரோப்பிய தலைமையகம் அயர்லாந்தில் செயல்பட்டு வருகிறது. இதனால், இந்த விவகாரம் தொடர்பான விசாரணையை அயர்லாந்து தரவு பாதுகாப்பு ஆணையம் மேற்கொண்டது. ஐரோப்பிய ஒன்றியத்தின் பொதுத் தரவு பாதுகாப்பு விதிமுறைகளான GDPR-ன் அடிப்படையில் இந்த விசாரணை நடைபெற்றது.

விசாரணையில், கூகுள் சேவைகளைப் பயன்படுத்தும் நபர்களின் இணைய செயல்பாடுகள் மற்றும் இருப்பிட வரலாறு உள்ளிட்ட தகவல்கள் கண்காணிக்கப்பட்டு சேகரிக்கப்பட்டதாகக் கூறப்படுகிறது. குறிப்பாக, ‘Web & App Activity’ எனப்படும் அம்சம் மூலம் பயனர்களின் டிஜிட்டல் செயல்பாடுகள் தொடர்பான தகவல்கள் சேமிக்கப்படுவது குறித்து போதுமான வெளிப்படைத்தன்மை இல்லை என கண்டறியப்பட்டுள்ளது.

இதையும் படிங்க: ராமர் கோவில் நன்கொடை திருட்டு வழக்கு..! பெரும் சர்ச்சை... விரைவில் குற்றப்பத்திரிகை தாக்கல்..!!

அதேபோல், ஆண்ட்ராய்டு சாதனங்களில் பயன்படுத்தப்படும் இருப்பிடத் துல்லியத்தன்மை தொடர்பான அம்சத்திலும் பயனர்களுக்கு தேவையான அளவு தெளிவான தகவல்கள் வழங்கப்படவில்லை என்ற குற்றச்சாட்டும் எழுந்துள்ளது.

தனிப்பட்ட தகவல்களை நிறுவனங்கள் எவ்வாறு சேகரிக்கின்றன, எதற்காக பயன்படுத்துகின்றன என்பதை பயனர்கள் தெளிவாக அறிந்து கொள்ள வேண்டும் என்பதே GDPR விதிகளின் முக்கிய நோக்கங்களில் ஒன்றாகும்.

இந்த விதிமுறைகளை மீறியதாகக் கூறப்பட்டதன் அடிப்படையில் கூகுளுக்கு ரூ.4,435 கோடி அபராதம் விதிக்கப்பட்டுள்ளது. ஐரோப்பிய ஒன்றியத்தில் தனியுரிமை விதிகளை மீறியதற்காக கூகுளுக்கு விதிக்கப்பட்ட மிகப்பெரிய அபராதங்களில் இதுவும் ஒன்றாக பார்க்கப்படுகிறது.

இந்த நடவடிக்கை, இலவசமாக வழங்கப்படும் டிஜிட்டல் சேவைகளுக்கு பதிலாக பயனர்களின் தரவு எவ்வாறு பயன்படுத்தப்படுகிறது என்பது குறித்த விவாதத்தையும் மீண்டும் தீவிரப்படுத்தியுள்ளது. குறிப்பாக, ஆண்ட்ராய்டு மற்றும் கூகுள் சேவைகளைப் பயன்படுத்தும் கோடிக்கணக்கான மக்களுக்கு, தங்களது Location மற்றும் இணைய செயல்பாடுகள் எவ்வாறு கையாளப்படுகின்றன என்பதை தெரிந்து கொள்வதன் அவசியத்தையும் இந்த விவகாரம் உணர்த்துகிறது.

இதையும் படிங்க: கோயிலுக்குச் சென்ற சிறுமியை கூட்டு பாலியல் வன்கொடுமை செய்த மனித மிருகங்கள்... தலைநகரில் மீண்டும் பயங்கரம்...!