79வது சுதந்திர தினத்தை முன்னிட்டு தமிழக ஆளுநர் ஆர்.என்.ரவி நாளை (ஆகஸ்ட் 15, 2025) சென்னை ஆளுநர் மாளிகையில் ஏற்பாடு செய்துள்ள தேநீர் விருந்தை முதலமைச்சர் மு.க.ஸ்டாலின் புறக்கணிப்பதாக தமிழக அரசு அறிவித்துள்ளது. இந்த முடிவு, ஆளுநரின் தொடர்ச்சியான செயல்பாடுகள் தமிழ்நாட்டின் நலன்களுக்கு எதிராக உள்ளதாகக் கூறி, திராவிட முன்னேற்றக் கழகம் (திமுக) மற்றும் அதன் கூட்டணிக் கட்சிகளால் எடுக்கப்பட்டுள்ளது.

ஒவ்வொரு ஆண்டும் சுதந்திர தினத்தன்று ஆளுநர் மாளிகையில் நடைபெறும் இந்த விருந்தில் முதலமைச்சர், அமைச்சர்கள், எம்.எல்.ஏக்கள், எம்.பிக்கள், நீதிபதிகள், முக்கிய பிரமுகர்கள் உள்ளிட்டோர் பங்கேற்பது வழக்கம். ஆனால், இந்த ஆண்டு, ஆளுநர் ஆர்.என்.ரவியின் நடவடிக்கைகளுக்கு எதிர்ப்பு தெரிவிக்கும் வகையில், முதலமைச்சர் ஸ்டாலின் மற்றும் திமுக கூட்டணியினர் இவ்விழாவை புறக்கணிக்கின்றனர்.

இதையும் படிங்க: கவர்னர் மாளிகையில் தேநீர் விருந்து.. தவெக கட்சியை அழைத்த ஆளுநர்..!!

திமுகவின் இந்த முடிவு, ஆளுநருக்கும் மாநில அரசுக்கும் இடையே நிலவும் பதற்றமான உறவை மேலும் வெளிப்படுத்துகிறது. மத்திய அரசின் கல்விக் கொள்கைகளுக்கு எதிராகவும், ‘நீட்’ தேர்வு உள்ளிட்ட விவகாரங்களில் ஆளுநரின் அணுகுமுறைக்கு எதிர்ப்பு தெரிவித்து வரும் திமுக, இந்தப் புறக்கணிப்பு மூலம் தனது நிலைப்பாட்டை உறுதிப்படுத்தியுள்ளது.

இது தொடராக உயர்கல்வித்துறை அமைச்சர் கோவி.செழியன் அறிக்கையில் வெளியிட்டுள்ள அறிக்கையில், தமிழ்நாட்டு மக்களின் நலன்களுக்கு எதிராக தொடர்ந்து கருத்துகளைத் தெரிவித்து செயல்பட்டுவரும் கவர்னர் ஆர்.என். ரவி அவர்களின் செயல்பாட்டிற்கு எதிர்ப்பு தெரிவிக்கும் விதமாக 18.8.2025 மற்றும் 19.8.2025 ஆகிய நாட்களில் நடைபெறும் இரண்டு பல்கலைக்கழகங்களின் பட்டமளிப்பு விழாக்களில் முதலமைச்சர் அறிவுத்தலின்படி பங்கேற்கப் போவதில்லை என்று தெரிவித்துள்ளார்.

மேலும் தஞ்சாவூர் மாவட்டம், கும்பகோணத்தில் கலைஞர் பல்கலைக்கழகம் அமைப்பதற்கான மசோதா முறையாக தமிழ்நாடு சட்டமன்றப் பேரவையில் நிறைவேற்றப்பட்டு கவர்னர் அவர்களின் ஒப்புதலுக்காக அனுப்பி வைக்கப்பட்டது. அதற்கு அவர் ஒப்புதல் அளிக்காமல், தாமதப்படுத்த வேண்டுமென்ற நோக்கத்தோடு ஜனாதிபதி அவர்களுக்கு அனுப்பிவைத்துள்ளார்.

அதுமட்டுமின்றி முதலமைச்சர் (நாளை) 15.8.2025 கிண்டி கவர்னர் மாளிகையில் நடைபெறும் தேநீர் விருந்தில் பங்கேற்க மாட்டார். மேலும், முதல்-அமைச்சரின் அறிவுறுத்தலின்படி தானும் 18.8.2025 மற்றும் 19.8.2025 ஆகிய நாட்களில் நடைபெறவுள்ள அழகப்பா பல்கலைக்கழகம் மற்றும் திருவள்ளுவர் பல்கலைக்கழகம் ஆகிய பல்கலைக்கழங்களின் பட்டமளிப்பு விழாக்களில் பங்கேற்கப் போவதில்லை என்று தெரிவிக்கப்பட்டுள்ளது. 

மறுபுறம், அதிமுக, பாஜக, பாமக உள்ளிட்ட எதிர்க்கட்சிகள் இந்த தேநீர் விருந்தில் பங்கேற்க முடிவு செய்துள்ளன. இது அரசியல் வட்டாரங்களில் பரபரப்பை ஏற்படுத்தியுள்ளது.

முதலமைச்சர் ஸ்டாலின், மாநில உரிமைகளையும், தமிழ்நாட்டின் நலன்களையும் பாதுகாக்கும் வகையில் தனது ஆட்சியில் பல முன்னெடுப்புகளை மேற்கொண்டு வருகிறார். இந்தப் புறக்கணிப்பு, மத்திய அரசின் தலையீடுகளுக்கு எதிரான அவரது உறுதியான நிலைப்பாட்டை மீண்டும் எடுத்துக்காட்டுகிறது.

இந்த நிகழ்வு, தமிழக அரசியல் களத்தில் மேலும் விவாதங்களைத் தூண்டியுள்ளது. ஆளுநர்-முதலமைச்சர் இடையேயான மோதல், எதிர்காலத்தில் மாநில அரசின் கொள்கை முடிவுகளில் எவ்வாறு தாக்கத்தை ஏற்படுத்தும் என்பது கவனிக்கப்பட வேண்டிய விஷயமாக உள்ளது.
 

இதையும் படிங்க: கவர்னர் மாளிகையில் தேநீர் விருந்து.. தவெக கட்சியை அழைத்த ஆளுநர்..!!